|
|
 Re: نتوه في سكة رواحة ونفوت من واحة لي واحة (Re: DEEK_ALJIN)
|
ست الدار ( بقيه ) 0
داك الحين المصنع هاج
جات عربات اللات بوليس .. فضو العالم بالكرباج
والبمبان الامريكانى
شرقت شمس اليوم التانى
كنا حداشر ونوباويه
متهمننا بالتخريب والتحريض والشيوعيه
البوليس صاقع شيوعيه . شيوعيه
وفاكر نفسو بنبذ فينا
هى آ بوليس امك مسكينه
البوليس عمدنى شيوعى .. والتحقيق طلعنى مدان
التحقيق طبعا تحقيقهم او تحقيق الامريكان
اسبوعين عديتن جوه
اسبوعين زادننا قوه
ست الدار ماتشفقى خالص
ست الدار انا يانى الزين ..ست الدار سامعانى كويس ؟
كل الهم مايغشى الغم بيتنا وراشد والتومات
وكل الناس الحالهم شاهد
ست الدار الشوق الواحد ..لى حلتنا وليكم .. ليكم
وللاشراقه فى عينيكم
وكل الناس الزولهم صامد ..شوق وسلام
الزين ود حامد
ردى سريع ..باليد ..باليد
فى دورين موعود بى شغله
لمت لمت .. كان مالمت انا جايكم وماندمان
بعد الحاصل والاتحصل ست الدار بت احمد تكتب:0
زينى الزين .. اب حالا زين
جانى جوابك يا المبروك
وسابنى اشوف الدنيا كويس
واعرف غلط الصاح مظبوط
سابنى اميز ..واقدرافرز .. وارجع اميز
فرحانابك يا احزان ..فرح النار بى لوح الزان
مبسوطابك يا المبسوط
ماهزانى مصيرك ..قدر ماازونى الميتين عامل
ميتين عامل فى فد مره
ميتين اسره تروح وين ؟
فى الايام النجسه المره
ميتين عامل؟
والله مهازل .. والله عمايل
يا اوغاد .. وينا نقابة السجم الشوم
وين عمال السكه رماد ؟ وين الطلبه .. وين الوين ؟
بعتو شفيعكم يا عمال ..بعيو وجيعكم لى الراس مال
وشن راجين يا تعسا الحال ؟
هاكم دى ......0
والله مهازل .. ميتين عامل "؟
والله عمايل
عامل ساكن فى اخر الدنيا .. وصل المصنع باخر فونيه
ينتج كيف .. شغال بى فونيا ؟
عامل ينتج عشرين حته
تلحقو منها قيمة اتنين
سته بغطو المنصرفات .. سبعه تمانيه ..ادها تسعه المنصرفات
كل الفايض بيدخل وين ؟
قولو البيفضل بيمشى لى مين ؟
وبرضو خساير ؟
والله مهازل
يا مضغوط .. خفض ميزك حبة تين ..تنك القعده تلاته خطوط ..
خفف مرتك توب مضغوط ..من التمسحبو كبابى الصينى
خفض عمرك يا بن الفانيه ..وبى نضارتك واجه ثانيه عيون الشغالين
والله مهازل .. ميتين عامل ؟
ميتين بيت ؟ .. ميتين اسره بلا راس خيت ؟
ميتين اسره ملوها جراح
ميتين اسره ح تولد صاح
وليكم يوم يا اولاد الهرمه
ليه يا الزين بتوصى عليا
وانا بت احمد ست الدار
ام اولادك وهم صغار .. ثم اولادك وهم كبار
وياك الزين ود حامد داك
كان متوظف يا كا الزين ..كان متوقف يا كا الزين
ليش الخدرى توصى عليا
اسبوعين قضيتن جوه .. يبقى غصب زادنك قوه
ليش ياالزين بتوصى عليا ..ليش ياالدخرى توصى عليا
وعارف ام راشد والتومات .. مرتا دغرى وغلباويه
آه يا الزين لو كنت معاكم .. كنت بقيت النوباويه
ماتهتم يالزين بالحاصل
واصل سعيك .. واصل واصل .. واصل سيرك
كان ماكنت الزين ود حامد كان ح يكونك واحد غيرك
فى فضا فالك يا انسان .. نسمه تقولكفى الامكان .. ابدع واحسن مما كان
ياتو مطرتا سوت شو.. فرقو غيما المريكان
يلتو رصاص ماعقبو خلاص ..ياتو سجن يا الزين ود حامد .. ياتو محن تمحى الاحساس
لما يكون فى الساس والراس
ياتو وطن يا الزين ود حامد
ياتو زمن دام للانجاس
طه ترابلتو راحو الجيش
غزا بكانا اتنين رطانا
صاقع كلو من اسماعين
هو الفسرلهن الشغلانه
ويا اسماعين
ما كان الديش شق مسامعك بالجبخانه ..لو المجلس قبل اوراقك ..
او فى الثانوى لقيتلك خانه
لكن قدرك يا انسان ..بلدا هاص هيصه جبانه
طالو الناس التريانين ..ضلو الله الما ضلانا
اخدو نورة الحاج بالدق .. باكر دور ماخش عليها
خاتى اللوم قطع التمرات الفوق راس بيتو
الخلفا شكوه ومالقو حق
المحجوب اتلقى اخبارك وقال جايك فى اول بص
البرسيم طهرنا البارح ..نعجة راشد صبحت والده
الحيضان سقناهن لوبى .. التومات طيبات ونصاح
راشد طيب . وانا طيبين
كل الناس آ الزين طيبين
ينشدو منك فى الافراح.. وفى الاتراح .. الزين الزين
ماتشغل بالك
بس يا الزين كان درت مشورتى .. اصلو كتالك يا هو كتالك
تجى مندلى
الواطه تراها
وبى جاى جاى بندبر حالك
ما الحيكومه الضاقت دمك .. عينا محل قبلت قبالك
شورتك عندك ..والببقالك .. اليبقالك
التمرا بعناها آ الزين
خفنا السوس ونزالة السوق
مبعوتالك عشره جنيه
والاشواق من هنا لا عندك
تلغرافات :0
نورى .. السوق .. ست الدار بت احمد جاير
المحجوب فى قطر اليوم
عفش الزين
النوباويه
الخرطوم .. الخرطوم بحرى ..كشك الشعله .. الزين ود حامد
راشد راقد .. والواطه جعفر طالق فيها بهايمو
ست الدار بت احمد جابر
نورى السوق .. المحجوب ود احمد جابر
كتب الزين كل الاوراق .. راشد كيف ..
النوباويه
الخرطوم .. الخرطوم بحرى .. كشك الشعله
النوباويه
انا فى السكه وست الدار
راشد ود الزين ود حامد
ولكم الود
ديك الجن
|
|
 
|
|
|
|
|
| العنوان |
الكاتب |
Date |
| تلغرافات .. محمد الحسن سالم ( حميد) 0 | DEEK_ALJIN | 04-22-02, 06:47 PM |
| تلغرافات .. محمد الحسن سالم ( حميد) 0 | cola | 04-22-02, 06:56 PM |
| Re: تلغرافات .. محمد الحسن سالم ( حميد) 0 | DEEK_ALJIN | 04-22-02, 07:10 PM |
 nice deek algin | Halema2 | 04-22-02, 07:17 PM |
| Re: nice deek algin | bamseka | 04-22-02, 07:30 PM |
| Re: nice deek algin | Elkhawad | 04-23-02, 00:10 AM |
| سلامات يا زول يا رائع | sunrisess123 | 04-23-02, 05:50 AM |
| سحر الكلام ـ الشاعر السوداني محمد الحسن سالم: الشاعر والجمال خلقا من طينة واحدة | بكرى ابوبكر | 04-23-02, 06:06 AM |
 حميد الرائع | Halema2 | 04-23-02, 08:41 AM |
| Elkhawad | Ahlalawad | 04-23-02, 08:56 AM |
| Re: Elkhawad | bunbun | 04-23-02, 09:07 AM |
| Re: Elkhawad | DEEK_ALJIN | 04-23-02, 12:24 PM |
| Re: Elkhawad | MXB6N | 04-23-02, 05:39 PM |
| Re: Elkhawad | DEEK_ALJIN | 04-24-02, 07:59 AM |
| Re: Elkhawad | sama7 | 04-24-02, 09:34 AM |
| نتوه في سكة رواحة ونفوت من واحة لي واحة | Habib_bldo | 04-24-02, 06:12 PM |
| Re: نتوه في سكة رواحة ونفوت من واحة لي واحة | wa7shny | 04-25-02, 00:07 AM |
| Re: نتوه في سكة رواحة ونفوت من واحة لي واحة | DEEK_ALJIN | 04-25-02, 10:32 AM |
| Re: نتوه في سكة رواحة ونفوت من واحة لي واحة | DEEK_ALJIN | 04-26-02, 05:11 PM |
|
| |
فيس بوك
تويتر
انستقرام
يوتيوب
بنتيريست