رسمك توقيعك إبداعك؛ أعجبني؛ لكن...

عوداً إلى دوحةالشعر:

مع:

شعر عزمي أحمد خليل:


الدوام لله يا وردي
الدوام لله يا وردي
أصلو ديّه الدنيا حالها
الكبير عند الله بصغر
وعندو ما فيش استحالة
* * * * * * * *
افتقدناك إنت بينّا
يا أخو الإخوان حليلك
أصلو ما قايلين بترحل
ومننا الأيام تشيلك
والعصافير مهما غنّت
ما بتبقى في يوم مثيلك
إنت يا مبدع زمانك
يا السبقت تملّي جيلك
* * * * * * * *
الله قادر في سماهو
من يصدق يوم تموت
وحدو بس سيدنا يونس
كان غيابو في بطن حوت
وحكمة الرب في خلايقو
بس مصيرها تجي و تفوت
الله هو العارف براهو
وبس على الناس السكوت
* * * * * * * *
يا كريم يا أبو الشهامة
إنت يا ود الأصول
إنت يا الصادق في وعدك
لما بس توعد و تقول
إنت يالشامخ في عزك
وإنت يا الخاتيك قول
ما نكرت في يوم جميل
ولاحرمت في مرة زول
* * * * * * * *
الوداع يا وردي ليكا
والله يلهمنا الصبر
نعمل إيه في الدنيا بعدك
ومين يغنيلينا الشعر
العيون حزنت عليكا
والقليب عانى و فتر
والمظالم في غيابك
والألم بوراك كتر
* * * * * * * *
واشنطن
١٩/٢/٢٠١٢
--
لله درّه من مبدع
--

وما خرج من القلب
يصل إلى القلب
هكذا نذكر محاسن موتانا
رحمهم الله وأحسن الله عزانا