يوسف حسين يعترف بوجود وصية عبد الخالق ويقول انهم لا يرفضون الشريعة ...

Quote: سلام للجميع عزّت و ضيوفه يا فاضل يا هاشمى ما الذى يضيرنا ان اوضحنا للناس انو الحزب يتبنى الفلسفة المادية الجدلية فى تحليل قضايا الواقع الإجتماعى؟. الفلسفة المادية هى فلسفة العلوم، و اليوم العلينا دا يمكن فهم و تفسير الظواهر الطبيعية و الإجتماعية دون الحوجة الى اى تدخلات من عالم اخر. علمياً الكميّات الفيزيائية فى الكون دا محفوظه، و عندنا قوانين و علاقات رياضية لانحفاظ الـ Energy (conservation of energy) , momentum (Newton second law of motion) and mass (continuity equation) و القروش برضو محفوظه، فقر الـ 90 فى المية من السودانيين ديل سببو حمدى. قروشهم عندو هسه فى جيبو، قال داير يعمل منها بنك لمصاريف العيال. ضرورى انحنا نتبنى خط واضح يشرح للناس هذه المفاهيم، اظن دا عصب مشروع التحديث الذى يحمل لواءه الحزب الشيوعى. قبل فترة كنت منشغل بموضوع التغيرات المناخية و نقص الامطار فى السودان، سألت لى صديقى تفتكر الاسباب شنو البتنقص المطر، رد بأن الناس نفوسها بقعت كعبة! بعدها بفترة سافرت السودان و فى ونسة مع ابوى الشيخ سألته عن المطر زمان و هسه، قال زمان كان اكتر و تغزّل ما شاء له الله عن خريف زمان، اها يابا فى رايك الحصل شنو يكون نقص المطر دا، ردّ قائلا الظلم يا ولدى الظلم بس مافى غيرو. But, to the best of my knowledge, the atmospheric water vapor content is not a function of (الظلم او نفوس الناس). يمكن ان نفهم العالم هذا قبل ان نحتاج للغيب، دى نقطة يلتقى عندها المؤمن و غير المؤمن، قد يكتفى احدهم بالتفسيرات المادية للظواهر، و قد يمدد شخص اخر تفسيراته و يسند المسببات الى وجود قوى عظمى خلف الكواليس ولا جناح عليه كل منها. نحن كاعضاء فى حزب سياسى لسنا جميعا على ذات القناعة و الموقف الفلسفى من الكون لكننا نتلقى فى حدود التأويل المادى دا و الداير يزيدو بطريقتو، له متسع حتى السماء، اها كده نكون وصلنا شاطئ العلمانية بأمان. و الكلام دا لحدى هنا ما ضد اى دين. فى حاجة محيرة فى امر السادة المسيطرين على امر اٍعلام الحزب ديل، و لناخذ بيان السيد الناطق الرسمى باسم الحزب دا كمثال. الناس ديل بيقول الحزب يسترشد بالماركسية فى تحليل الواقع و تفسيره، لكن ما عارف اٍسترشادهم بالماركسية بتم كيف، سراً يعنى؟ "هزّاز" كما فى لغة ابناء جيلى، الهزّاز دا بتاع الموبايل يا هاشمى لمن تكون ما داير تزعج من حولك بنغمة الموبايل. مافى اٍسترشاد بالماركسية فى تحليل الظواهر و دى شرح الماركسية دى زاتها للناس ليه؟. ما يقول ليهو يا مواطنين ياخ الصراع بينا و بين الكيزان ديل ما صراع دينى، دا صراع مصالح اٍجتماعية و طبقية. صراع بين من يودن الثروة و السلطة من اجل كل سودانى و بين من يودونها دولة بين الاغنياء الذين اثرو على حين غرة و غفلة من الزمان. ما يقول للناس ديل البنى الاشتراكى دا فى رقبتو زول فاضل و خيّر تخلّص من شُح نفسه و يحب الخير للجميع، و الموقف الإشتراكى فى ذاته ارفع اخلاقياً من موقف اكلى اموال السحت ديل لكنه مدفون تحت غبار العجز و عتّة اللغة المستخدمة فى اٍعلام الحزب دى. لو اجتهد السيد الناطق الرسمى دا شوية كان عرف ان محمد عبد الكريم دا و بقية العصابة المعاهو يعيشون على فتات موائد الشفته الكبار. و حصلوا على رشاوى اكاديمية استقطعت لهم من سمعة الجامعة و شرفها الاكاديمى فمنّت على كل واحد منهم بدرجة دكتوراة و تم تعينهم اساتذة فى قسم هلامى هدفه نشر الجهل و اٍغلاق منافذ التفكير فى العقل البشرى يسمى قسم الثقافة الاسلامية بجامعة الخرطوم، فى نفس الوقت الذى تعانى فيه الجامعة من نقص فى اى محل تخت فيهو يدك. ديل بيحاربوا فى الحزب الشيوعى كسداد لفواتير الحياة المُنعّمة و الاوضاع الإجتماعية المميزة التى وفرتها لهم الجبهة الاسلامية. حاجة اخيرة: يوسف حسين دا قاعد ينطق بأسم الحزب الشيوعى السودانى دا منذ ان تفتّح وعينا على عالم السياسية السودانية دى (كان يوم اسود)، مافى طريقة يدينا سحبة فى الموضوع دا شوية كده؟.