ومنْ قالَ أنّ (الوطنَ ) هو مجرد تراب الأرْض !!

Quote: Quote: كيف أنت تقول لي أنسى أحمد هارونوفي نفس الوقت بتتسأل عن القدرت عليهو حكومة الجنوب هو معاملة الأسرى معاملة كويسة! إذا تريد أن تتناول موضوع الأسرى فيجب تناوله لدى الجانبين (وهو موضوع البوست بالمناسبة). الهمبتة الوحيدة هنا ما تمارسه حكومة المؤتمر الوطني المجرمة من نهب لثروات الجنوب والأستيلاء على أراضي الجنوب. طيب بعد التحكيم الدولي وافقت الحكومتان على قرار المحكمة الدولية، ولكن عندما عاد وفد المؤتمر الوطني للخرطوم تنكرلقرار المحكمة جملة وتفصيلا. فعن أي غلاط تتحدث أنت هنا؟ هولاء أسرى حرب وهم يرتدون زي عسكري. فمن أين أتيت أنت بفريةالأختطاف ا هذا؟ سلامات دينق وان شاء الله طيب - بالرغم من موضوع البوست شكلو اتغير -لكن ح اواصل معاك يا دينق يا عزيزي انا بقول ليك انسي احمد هارون لانو في نظري الرابطين الانت ختيتهم -الاتنين موجهين لنفس الشعب ! يعني نحن نلقاها من الجنوب ولة من نظامنا ! بتفق معاك انو النظام الشمالي بينهب في ثروة الجنوب بالاسعار الخرافية لنقل البترول و ابتزاز الجنوب بالنقل و برضو احتلال جزء من ابيي الجنوبية - و انا مسؤول حتي لوبصورة غير مباشرة باعتبارو دا في النهاية حكومة الشمال -لكن في النهاية ما بطبل ليهمو بل بدينو والهمبتة ما قاعدة تمارسها حكومة المؤتمر براها بخصوص التحكيم - برضو اعلان قائد قوات الجنوب من داخل هجليج بانو هجليج جنوبية و عادت لارض الوطن -دي زاتها -في نظري -همبتة ! لانو هم ما اعلنو -حسب علمي -من جوبا انو هجليج جنوبية ! بل خلو الجزء المحتل من ارض الجنوب في ابيي و جو يحتلوا هجليج !! الهمبتة شنو طيب يا دينق ! و لو هم جو يرجعوا الجزء المحتل في اببي حسب الخريطة انا زاتي بقيف مع حكومة الجنوب ودا حقهم في النهاية ما دام ارتضينا بالتحكيم الدولي - ونفس التحكيم قال هجليج سودانية - و دا القصدتو بالغلاط ! وتنكّر الحكومتين للتحكيم ! لكن ما ممكن نحن الشعوب برضو نقعد نتغالط ! بخصوص اعتباري ( الاسري) مختطفين او رهائن حرب -ببساطة لانو القوات الجنوبية لامن دخلت هجليج ما كانت في حرب !! يعني حسع بعد محاولة نظام الخرطوم لاستعادة هجليج بقت في حرب و في الحالة دي الضحايا ممكن اقول عليهم اسري حرب من الجانبين لكن دخول القوات الجنوبية لهجليج ساكت و اختطافهم للفنيين و الاداريين و الاطباء حتي باقي قوات التأمين للمصافي والابار برضو بعتبرها رهائن حرب ! و بنفس الطريقة اختطاف الحكومة لحرس بيت مشار في الخرطوم برضو اختطاف و رهائن حرب حتي لوكانوا مسلحين ! وحكاية لابس كاكي دي ما معناها عندي طوالي اسير حرب ! ولو نظام الشمال كان احتل ارض جنوبية ساكت و مسك جنود جنوبيين -برضو رهائن عندي و ما اسري ! وفي تقديري حقوحكومة الجنوب تطلق سراح المختطفين بدون اي مساومة وخاصة الفنيين وحتي القالو عليهو طبيب وامنجي ! لانو قوات الجنوب لامن اختطفتو من المستشفي ما كانت عارفة انو هو امنجي ولة طبيب خدمة الزامية ! وحقو المواطنين مهما تكون في مشاكل بين الدولتين ما يكونوا عرضة لاي مساومة لحل مشاكل خاصة بالنظامين ! وكلامك عن تعامل الاسري -في تقديري -ح يبقي زي كلام تلفزيون النيل الازرق انهم قبضوا علي الحرس وفقا (لامر قضائي) !! يعني ما ممكن الناس تتجاوز خرق القانون الدولي في الاول و يتحدثوا في الجزئيات -! و في النهاية يا دينق نعم في نظري النظام الشمالي غير مؤهل و ساقط اخلاقيا او وطنيا عشان يقول لي تعال نحارب من اجل الوطن لكن في النهاية بفتكر انو حكومة الجنوب ما ممكن تحل لي مشكلتي مع النظام باحتلال قطعة ارض و ضرر الناس في معايشهم و ازمة الوقود ! وحتي لو كل دول الجيران احتلوا قطعة ارض من السودان ما معناهو عندي خلاص دي دعوة عشان اي دولة تجي تاخد نصيبها من الباقي وتتسب في حرب و قتل وتشرد بالرغم من خصوصية دولة الجنوب كحالة مشتركة بيننا و لسع في استحقاقات لعملية السلام والانفصال . و السقوط الاخلاقي لنظامنا-عندي - ما عشان حلايب او الفشقة او ارقين (شمال حلفا ) محتلة ! حتي لو كان النظام حارب و رجع الاراضي دي كلها برضو ساقط اخلاقيا عندي نسبة للجرائم المرتكبة ضد الوطن و المواطنين وختاما اذا انا بتحمل المسؤولية الادبية لاي ضرر بيصيب ابناء الجنوب في الخرطوم او في السودان عموما لكن علي الاقل بدين اي سلوك ضدهم في الشمال و شايف انو نحن علي مستوي الشعوب -علي الاقل - ما نطبل لحكوماتنا -اونحاول نحسن وجوهم زي كلامك بتاع التعامل الحسن للاسري ونخلي اساس الجرائم و الهمبتة الحاصلة من النظامين تحياتي