Charles Darwin اسخف عالم.....صورة

Quote: الآية دي زاتها .. (قل سيروا في الأرض فانظروا كيف بدأ الخلق) .. خلتني أفتش عن الحقل الدلالي لـ (سيروا في الأرض) في أي حته إستعملها القرآن فيها .. و كلها رجعت للتفتيش في الأركيولوجي و الآثار لإعادة بناء الماضي .. و برضو (إنظروا) دي دلالاتها بتتماهى مع التفكير و الإستنتاج و ليس مع البصر العادي بالعيون .. و أخيرا (كيف بدأ الخلق) لو أخدناها بحرفيتها بتعني ببساطة إن في بداية واحده للخلق و إن بالإمكان التوصل لكيفيتها عبر النظر في (سيروا في الأرض) .. و ده بيوصلني لمسألة الحفريات و رحلة دارون على متن البيجلز .. كمان الآية القبالها ({أو لم يروا كيف يبدئ الله الخلق ثم يعيده إن ذلك على الله يسير}) بتنفي تأويلها بمسألة الخلق اليومي و إعادته كل مرة لأنها إتكلمت عنه كتمهيد للآية المفتاحية دي .. و بقية الآية (قُلْ سِيرُوا فِي الْأَرْضِ فَانْظُرُوا كَيْفَ بَدَأَ الْخَلْقَ ثُمَّ اللَّهُ يُنْشِئُ النَّشْأَةَ الْآَخِرَةَ إِنَّ اللَّهَ عَلَى كُلِّ شَيْءٍ قَدِيرٌ) بتحدد مسألة إنو الفهم الحرفي مقصود بمقابلته مع النشأة الآخرة و على مسألة القدرة .. قارن ده مع إن فكرة زي دي لا هي موجوده في معهود العرب الثقافي و لا من المفكر فيه بالعصر داك !! ... المسألة كالآتي : 1) درست كل آيات القرآن المتعلقة من قريب أو بعيد بمسألة خلق الإنسان (يعني ما إختيارات إنتقائية). 2) وجدت أن إعتماد حقيقة التطور يجعل من الآيات اللي بتتكلم عن الخلق أكثر إتساقا مع بعضها و بتستلزم قدر أقل من التأويل و التحكم بالمعنى مما لو فسرت على حسب نظرية الخلق المستقل. 3) قارنت لغة القرآن حول هذا الأمر مع الإنجيل و النصوص الدينية الأخرى و مع لغة العرب زمن نزوله (كحافظة مفاهيم العصر) و لقيت إن الكلام بيتجاوز مجرد إنعكاس بسيط لمفاهيم الثقافة السائدة و بيستطبن مسألة التطور. المسألة الأهم هي : ما قاعد أتعامل بفكرة الإعجاز القرآني و إن القرآن فيه تفاصيل الحقائق العلمية كلها، كل قصدي هو أن الأفكار المتضمنة بالقرآن فيما يخص العلم لا تجبرك على مصادمته كما أنها تنفتح على آفاق دلالية تتناغم مع الحقائق العلمية في مبادئها لا تفاصيلها .. القضية عندي هي في فهم القرآن بشكل أكثر إتساقا مع لغته و إسلوبه .. ما قاعد أفتش فيه عن تعضيد لقناعاتي المسبقة سواء أكانت علمية أم غيرها .. و الإتجاه عندي دوما من الكون نحو القرآن لمزيد تفهم و ليس العكس. التطور كان دربي للإيمان بعظمة فكرة الخلق المتضمنه فيه و القرآن هو أحد روافد تبنيني لفكرة الأديان لمجمل الآيات البينبه عليها ... ده مدخل كويس لتوضيح موقفي من الآية إياها و من إستهدائي و قناعتي بالقرآن بشكل عام .. فبرغم وعيي بالقصور الإثباتي و قناعتي بإن الحقيقة دوما أكبر من الإثبات (زي ما وصل ليه جودل و شايتين Chaitin) .. إلا أن مسألة إنو الزول يتناقض مع المسلمات اللي إختارها (لسبب يتجاوز العقل و يرتبط بالإحساس و التجربة و الحدس) دي مسألة بتفارق اللاأدرية تماما .. يعني ماممكن أقول أنا مقتنع بنتائج العلم و بأدلة التطور و بعدين أتبنى رأي ديني مثلا مناقض بشكل قاطع للتطور من أساسه .. و ده اللي كنت بقصده بشكل أساسي لما قلت ليك القرآن بيسوق للتطور .. المسألة ما إثبات و سبق زماني و إعجاز في الأساس .. بل مسألة إنو ما بيصادم لي فهمي للتطور هو الحاجه المذهلة في المقام الأول .. يلا و علشان ماتقول لي الفكرة قديمة و أبيقور و إخوان الصفا .. أرجع و أنبهك لإنك تستخلص أفكار الناس ديل في جوهرها .. يعني ديل كلهم كانوا بيتكلموا عن ملاحظات حول شبه الحياة ببعضها و بيتبنوا آليات معينة للحكاية دي (الإستعداد بالأفق القريب عند إخوان الصفا مثلا) و بيعتقدوا ببدايات متعدده لكل نوع حي (زي الإنجيل مثلا) .. بينما الفكرة المفارقة للقرآن لا تتعلق بالتفاصيل و لا الملاحظات المتاحة للعباقرة بل هي ببساطة زي ما قلت ليك فوق .. تحديد لوجود بداية أولى للخلق و توجيه بأن البحث في الأرض (أركيولوجيا/جيولوجيا) حيكون مفتاح لإدراك كيفية البداية دي !! .. و ما أظني محتاج أذكرك بإن مسألة البحث في طبقات الأرض عن آثار الحياة كانت أكبر دليل على فكرة البداية الواحده و أكبر محفز لفكرة التطور الحديثة الجا دارون و قرط عليها برحلته المشهورة .. إنت لو ماشايف إنو الفكرة دي مفارقة حأكون مستغرب منك .. هل حصل زول قال الفكرة دي بالضبط بشكلها ده قبال كده على حسب علمك؟؟؟ .. عموما .. ده برضو ماوجه حجتي أو تعلقي بالقرآن أبدا !! .. وجه إعجابي و يقيني و حبي ليه نابع من كون أن إستدلاله بفكرة البداية الواحده للخلق و كيفيتها اللي عرفت أنا الآن إنها عبر عملية التطور الرائعة هو مدخل لفكرة النشأة الأخرى .. يعني لما يخاطبني و يقول : شفت كيفية الخلق دي مكربة و بديعه كيف .. أها العملها كده ما غالبه ينشئكم من جديد (فيما لا تعلمون) .. بلقى تجاوب وجداني عميق جواي مع الكلام ده لأنه بيخاطب الحس الإتكون عندي من معاشرتي للتطور و فنونه الرائعة .. و قس على ذلك بقية الآيات الكونية .. بلقى تعبير عن الجلال الحسيت بيه في دراستي للكون جوه كلام القرآن عنها .. و قبال الفترة دي القرآن كان أشبه بكتاب ممل و غير مفهوم عندي !! .. لولا التفكر و التأمل فستبقى الأكنه على القلوب تجاه القرآن (و ده ماحكم عليك .. فلكل دربه و مآلئه .. و ربما تكون أنت على صواب آخر المطاف) .. فأنا يا عزيزي أبعد ما أكون عن مسألة الإعجاز دي و شايف إنو الآية البتقول (وَلَوْ فَتَحْنَا عَلَيْهِم بَابًا مِّنَ السَّمَاء فَظَلُّواْ فِيهِ يَعْرُجُونَ - لَقَالُواْ إِنَّمَا سُكِّرَتْ أَبْصَارُنَا بَلْ نَحْنُ قَوْمٌ مَّسْحُورُونَ ) سورة الحجر (14-15) .. بتقفل الباب على مسألة كسر الرقبه بطريق عقلي للإيمان .. رغم إن الإعجازيين عملوها هي زاتها من الإعجاز العلمي .. فضل أقول إن حكاية مفارقة العصر دي بالنسبة لي هي دليل على صدق الرسول و ليس على إعجاز القرآن .. يعني المسألة عندي ماهي وجود الله (شايف إن السؤال ده زاتو معيب فلسفيا بدرجة كبيرة) بل هي تصديق الرسول (ص) .. زول قال إنو رسول من الله .. يا تصدقه يا تكضبه .. أها لما تشوف القرآن و كلامه و تقارنه مع كلام الرسول (الحديث) و مع التراث الديني في الوقت داك (الكتاب المقدس) و مع المتاح من الفلسفة و العلوم .. تقوم تلقى فكرة مفارقه زي دي و تتكرر أفكار كتيرة ما بتتناقض مع المعارف الحالية كمان .. ده بالتأكيد بيعضد صدق الزول ده بالذات لما تضع في الحسبان ظروف حياته و بقية صفاته و منجزاته و ظروف قوله للقرآن (حالات الوحي و مشقتها) .. ده الكنت قاصده ليك بمسألة المفارقة دي .. ده إطارها عندي و دلالتها لدي