|
|
 Re: الراجل اللي واقف ورا الفاتنة "بيلي جين" (Re: Adil Al Badawi)
|
هذا من ناحية، ومن ناحية أخرى فإن أغنية "بيلي جين" هي إحدى أغنيتين يعالج فيهما مايكل جاكسون موضوع الـgroupies (قوقلها وتوكّل ياخي القروبيز دي). وفيما اجتازت الأغنية الأخرى؛ أعني أغنية "ديرتي دايانا"، اختباراً في اللباقة حين عرض مايكل على الليدي ديانا أن يغيّر اسم الأغنية تقديراً لها فاختارت الأميرة الراحلة أن تبقى الأغنية على اسمها تقديراً لها (و"لها" الثانية تعود للأغنية، طبعاً)؛ أقول فيما اجتازت "ديرتي دايانا" ذاك الاختبار، تعرّضت "بيلي جين" لابتلاءات عدة وإن كانت قد خرجت (لكم)، من تلك الابتلاءات، مصقولةً كما ترون وكما تسمعون.
إن تغاضينا عن تأويلات موضوع الأغنية وعن الدعوى التي رفعتها احداهن تزعم فيها أنّها هي "بيلي جين" شخصياً وما تبع ذلك من تداعيات؛ لما خلصنا إلاّ إلى أنّ مصدر أعتى ابتلاءات "بيلي جين" هو أقرب الأقربين لها: منتجها! غايتو كوينسي اتعابط معانا جنس عباطة في الغنية دي! أول حاجة اتلايق فيها كانت اسم الغُنية؛ قال كان تسمّوها Not My Lover بدل الغلاغل الراجيانا من نوع إنتو قصدتو "بيلي جين كينق" وفعلتو فلانة وتركتو علاّنة! مع إنّو كوينسي (وأي زول) سامع وفايت أضانو بي غادي إنّو " يلي جين كينق" أصلاً في وادي، والقصص دي في وادي تاني خالص. المهم يا زول، ما صدّقنا اتفكينا من قصة الاسم قام شبط لينا في موضوع المقدّمة، نظام طويلة وما طويلة يعني؛ ونِقْ نِقْ نِقْ نِقْ نِقْ، نِقْ نِقْ نِقْ نِقْ نِقْ لامِن مايكل زِهِج منّو وهرشو ليك الهرشة البِصّح: كيو كيو كيوووو! كوينسي إنتَ الله ما ليك! يا بشر المقدّمة دي ياها الفرصة المرقنا بيها من الروب القعدنا نهز فيهو تزعة وتزعين* مرّة دا؛ ياخي هي كلّها تزعة وعشرين ثانية أقصّها ليك كيف أنا! أشحتفها أسويها جِضْبة يعني وألاّ فهمك شنو! ياخي دي بشتنة شنو دي!
أصلاً كوينسي كديستو قايمة على الغُنية دي من يومها؛ ياخي البيز لاين البديع دا كوينسي اتغابى فيهو العرفة عديل كدا والطامة الكبرى كانت يوم رماها لينا رَبْ كِدا وقال الغُنية كلّها على بعضها ضعيفة وما بترقى نضمّنها بألبوم "ثريلر"؛ غايتو اليوم داك مايكل لِزم الصبُر ساكت وباقي لي كان ما زعزع غيظو بالانكراشة أظنّو كان قام عليهو خنقو. مايكل قال الغُنية دي من وأنا بكتب فيها حسيت بيها حاجة كدا؛ قال كنت متأكّد إنّها حا تنجح نجاح منقطع النظير وقد كان. عشان كِدا لمّا مايكل جاء قال إنّو الديمو (النسخة التجريبية من الغُنية) ما ناقصها شيتاً كتير من النسخة النهائية وقام طلب الشراكة في حقوق انتاج الغُنية وكوينسي قال ليهو (بكلّ مساخة): ولا تعريفة! قلنا خلاص الليلة الشمطة قامت؛ بَسْ مايكل قال خلّوهو...خلّوهو. صحيح الشباب ديل قعدوا كم يوم كِدا سلام الله دا ما بيناتم لكين مايكل حريف؛ كان عارف الغُنية دي حا ترفع مبيعات "ثريلر" وترقّد ليهو الشرتيت رُز بَسْ السؤال الصعب كان: الدرب البمرقها من جُحُر كديسة كوينسي دي وينو!
بقينا في ضيقة ما يعلم بيها إلاّ الله إلاّ ربّك رب الخير يوم جاب لينا كوينسي أكان ناسي كديستو في البيت وألاّ أكان مشاكلها ما بعرفو؛ اليوم داك تقول سخّروه لـ"بيلي جين" دي براااها...الزول دا لكلك في الغُنية دي جِنِس لكلكة! أهمّ لكلكاتو كانت طلبو من بروس سويديان (الزول العمل الميكس للأغنية) إنّو يبتدع للغُنية صوت طبول مافي زول سمعو قبل كِدا ويطلع ينزل ينطّط بَسْ يخلق ليها "شخصية صوتية" كمان. أها ومن هناك ممكن تقول "الثورةُ انطلقت" رغماً عن ابتلاءات سلاّخية هنا وهناك زي صوت صولو الجيتار الحلف ستين يمين ما يطلع زي ما عملوهو للديمو في بيت مايكل، الخترة مايكل قال هو ذاتو العملناهو للديمو دا مالو، عيبوهو لَـيْ. لمّا جينا للبيز لاين، لويس (جونسون) ما خلاّ جيتار عندو ما عزف عليهو الجزء الخاص بيهو؛ في الآخر مايكل اختار بيز من نوع ياماها، ... عكلتة ساي هي!
يتبع...
* بروس سويديان (مهندس الميكس) في العادة الغُنية البتقول أنا أنا بعمل ليها الميكس مرّة واحدة ما بزيدها، لكن من أحد ابتلاءات "بيلي جين" إنّو الميكس اتعمل ليها واحد وتسعين مرّة قبل ما مايكل يقرّر (بعد نِقّة معتبرة، طبعاً) يعتمد الميكس رقم اتنين.
|
|
 
|
|
|
|
|
| العنوان |
الكاتب |
Date |
 الراجل اللي واقف ورا الفاتنة "بيلي جين" | Adil Al Badawi | 12-18-11, 03:48 PM |
 Re: الراجل اللي واقف ورا الفاتنة "بيلي جين" | محمد عبد الماجد الصايم | 12-18-11, 07:15 PM |
| Re: الراجل اللي واقف ورا الفاتنة "بيلي جين" | عبد الحميد المقابل | 12-19-11, 04:37 AM |
| Re: الراجل اللي واقف ورا الفاتنة "بيلي جين" | قيقراوي | 12-19-11, 09:15 AM |
 Re: الراجل اللي واقف ورا الفاتنة "بيلي جين" | محمد عبد الماجد الصايم | 12-19-11, 10:45 AM |
| Re: الراجل اللي واقف ورا الفاتنة "بيلي جين" | قيقراوي | 12-19-11, 03:06 PM |
| Re: الراجل اللي واقف ورا الفاتنة "بيلي جين" | سفيان بشير نابرى | 12-19-11, 03:35 PM |
| Re: الراجل اللي واقف ورا الفاتنة "بيلي جين" | Adil Al Badawi | 12-19-11, 04:33 PM |
| Re: الراجل اللي واقف ورا الفاتنة "بيلي جين" | Adil Al Badawi | 12-19-11, 04:58 PM |
| Re: الراجل اللي واقف ورا الفاتنة "بيلي جين" | Adil Al Badawi | 12-22-11, 09:59 AM |
| Re: الراجل اللي واقف ورا الفاتنة "بيلي جين" | تيسير عووضة | 12-22-11, 11:41 AM |
| Re: الراجل اللي واقف ورا الفاتنة "بيلي جين" | قيقراوي | 12-23-11, 01:49 PM |
| Re: الراجل اللي واقف ورا الفاتنة "بيلي جين" | willeim andrea | 12-23-11, 03:03 PM |
| Re: الراجل اللي واقف ورا الفاتنة "بيلي جين" | عمران حسن صالح | 12-23-11, 05:10 PM |
| Re: الراجل اللي واقف ورا الفاتنة "بيلي جين" | محمد عبد الماجد الصايم | 12-26-11, 09:24 AM |
| Re: الراجل اللي واقف ورا الفاتنة "بيلي جين" | Adil Al Badawi | 12-26-11, 10:28 PM |
| Re: الراجل اللي واقف ورا الفاتنة "بيلي جين" | Adil Al Badawi | 12-27-11, 04:44 PM |
|
| |
فيس بوك
تويتر
انستقرام
يوتيوب
بنتيريست