|
Re: رواية الجنقو مسامير الأرض لا أيدلوجية بل إمعانا فى العنصرية ؟! ... (Re: حامد بدوي بشير)
|
الاخ حامد بدوي
في الواقع انا احترت في الخطاب بتاعك عن التهميش والعنصرية , وغيره
Quote: إذا خرج الروائي القادم من مناطق الهامش عن النص الوعظي السقيم، فهو عنصري، وإذا خرج إبن الشمالية عن نفس هذا النص السقيم، فهو مبدع.
|
خرج فرانسيس دينق , في روايته المشهورة طائر الشؤم , ونقدت , وكانت من الروايات الممتازة حقاً المشكلة في نوع العمل المقدم , وليس من قدم العمل لا أختلف معك أن عنوان البوست فيه نوع من التحمل
لكن الرواية في حد ذاتها حجوة , وحالياً انا بسألك , الفكرة شنو في رواية الجنقو ؟؟؟؟ عارف السؤال ده ما لقيت ليهو اجابة بعدين بالنسبة للطيب صالح , في التسيعنات الحكومة منعت روايتو , لو ما خانتني الذاكرة ده من ناحية ومن ناحية ثانية وأهم أشهر رواية للطيب صالح , فيها فكرة محددة واضحة , ودي الرواية الكانت مصدر النقد وشهرة الطيب صالح وعشان أحدد ليك أكثر , علاقة مصطفى سعيد بحسنة بت محمود , لما قتلت ود الريس , وقطعت .... فكل الاشياء دي بتجعل قيمة للرواية
وعشان تكون الاشياء اكثر وضوحاً , بقيت روايات الطيب صالح لم تجد ذاك القبول , وحقها من النقد باعتبارها تتحدث عن واقع سوداني صرف فيه , نوع من الحبكة الروائية , بدليل أن عرس الزين تحولت لفلم , يصور العادات والتقاليد السودانية ... الخ حتى أن رأي اسامة انور عكاشة قال : ( عجبتني رواية عرس الزين أكثر من موسم الهجرة في الشمال , لانها تتحدث عن واقع القرية السودانية )
يا سيدي ما مشكلة بس اعتبرنا نحن ما بنعرف نتذوق العمل الروائي ,,,, طيب قولينا فكرة رواية الجنقو شنو ؟؟ والمعالجة الرواية للشخصيات ؟ طيب الشخصية الرئيسية ود امونة مثلاً , الراوي , ألم قشي , ولا صديق الرواي وأمسك أي واحد من الشخصيات دي , وحاول تصل وراها لأبعادها كاملة , ح تكون المحصلة شنو ؟؟؟ إيمكن الشخصية الوحيدة ظاهرة المعالم , كانت في انتهازية صديق الرواي , وحول عصابة الجنقو لعمل سياسي والراوي لم تكلم مع ود أمونة بخصوص الشواذ في أوربا , ما اتفاعل من الاساس , أو حاول يبدي أي طموح , في الذهاب لي أوربا , فقام الكاتب وحل المسألة بأن ود أمونة في الآخر بقى مسئول في الدولة ( عليك الله يا حامد , قولي بس الحبكة والمعالجة الروائية هنا وين ؟؟؟!! )
وقس على ذلك
أخيراً عزيزي المشكلة ما في أن تكتب رواية المشكلة الحقيقية , ما هي فكرة الرواية ؟؟ ولماذا اكتب رواية ؟ أم هي كتابة والسلام بالمناسبة أعمال عبد العزيز كلها , في مشكلة بتاعت معالجة الحبكة الروائية
كلامي ده كلو ما نقد , ولا أنا ناقد محترف لكن قرينا روايات وبنفهم نوعاً ما ولو قليل والرواية بالجد في معالجات تشم فيها رائحة التقزز
نقطة أخيرة الكثرين كتبوا عن الجنس , وكثيرين كتبوا عن هذه النوع من المجتمعات .. مهمتك انت كروائي تقديم هذا المجتمع , بكل ابعاده , وشرح تفاصيله , باسلوب ابداعي , حتى في اختيار نوعية الكلمات المستخدمة وليس معنى أني ورائي استخدم الكلمات المبتذلة في عمل روائي عشان اشتهر أو أظهر أو تمنع الرواية
وارجع اسأل تاني في الفكرة في الرواية شنو ؟؟ هسع ؟؟ بعدين عشان ما أظلم اراجل أو أظلمك , عارف رواية رماد الماء فيها فكرة , قوية أكثر من الجنقو أنا شخصياً الفكرة عجبتني عشان أكون واضح ( فكرة تيم الوسيم , المتعلم , ارتبطت بالفتاة البرصاء التي كانت لا تقبلها القرية ) ببقى كلام ده بفسر لك البعد الاجتماعي والمعرفي للمجتمع البسيط , الكان بنظر للفتاة بألم وحسرة , ولما جاء تيم من خلفيات اخرى واختلى بها في حين الشخصية الاساسية كانت بتعاني من مشكلات خلفية اسلامية زنا , وما شابه
يا سيدي اقرا الروايتين رماد الماء , والجنقو , وقارن بي نفسك , ح تلاحظ الفرق ؟؟؟ وأخيراً ليس معنى فوز الرواية بجائزة أو منعها , أنها خارقة للعادة , ,ان انتقادها يعني مس لمجتمع المهمشين واتمنى أن يغير هلباوي , عنوان البوست لن يغير هذا في اصل موضوع شيء مع تحياتي حاتم محمد
|
|
|
|
|
|