الأخ الحبيب المبدع حمّور زيادة... بالمناسبة مبدع دي تحديداً من يوم ما كتب صديقي الضخم جداً والمبدع مظفر حيدر إبراهيم (كباروس)-صاحب فكرة حلم إستضافة كأس العالم في السودان عام 2026 في السودان- ومؤسس أحد المواقع السودانية الأولى والمهمة http://kabaros.com/ وصديقي الذي بحثت عنه عبر الإنترنت...حتى وصلت لمكانه في جامعة عين شمس، كلية علوم الحاسبات عام 2001 وأصبحنا أصدقاء منذ ذلك الحين OFF AND ONLINE منذ أن كتب مستهجناً هنا في سودانيزأونلاين ببوسته المهيب: الإبداع السوداني يكسب ... إحصائية بقيت منذ ذلك الحين يا حمّور براجع نفسي أكتر من مرة قبل ما أصرف لزول كلمة مبدع دي...لأنها مجانية شديد بيننا كسودانيين للدرجة الأنو في زول كان كاتب في بطاقة تعريف نفسو...مكان الوظيفة (مبدع)...وليهو الحق بالطبع، لكن كما تعلم لا توجد وظيفة أسمها مبدع على الأقل في قاموسنا السوداني!
المهم...قلت يا عزيزي
Quote: شكرا للصبر لكن يلا عشان أكرهك
إن شاء الله ما تكرهني...إن شاء الله ينتج الحوار بيننا وعياً...فأنا على الأقل-وأظنك أيضاً- لا أكتب من باب كسب النقاط أمام محاوري بل أحب جداً الإستفادة منه و"سرقة" المعلومات إن لم يكن ليتبرع بها طائعاً مختاراً!
نواصل...
Quote: هل المشكلة انو الكاتب مصري بينما هناك من قالوا نفس هذا الكلام بصورة أدق و افضل من السودانيين ؟ لو كان ذلك كذلك فوين المشكلة ؟ انا نقلت ما وقفت عليه يا عزيزي. و والله لو اعرف زول تاني قال كان جبتو. بس ده آخر مقال بيتكلم عن الموضوع ده لاقاني في الجريدة بالصدفة و كان بالي مشغول بأمر المداخلات الغريبة فنقلتو ليك.
أيوة المشكلة أنو الكاتب مصري بينما هناك من قالوا نفس هذا الكلام بصورة أدق و افضل من السودانيين...ومن مصائبنا كسودانيين هي الكسل الذهني والبدني بعض الأحيان...أسع عندك الحاجة في بيتك...تمشي تكوس ليها عند الجيران؟
علماً بأنو مافي زول من الجيران ديل -عادة- بيعمل عمليتك دي عشان يستشهد ليهو بكاتب سوداني، والكلام ده معروف في الدوائر الثقافية هناك... ولأنو الآن في مفهوم ال National Brand أو Country Image والتي على سبيل المثال تتيح لفاروق حسني أنو يترشح ليكون أمين عام اليونسكو...إستناداً على إنتاج كتّاب بلدو ومثقفيها ...فلا يمكن أن يستشهد مبدع مصري بآخر سوداني....لو ما عارف الكلام ده...أعرفو أسع يا صديقي...
ولمن أقول ليك مبدع...قاصد الكلام ده...ولمن أقول ليك ممكن تودينا في داهية...برضو قاصد الكلام ده يا صديقي...لأنو ما أتيت به من خلاصة...وبعد ذلك تبرير لها...مرفوض وبشدة يا صديقي...
ثانياً:
Quote: أم ان المشكلة انو الكاتب في جنسيتو زتو مصري و ليه انا بقرا لمصري و احتفي بيو ؟ ( و دا الفهمتو من مداخلتم البتتكلم عن الهندي و حاجات العرس ) طيب لو هندي برضو كانت حتكون مشكلة وله تحديدا عشان مصري ؟
الإجابة هي : تحديداً عشان مصري ولأنك أنتا شخصياً يا حمّور مسئول من ملف ثقافي في صحيفة سودانية رائدة...واشياء أخرى تحدثت عنها سابقاً في المداخلات... لو هندي...كما أسلفت...الهند هي عمق سوداني خالص...وأي زول في الشارع السوداني رغم إختلاف اللغة...بتلقاهو بحضر أفلام هندية وخلافو...صحيح؟
ولأنو مصر تحديداً ما عندها المخزون الحضاري لأن تكون رائدة في مجال مثل الإنترنت(أفرّق هنا ما بين المصريين ومصر الدولة القائمة حالياً) وكل ما يفعله الكتاب هناك، عبارة عن تكرار لما حدث في الأسافير صاحبة الريادة الحقيقية في أمريكا وأوروبا والهند واليابان وكوريا والخ...يبقى أنتا لو داير تنقل...أنقل من أصحاب التجربة...وبصفتك مبدع عليك أن تجتهد في الترجمة -كما أجتهد الكاتب المصري- وبالنسبة للتعبير...فلا أظنه ينقصك! شفتا كيف يا صديقي خايفك تودينا في داهية؟
Quote: انا في القاهرة و من الطبيعي انو الجرايد البقراها كل يوم هي الجرايد المصرية لأنو (تخّيل ) مصر تصدر فيها جرايد مصرية.
طبعاً منطقك هنا يا حمّور ما جميل بكل أسف...لأنو أنا قاعد في كوريا حالياً...وبقرا الجرايد الكورية وبنقل منها الحاجة "الاصلية" من كوريا نفسها... لكن لو الكوريين ناقلين من الأمريكان مثلاً...بمشي أشوف أصل البحث وين..ومال دورنا كمتعلمين ومثقفين وطنيين شنو في النقل؟! هل نصبح ببغاوت يا صديقي تحتاج لوسيط لينقل لها أو يترجم لها؟ طيب ليه أنا القاعد في كوريا ده...جبتا ليك من إرشيف المنبر العام (السوداني) رابط يوضح الأمر ده؟ الفرق وين بالضبط؟
الكلام ده خطير للغاية يا حمّور...لأنو لو في إحصائية عن الصحف البتصدر في الخرطوم، وقالوا لينا كم بالضبط من الجرايد البتصدر هناك... بتكتب عن قضايا فلسطين والعراق وأفغانستان في مقابل تجاهل قضايانا الوطنية بنفس الهمّة والحماس (شبح المجاعة والفساد والخ)... يمكن أن نقول بملئ الفم...السودان بتصدر فيهو صحف "ليست سودانية"...! ويستمر الزميل حمور زيادة في ابداعه ,, حمور مشرفا علي ال...ة الاخبار,, تهانينا
يبقى الصحف من جانب...وأنتا ككاتب صحفي من جانب آخر يا حمّور...شفتا كيف خايفك تودينا في داهية؟!
Quote: لو كنت انا تكلمت عن انو القراءة و الحكمة تؤخذ من المصريين كان يكون ليك حق تزعل و تناقش .. لكن غير كده يظهر الأمر كأنها فوبيا المصريين .. الفريق المصري ما بنشجعو .. الكاتب المصري ما بنقرا ليو و لا نستشهد بيو ..ليه بس يا انور ؟
حمّور يا صديقي...أنا ما حا أديك فرصة من الاساس تقول الكلام الفوق ده...الحكمة تؤخذ ولا غيرو...لأنو عارفك ، بس حبيت أوريك وأؤكد ليك وأتأكد منك...الكلام ده مهم جداً يا عزيزي...
لكن على ذكر فوبيا المصرييين...ألا ترى معي أنو الفوبيا نفسها ليست مرض في هذه الحالة؟
فمصر تحتل جزء من أرضنا يا عزيزي...ولو تابعتا كتابات العم شوقي بدري كويس، حا تعرف أي دور يقوم به الساسة هناك! وعشان ما دايرين سيناريو المبدع والمخرج السوداني سعيد حامد يلوح في الأفق كما هو الحال هنا: بتكلم معاك يا حمّور...رغم إختلاف الفوارق الكثيرة جداً...لكن برضو الزول ده مبدع سوداني فعلاً زيو زيك في الإبداع مع إختلاف المجال... لكنه غير واعي بما فعله...موش كدة؟
موش؟
نواصل...قلت:
Quote: نرجع لموضوع النت و الورق .. هل انا اشرت من قريب او بعيد اني ضد المدونات و التوثيق الاسفيري ؟ لا أظن. و لو كنت انت فهمت هذا من كلمة ملغزة مني فأنا اعتذر لك. انا لست ضدها. لكني فقط احب الورق أكثر. نفس الكتاب الذي اقرأه PDF احرص و استمتع بقراءته مطبوعا.
Quote: سلامات مجدداً يا حمّور ويبدو أن بيننا الكثير من العمل يا صديقي... كتبت: Quote: و قد حاولت أن استقرئ على عجل أعداد مجلة الفجر الكاملة التي امتلكها في مكتبتي ( منذ العدد الأول للفجر بتاريخ 3يونيو 1934 في عهد عرفات محمد عبد الله حتى 6 اغسطس 1939 في عهد احمد يوسف هاشم )
وهذا مشروع توثيقي مهم ينتظر منا القليل من الجهد لجعله متاحاً أونلاين... أنا جاهز له....مسح ضوئي لجميع أعداد المجلة وعمل موقع توثيقي يستفيد منه الجميع ولا يظل حبيساً لمكتبتك هذه... أعتقد أن بدرالدين في وزارة الثقافة يمكن أن يكون له دور أيضاً...واذا ما تقاعس، ف سيبك منو، متعودين من الكيزان التقاعس (حدرة سريعة في الضلمة للكيزان)... المهم...متى نبدأ؟
أنور
أنتا قايلني بهظر ولا شنو؟ لا والله يا أخوي...قاصد كل كلمة قلتها هناك...وأجدد لك العهد بذلك يا حمّور يا أخوي... لأنو الكتاب البتقرأو ك PDF ...في زول محدد قام أجتهد وعمل ليهو مسح ضوئي Scanning ووضعه في الإنترنت...ومال الكتب بتتوفر كيف لو ما أجتهدنا فيها؟ مرة واحدة والى الأبد...موش كدة؟ وكمان عشان أكون عملي وبيان بالعمل يا صديقي...ده كتاب كامل وضعته بنفسي على الإنترنت قبل أعوام: كتاب في بوست: الأدب الشعبى في السودان لمن لقيتو مهمل في شقة أحد الأصدقاء في القاهرة...مشيت أعدتا طباعتو ووضعتو على موقعي قبل أعوام...شفتا كيف؟
نواصل... قلت:
Quote: و لعلمك يا أنور انا لا ابحث في جوجل اولا كما تفضلت .. أنا ألجأ عادة الى مكتبتي للبحث ثم استزيد من جوجل إن أردت. لكن البداية دوما هي الكتاب الورقي بالنسبة لي. أنا لا أكن للوالد العزيز جوجل أي عداوة .. لكني فقط (نفسيا ) أرى أن للكتاب عليه درجة. و لا أظن هذا الأمر يغضب جوجل أو يغضب محبيه.
أنا داير أعرف الفرق بينك الآن يا حمّور كشخص درس وتخصص الكمبيوتر ومبدع لديه مهارات متنوعة ما شاء الله يمكن أن ينفع بها مجموعة ضخمة من الناس عبر الإنترنت...وبين "أي زول ساي" لا يستطيع إنتاج معرفة سودانية ويضعها عبر الإنترنت أو يعرف كيف يصل إليها... إذا كان الأمر مرتبط ب (نفسياً)؟! هل هناك فرق؟ نفسياً دي يا حمّور يا صديقي لا تناسب ما نحن فيه من تدهّور على كل الأصعدة...لابد من أن نعمل بكل ما لدينا من طاقات من أجل وضع لبنات يستفيد منها الأجيال المختلفة للسودانيين...خصوصاً وأنو الأجيال القادمة حا يكون الإنترنت جزء أصيل من حياتها وشايفين الحاصل الآن... فما بالك ببعدين؟
عفواً يا حمّور ...أنا لا أريد محاكمتك ولا القسوة عليك يا صديقي...بل أريد أن نتفق ونتوافق على هذا الفهم من الآن...وكل زول يكون مطئمن أنو عندو "ضهر" ساندو يا أخوي...لأنو القصة موت أو حياة مع العولمة دي يا أخوي...
أخيراً وليس آخراً...قرأت بوستك هذا قبل أيام : أخيرا مصر تسأل : لماذا يكرهوننا ؟ وتداخلت فيه بسرعة... وضحكت بيني وبين نفسي...لأنك تواجه الآن "طبقة" مصرية...وأتمنى أن تتاح لك الفرصة لتعرف جميع "الطبقات" في مصر...
لأنو بغير كدة يا صديقي...حا تكون شايف مصر أخرى وأمصار أخرى...ويمكن أن أعود لهذه النقطة تحديداً لاحقاً... أزعم أنني أعرف عن مصر والمصريين الكثير...الكثير ...الكثير...!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
AnwarKing
فيس بوك
تويتر
انستقرام
يوتيوب
بنتيريست