|
Re: نقد / حوش بنات السُرَة (ود العمدة )- للزميلة الاديبة سناء جعفر (Re: سمرية)
|
ونقد آخر
بالنسبة لتعليقي فهو من ٤ نقاط. الأولي تتعلق بالعنوان. جرت العادة علي نسبة الحوش لصاحبه من الرجال. يعني في رأيي العنوان الأنسب للبيئة البتعبّر عنها الرواية هو "بنات حوش ود العمدة"
النقطة التانية خاصة بشخصيات الرواية وعلاقاتها الإجتماعيّة ببعضها. أقترح إنشاء قائمة تبين العلاقة بين كل الشخصيّات الظهرت حتّي الآن. في العادة ما بحب الحركة دي ولمّا ألقاها في بداية رواية بتخطّاها وأبتدي القراءة مباشرة. لكن أعتقد إنها ضروريّة في روايتك لتعدد الشخصيّات المحوريّة وتشعب علاقاتها ببعضها من ناحية، ولطبيعة السرد غير المتواصل،. شخصيّاً تاهت منّي شخصيّات في السرد ونسيت علاقتها ببعضها، ويمكن في ناس تانية زيي برضو
تالت نقطة حتتضح أكتر لو إتعملت القائمة المقترحة. وهي تتعلق بالتوازن بين الشخصيّات النسائيّة والرجاليّة. طبعاً واضح من العنوان إنّو الأبطال الرئيسيين للرواية من النساء. لكن في سبيل ده بنلقي إنو أغلب الأسر البتظهر في الرواية مشكّلة من النساء بصورة قد لا تكون طبيعيّة. إضافة بعض الشخصيّات الرجالية ومنحها أدوار أكبر حيصب في مصلحة الشخصيات النسائيّة المحوريّة
آخر ملاحظة تتعلق بالمآسي البتعيشها الشخصيّات الأساسيّة للرواية. أتفق معاك إنّو الحياة مليانة بالمصائب؛ لكن ما لدرجة إنّو ما تكون في شخصيّة واحدة سعيدة بحياتها أو تعيشها بصورة طبيعيّة. صح المال ما بالضرورة يجيب لصاحبه السعادة، لكن برضو ما بالضرورة يكون أصحابه نماذج للتعاسة. إضافة بعض الطبيعية لحياة شخصياتك حيزيد من واقعيّة الرواية.
أخيراً، ده رأيي الممكن الناس تتفق أو تختلف عليهو. وفي النهاية كل زول عنده وجهة نظره الخاصة. لكن الأكيد إنّو الملاحظات القلتها دي ما بتقلّل من إعجابي بالرواية وكم الإبداع الفيها
خالد عثمان جعفر
|
|
|
|
|
|