|
Re: علاج السرطان بحليب و بول الابل ... نقاش (Re: سيف النصر محي الدين)
|
دكتورنا سيف النصر
كيفك يا صاحب?
هههههههه دا شنو يا دكتور? "ياخي ما معقول عشان عندك كلام داير تقولوا تقوم تعمل كلامنا كوبري و تحملو ما ليس فيهز"
طلعتني زول بتاع كلام ساي يا سيف? يا حرام عليك ياخ! لا يا سيف, و الله انا لي كم يوم بعاين في البوست دا و غيره, و بهرب عديل كدة, لاني اعاني معاناة حقيقية في الكتابة بالعربي! الكمبيوتر بطئ و لازم اكتب بالماوس و الله الرد الكتبتو انا فوق دا لو قلت ليك اخد مني ساعة صدق! عشان كدة ما جابني الكلام بس, لكن شفت انه مهم الزول يساهم في الموضوع بما توفر لي من معلومات و
انت قلت يا سيف:"أساسا ما هورمون، و الدواء الذي أشرت ليهو في مداخلتك هو هورمون ليس إلا" بتذكر زمان مرة قريت يمكن لفردريك انجلز انه كلمة "ليس الا" دي فيها اجحاف شديد لما تتقال, و هسع حسيت انك ظلمت الهرمونات و الانزيمات ظلم الحسن و الحسين. يا سيف, ياخ الهرمونات و الانزيمات دي -زي ما انت عارف- هي اهم شئ في كل العمليات الحيوية في جسم الكائن الحي و اغلب الامراض و العلل بخلاف الامراض الجرثومية-وهي نفسها في الحقيقة- تحدث لخلل في عمل هرمونات او انزيمات في الجسم يا اما بالزيادة او النقصان. عشان كدة يا سيف, انا قلت, انه مكن يكون بول الابل و البانها تحتوي على هرمونات او انزيمات تؤثر في بعض الامراض, و حقيقة علاج الامراض بالهرمونات او الانزيمات او المركبات الحيوية الاخرى, معروفة ليك كطبيب, اكثر مني انا التربال دا. عشان كدة انا بديت في مداخلتي اعلاه بتثبيت الامكانية. و ضربت امثلة تشير في نفس الاتجاه, لكني لم اقل ان التجربة او التجارب التي اجريت صحيحة, او لا, لاني لم اطلع عليها, و اي محاولة مني لقول انها كانت صحيحة, او اشكك في صحتها, دون الاطلاع عليها, علميا مرفوضة. ولا كيف? يا سيف طول فترة التجربة العلمية, او قصرها, ليس معيارا في اثبات صدقيتها او الشك فيها. تتذكر لما نيوتن شاف التفاحة وهي تسقط من الشجرة ? كم تحسب من الزمن مر ليلاحظ نيوتن الواقعة? ثانية, اثنين, خمسة ثوان كاملة? يعني الملاحظة لا تستغرق زمنا طويلا في المنهج العلمي, فنحن قد نلاحظ الاشياء في وقت وجيز جدا, لكن لنصنع علما و معرفة من تلك الملاحظة, يتطلب اجراء تجارب صارمة, و حسب منهج يعرف الان -كما تعرف- بالمنهج العلمي, و الذي يعقب الملاحظة بتكوين تفسير او تفاسير مختلفة للظاهرة, ثم بعد ذلك تجرى التجارب, و تنشر, و يعاد تجريبها من عدة باحثين اخرين لاثبات صحتها او عدمه, نحنا في موضوع بول الابل في طور الملاحظة. و ممكن تكون الملاحظة دي تكون مستمرة لعدة قرون و لم ينتبه احد لها, او يتعب نفسه لدراستها. الزول القال انه تجربته نجحت في كم و عشرين يوم, قد يكون صادق, او بالغ و لم يكن دقيق في تفسير النتائج . لكن ذلك لا ينفي عن بول الابل خصائص علاجية محتملة فيه, الا اذا قام علماء و باحثون باجراء تجارب على مادة البول, و التثبت او نفي ادعاءات الباحث الذي ادعى ذلك. و دي كانت نقطتي انا. يعني, انا بس قلت, اني ما حا اشكك او اصدق, الا لما تخضع الملاحظة او فرضية انه بول الابل له خصائص علاجية, الا بعد ان يتم بحث الموضوع. و بذلك انا اترك الباب مفتوح لعلماء او باحثين مهتمين بالموضوع للاهتمام به ودراسته بدلا عن ان اشكك في الامر و اثبط الههم . تتذكر يا سيف قصة الاكساندر فهمنج? الزول دا كان بزرع عينات من البكتريا, ووقعت نقطة من مخاته في الوعاء مع البكتريا- لو كنت انا و لا اخرين كنت جدعت الاناء او غسلته و اعدت التزريع- لكنه احتفظ بالاناء و بعد فترة لاحظ انه البكتريا التي كان من المفترض ان تنمو في مكان نقطة المخاتة لم تنمو, و ادى ذلك لاكتشاف المضادات الحيوية, مش? يعني كلامي دا كله, اننا نفتح اذهاننا للدهشة. و ممكن يكون دا هو السبيل الوحيد للتخلص من التبعية الذهنية و الفكرية التي تكبلنا! الكنترول, و التجارب, طبعا بتجي بعد اثبات امكانية ان هناك فعالية. و ذلك ممكن يكون في فترة قصيرة او طويلة حسب الحالة, و ما تنسى ان الصدف ممكن تلعب دور كبير في الاكتشافات العلمية.
"اجابتك على هذا السؤال تحدد إذا ما كنت جادي في المشاركة في هذا البوست أم انك جاي تتونس مع احمد صالح عن مالي "
يعني هسع يا سيف ياخ ما ممكن اجي اتونس مع احمد عن مالي و اكون جادي في نفس الوقت? ياخ بطل استالينية ياخ, ههههههههه انا عرفت انك جيت بلدنا دي و حا تتفاجأ كتير لما تلقى ان اكثر الناس جدية هم اكثرهم مرحا فوصية الامركان دايما انك have fun في كل امرك! فنحن هنا مفروض برضو نناقش بجدية, و نستمتع في نفس الوقت! واخرتها كوم تراب have fun!
---
(عدل بواسطة بدر الدين احمد موسى on 03-06-2012, 06:28 AM)
|
|
|
|
|
|