معا من اجل عاصمة خالية تماما من ( المريسة ) وملحقاتها ...

Quote: المريسة العايز تتطاول عليها دى واحدة من ثقافتنا، نحن قوم مريسة، و المريسة متجزرة فينا وفى تكوينا و العضمو ما مشّيد بالمريسة عضمو "نّى" أو فخ، بف ساكت لا يقوى على فعل شيئ حتى مع الشفع الزيو ما يقدر يصارع و لذلك من بدرى يتدرب الطفل على شراب المريسة لمن يروى و لو ما رِوى، ما يقعد أبداً، و المريسة الأعنيها هنا هى مريسة الدخن الأصفر مش مريسة الفيتريته الشايفها فى القرعة الفوق دى؟ و بعدين كما ذكر واحد من المتداخلين إنو المريسة غذاء لينا، هى كذلك و أزيدك أكثر، هى إسمها العيش و يقول ليك يا زول إشرب العيش خليك تتفرتق و تتفرتق دى مش تتطرشق، لا تتفرتق دى معناها تنتتفض من جربنتك و جسمك يمتلئ شحم و لحم، و أذكر عندما كنا نأتى من الداخليات أيام المدارس داخلية يا حليل زمان كنا ناتى ضعاف من عدم شراب المريسة و أول نصيحة من أهلنا البجو يحمدو علينا السلامة يوصونا بشراب المريسة، علشان نعوض الفاقد، وفى مناسباتنا لازم تكون فى مريسة و توزع صناعتها على البيوت يعنى أى ست بيت لازم تساعد أم العريس أو العروس بصناعة برمة مريسة مدنكلة، و لما المرايس تكتر فى مكان العرس يخصص لها براميل فاضية لتخزن لليومين القادمات أو لكل الأسبوع و لما المريسة تبيت بتتكرب وتكون مظبطة وتعشعش فى الراس تمام و بكرة الصبح الرتب يرقد و الجلد ما يديك درب أما بنات العم طبعاً إظهاراً للفروسية و الشجاعة، و البشرب مريسة لا ياكل ثانى لأن المريسة فى حد ذاتها عيش أو أكل و لذلك يقولو ليك أرح إتغدا ودوماً عزومة غداء المريسة تكون فى نصف النهار وقت القايلة خصوصاً للناس العندهم مزارع و عندما تذهب إلى زراعتك لازم المدام تلحقك ببرمة أو سِعن المريسة علشان عند الظهيرة تملى جلدك بالمريسة و تواصل عملك، وحتى عندنا فى عمل النفاير و نحن مشهوريين بأدب النفير للمساعدة فى الزراعة أو الحصاد أو بناية البيوت، فلو ما عملت مريسة للناس الحيجو يساعدوك ما فى زول بجيك يعنى العاملين فيها فقرة زيك كدة ديل زراعتهم بايرة زول بعتب عليهم مافى و تحت تحت الفُقرة ذاتهم عندما يكون عندهم نفير يطلبوا من حريمهم عمل المريسة رغم عدم شرابهم لها و دا عشان يكونوا جزء من الناس و ثقافتهم و لا ينقطعوا عنهم. فتراث غنى زى دا عايزنا فت بطقطقة كيبورد نقيف عنه؟ يا خوى أرجو أن لا تتجنى على ثقافتنا و لو ما مثقف حقوا تتثقف عن السودان و تراثه و تعال بعد داك أفتح بوستاتك حتى لا تتحدث عن المحظورات و الخرطوم هيلتك دى بنوها ناس المريسة فخليهم يشربوا مريستهم و يبرطعوا فى برطعتهم دى و كمان إنتو بغادى كمان برطعوا فى برطعتكم الما سئلناكم منها دى و لا شنو رايك مش إحترام الثقافات و تعدد الديانات هو شعارنا؟؟