الجعلي ود العمارات، يعود بنا خمس سنوات الى الوراء!!! أركز للبطان بالمدافع!

Quote: سؤالي المحدّد يا أنور (وأشكرك مقدما لو حاولت تجاوبه مرّة تاني ) ما دخل عمارات أشرف في الموضوع؟؟ إذا كان اشرف من شندي مثلا.. هل كانت بتفرق؟

العزيزة نجوان،
تحياتي مجدداً ...

أشرف يعيش في حي العمارات في الخرطوم.... وهو حي يقطنه السودانيين من كل المشارب ومختلف الإتجاهات....فمن أين له بهذه القبلية؟

أشرف درس في مدرسة الإتحاد (Unity) في الخرطوم.... وهي مدرسة يدخلها المرطبين من سكان الخرطوم من كل المشارب ومختلف الإتجاهات....فمن أين له بهذه القبلية؟

هذا هو مصدر إنزعاجي يا نجوان...فأنا على سبيل المثال ...نشأت في ديم الشاطئ بورسودان...وأعتقد أن أهل هذا الحي هم أهلي...ولم ألتفت يوماً ما
لجنسياتهم أو الجهات التي أتوا منها...بقدر ما نشأنا على أن الجميع أهل...

هذا ما كان وما سيكون مصدر إنزعاجي...

اذا كان أشرف -موش من شندي- اذا كان أشرف موش متعلم...كان بتفرق...فالجاهل يمكن أن يدعو بدعوى الجاهلية العنصرية أو القبلية...وبرضو في الحالة دي مسئولية الجميع أن يوقفوا عند حدوا....المصيبة أنو أشرف متعلم...وبعمل في ماجستير كمان!....والأدهى والأمرّ...أنه صحفي!!!

----
تنط جوز في أخوك وود عمك...أفضل من أن تدخل معه (ظالماً) في شكله مع الجيران!

أرجو أن أكون أوضحت يا سيدتي...
وجاهز دائماً وابداً لعكلتك...

بالمناسبة قرأت فرضياتك الفوق دي...ولأنها غير صحيحة ما حبيت أكرر الكلام...فالسودانيين في الخارج والداخل...سواء -ده على المستوى النظري والأمنيات طبعاً- لكن لما تجي لناس الشهادة العربية مثلاً...حا تعرفي أنو السودانيين أكوام!

قريبات دي...واحد معلّق تحت فيديو في اليوتيوب، بقول لي: أنتا لو راجل ما تجي تقول كلامك ده هنا (يقصد في السودان يعني)!
فقلت في نفسي: سبحان الله، مجرد وجود الناس في السودان ، يصبحوا أكثر رجالةً...الله ينعلك يا حكومة الإنقاذ...فعلاً الناس الصابره دي...رجال ونساء...كلهم رجال!

واحد تاني بقول لي: أنتو قاعدين برة وضاربين الترطيبة دي...وقروش المنظمات!

واحد تالت مرسل لي بريد بقول لي: ياخي دينا طالع هنا...شوفو لينا طريقة مخارجة...!

ويعني حاجات كتيرة...نصها في العمارات...ونصها في أمبدة...والله يستر!

لو ما رديت على سؤالك...برضو مستعد نعيد الكرة تاني

مع خالص محبتي وتقديري
أنور