حوار مع الاخت تراجي مصطفي والاخ محمد سليمان

Quote: ماعارف ابدا معاكي من وين يا ام حازم لكن خلينا نتكلم في نقاط.....انا ما كتبت كلمة تقدير في حقك لانو زي ما حكيت ليك كنت موقوف من المنبر لسنوات وممكن تسالي بكري وبعض معاونيه عشان ياكد ليكي المعلومة دي.الشي التاني حتي زمن وجودي في المنبر مشاركاتي كانت مباشرة في القضايا البتطرق ليها ما قاعد اخش في صراعات كي بوردية ومعارك انترنيتية عشان كدا خطوطنا ما كانت قاعدة تتقاطع كتير......................الشي التاني ان بعتبر سودانيزاون لاين منبر سوداني لكل السودانيين وقصة منبر جلابة وخلافو دي ما بتمش معاي ....وحاجة تانية ما في زول بقدر بنزع مننا الجنسية ...انتي هنا بتتكلمي عني كزغاوي وتفتكري بتمني علينا بدفاعك... كان غيرك احرص مافي زول بقدر ينزع من زغاوي جنسيتو ولو دايرا تقولي نحنا تشاديين مرحب قولي. التشاديين اهلنا واولاد عمنا وبنتشرف بيهم تب ما عندنا مشكلة في انو زول يوصفنا بيهم...التشاديين اشجع واكرم ناس ولو ما كنت سوداني كنت اتمني اكون تشادي...وعلي فكرة يا ام حازم الزغاوة الهناك في تشاد برضو في اول لفة او خلاف بقولو ليهم يا سودانيين ارجعو بلدكم....فدحين اتفقو انحنا سودانيين ولا تشاديين. انا المقعدني في الخرطوم شنو سوال جيد يا ام حازم....اول حاجة زعيمك الحالي الانتي عضوة في حركتو كان قاعد معانا في الخرطوم دي 5 سنوات...ما سالتي لي هسا الكان مقعدو شنو الفترة ديك كلها وليه هرب خلي جماعتو وقياداتو في الخرطوم....اولا كدي اساليهو واسمعي اجابتو وبعد داك تعالي لي اجاوبك....واذا كان الوجود في الخرطوم بعني العمالة مباشرة فمعناتا اهلنا الفي السودان ديل كلهم عملاء.40 مليون سوداني عميل ودا منطق ما اظن سبقك ليهو زول....وبعدين بنفس منطقك دا مناي ذات نفسو لهسي عميل لانو قعد في الخرطوم واشتغل مع البشير وطلع زعلان علي عدم اعادة تعيينو في منصبو......فيا ستي قصة وجود زول في منطقة ما بتديك انتي ولا غيرك الحق عشان توزعي عليهو شهادات النقاء الثوري ولا الخيانة الثورية.....نحن الخرطوم دي زي ما عارفة ما جيناها شحادين ولا متوسلين كلو الناس الجوها بعد ابوجا جو بقناعة انو يسهمو في دفع الامور للامام عبر الطريق السلمي وقاعدين ليه هسا انا قناعتي لسه ما اتغيرت رغم جبروت الموتمر الوطني وضيق هامش الحرية...انو من الاحسن والاجدي والاسهل تغيير النظام بالطرق السلمية اكتر من حمل سلاح من مجموعات فقط من الشعب بس.لان السودان دا بلد قارة, ومازال رغم انفصال الجنوب. ما ممكن يتم تغيير فيهو الا بمشاركة كل قواهو بمن فيهم من تنعتيهم بالجلابة لانهم ايضا جزء من مكونات النسيج الاجتماعي للوطن في يلي المناصب الحكومية والمخصصات لعلمك يا سيدتي العزيزة انا فصلت من العمل بعد خروج مناوي بايام وتعرضت للتحقيق والاعتقال وتم حجز عربتي لاكتر من شهرين لدي جهاز الاستخبارات العسكرية....وطبعا كان ما مصدقين انو مناوي ممكن يمشي ويخلي واحد من اقرب معاونيه كدا ساكت فمفتكرني زول زارعو مناوي ولمعلوماتك حتي شهور قريبة الكتيرين كان مفتكرني تابع لمناوي والحقيقة غير ذلك تماما مناوي هرب وتخلي عنا في الخرطوم وكان مفتكر اننا ح نجي زي الفيران جارين نحتمي بيهو.....وازيدك من الشعر بيت ...ابان تواجد مناوي في جوبا طبعا بدات مجموعة سميناها هنا اصطلاحا بنكسس في التمرد علي غياب مناوي وسحب الجيش للجنوب فكانو بفتكرونا نحن الواقفين لسا مع مناوي مغفلين وحصل واحد منهم صديق قال لي انتو مغفلين مناوي دا مشي وودا الجيش الجنوب وما ح يجي تاني وساق اهلو والناس الدايرم انتو ناس الاجهزة الامنية ح يقبضو عليكم ويطلعو صليبكم....طبعا اختا الامر من باب المكايدة والتخويف لكن في اول محادثة تلفونية تالية لي مع مناوي طرحتا ليهو كلام الزول بحذافيرو عشان اشوف رد الفعل بتاعو....فضحك كدا وقال لي انتا ما اوربي...في البدء اختا الموضوع علي اساس انو مناي يعني انو الموضوع ما بحصل ..لكن مع تصاعد الامور اتضح لي انو مناوي بقصد انا ما دايرك معاي هنا لكن اذا حصل حاجة تقدر تمشي لاوربا تاني....واها تم الاعتقال بعد داك ومضايقة الاجهزة الامنية ...مع دا كلو ما جرينا لحقنهاو زي الفيران زي ما كان داير ولا مشيت اوربا....داير اقول ليكي انا اخر مرتب لي استلمتو في 2010 ومن الوكت داك مفصول فصل تعسفي ورفعت قضية في محمكة العمل. جاري في اعمالي الخاصة وبوفر اكل عيالي من السوق والحمد لله عندي اخوان يسدو عين الشمس شهامة وتجردا واحد منهم استلف مرتب ستة شهور وقال هاكا مشي امورك لحدي ما ربك يفرجا....الشي التاني من تاريخ فصلي والله علي ما اقول شهيد لا استلمت قرش من حكومة ولا انعرض علي منصب ولا خلافو....ويوم مقتل خليل انا كنت في الفراش وعزيت اولادو فردا فردا وقعدت في الفراش وكتبت نعي نشرتو في النت....اخو ورفيق واعتبره شهيد وما في زول بقدر يغير لي قناعاتي دي....وقاعدين نكتب وندين الممارسات سواءمن جانب الحكومة ولا غيرها وح اجيب ليك نماذج لذلك قصة انو زول بحسبنا بشر ولا غيرو دي بترجع ليهو هو نحن عارفين نفسنا بشر والارض دي حقتنا نقوم ونقعد علي كيفنا ما عندنا احساس بالدونية ولا مركبات نقص ولا هواجس وبارونويا تجاه اي شخص...البحسبنا خلي يحسبنا المهم نحن عارفين نحن منو ونحن شنو انا قبل شهرين كنتا في الحبس لاسباب كيدية...امام المسجد بتاع السجن جعلي حكوا لي المعاهو انو بكي بدموعو يوم مقتل خليل....السجن كلو كان حزين يوم مقتل خليل لانو بفتكروهو رمز لكل مهمش ومظلوم يومو الجا بلقو حقهم...وانا شفت بعيني ديل بنات من تصفيهم بالجلابة في جامعة الخرطوم ببكوا خليل احر من لما واحدة يموت ليها شقيقا....صحي في قلة احتفلت وهي قلة مريضة لكن بالوعي والتلاحم القلة دي كلو يوم ممكن نقلل من عددا عشان يكون سودان يسعنا جميعا فيا استاذة تراجي انا ما بعت وما ببيع وما شبه البيع...فاذا في حاجة تانية ولا عندك ادلة بره من وجودي في الخرطوم دي جيبيها خلينا نتناقش...وبعد داك انتي ما زولة ناشطة في حقوق الانسان ما تكلمي اخونا مني دا يا اخي يوقف قتل المدنيين في شمال دارفور والاعتقال والتعذيب ولا كل شي بيسويهو مني عندك صاح .الحق ما بتجزا يا ستي....اتمني الكلام يكون بنفس هادئة وباحترام لبعض....التخوين الساكت والانطلاق من افكار جاهزة معلبة لنقد الاخرين ما بتودي لنتيجة