نعى اليم ...... سودانيز اون لاين دوت كم تحتسب الشاعر حميد

Quote: معليش انا بكتب عن طريق فرحات لاسباب عدم وجود الباسوورد ..هاجر سيداحمد......... الاستاذ بكرى .. من يعزى من؟ وبياتو كلام وياتو لغة ممكن نوصل احساسنا بهذا الفقد؟ مافى كلمة او احساس حيعبر عن حميد..مفجوعة انا كواحده من الناس الاتربو بيد حميد..شعرا وانسان..مفجوعة نورا وغبشها..مفجوع عم عبدالرحيم..الجابرية ..وكل الغبش الماعندو ليهم غير نغيم..كلمات حميد كانت مماسكانا فى كل حزن..موردنا ومرجعنا ..غلبها تماسكنا فى فقدو..كذاب البقول كلمة ولا قصيده يلخص بيها حياة انسان بحجم ماضينا وحاضرنا والمليون ميل مربع..بطول النيل وعرضو..بخصوبة ترابو وقامة نخيلو ..بجرحنا ..فقدنا والشرخ ..خبر رحيلو نزل على واكيد على كل السمعو بصمت..ودهشة مابتقدر تقول عليها حزن ولا احساس بانعدام الوزن..فقدان معنى للحياة او هى احساس بالتشتت..زى حيطة شلت طوب اساسها ولا سبحة وقطعته خيطها..احساس صعب وصفو..وحميد عارف وقال ........... زي التكنو قبل دا ما فارقنا زول بعد الرسول واللاّ التقول أول قلوب في الدنيا يغشاها القدر بعدن تضيع منّو الدروب تنطمبج الساحات حريق يدغي الطريق المحتمل كل الفريق سوقر وراك يا جرحنا الكيف يندمل ما بار وراك شهد الغنا ونحل الحناجر ما همل صادر خلايا أبو الدبر صاقر حناياه نمل .. نمل وين ماشي .. يا نبض الرحيق سايب المشاعر ريق دقيق .................... كانو بوصف فى حالنا وعجزنا ومشاعرنا البقت ريق دقيق..نشفنا من كتر الدموع و فترنا من غشيان القدر ..ياجرحنا الكيف يندمل ..وكل مانقول اخر حزن واخر فقد يطلع علينا حزن جديد وفقد جديد .. حميد يا نجم الميامين الحمش .. ينضارى شان تشرق شمش تدي الحياة .. الناس .. الحقول .. الدابة .. والطير .. والبمش ..ترحل كيف ولسة نحن قدامنا الكتير نتعلمو منك ..ترحل كيف و وآخر المطاف .. الموت بيلفح بسمة من توب الزفاف الموت بيشرق نسمة في كل الصبا يلفحنا منك او يلفحك منا ..قبل ما نقولو ده وكتو؟ اقيف شوية باقيلك "إنت" بلاك في زين ما تهشم إبريق الرضا .. خنست نسيمات السمح والبسمة زي حبة قمح لفحا وطفر طيراً كُترْ أورث عصافيرها الضنى .. يبّسْ غُناها مع الفجر هطل على الشدر الهموم .. وشاشات نهارات الهنا ........... مافى كلام ممكن نقولو اصدق من كلماتك مافى وجع ورثاء ونواح بورى احساسنا وراك ياحميد خبرك دخل زى مرقة غضب من جوف حليم فى زمن صعب.. حسيت بأني متل حجر .. جدعوهو في نص البحر .. قام البحر بنى فوقو طين......وياحميد كضب ..معروفة مامن قوة تحمى الفرح ولا الترح حين اندلاقو على القلب..ونحن مافى كلمة فى قصايدك جهزتنا لى فقدك ده ولا فى طريق ممكن نمشيهو عشان نمرق من حزننا عليك..انا ببرطم ساى وماعارفة كلامى مرتب ولا مفهوم زى احساسى الحالى ..ياحميد انا مازومة ومهزومة بفقدك ..وعاجزة عن التعبير..يكفيك انك حميد وكفى..........وداعا ياعشمنا يا روحنا وضميرنا الحى... وداعا ياتاريخ وياعشم فى باكر وياحلم غبش ...وياريتك تقيف لحظة..وتشوف الخلوق كيف محنانا..مهزومة ومتيتمة..اظنك تغير رايك وترحمنا