|
Re: د.ابراهيم حسين يكتب:الأحفاد عالم جميل ردا على سعد أحمد صحيفة الانت (Re: بكري الخير)
|
قال سياحة ؟؟؟؟
الرحلات دي كانت قبل اسبوعين
انا مشيت منطقة اللفة في كسلا مع الحدود الاريترية
ناس الحلة كتر خيرهم وفرو للطالبات بيت مؤمن تماما وبه ماء ولكن لا توجد كهرباء بالطبع
انا ساقوني ودوني لقطية (سمحة) وكان في برد لما صحيت الصباح لقيتو مطبخ
في صبيحة اليوم التاني الطالبات انتشرو في المنطقة حسب الجدول الموضوع بعناية ورأو العجب العجاب
أناس يعيشون في وضع بائس جدا
منطقة حدودية - نزحو منها في العام 1996 وعادو اليها في العام 2000
الحكومة وعدتهم بالتخطيط - لذا لم يكلفو نفسهم ببناء مساكن امنة لهم ولا اطفالهم
ومازال الوضع كما هو
تبرعت لهم قطر الخيرية ببناء قرية نموذجية ومسكن لكل اسرة عبارة عن عدد 300 بيت
تخيلو بقدرة قادر تم بناء 24 بيت فقط عبارة عن ميز للمعلمين واغلبها فاضية مافيها نفاخ النار لحدي الان
زول يديك قروش عشان تبني 300 بيت تقوم تبني 24 بيت؟؟؟
دا كلام شنو يا جماعة؟
ومن المسؤل عن هذا؟
المهم
يلا تعالو شوفو الناحية الصحية
قبيلة البني عامر معروفة بانغلاقها
كل ما جئنا للتوعية به وجدناهو بكثرة
زواج مبكر: ناس الحلة اليوم التالت جابو اللوري وقالو ماشين حلفا خجلو يكلمونا بانهم ماشين للعزاء في وفاة بنت صغيرة اجبرت للزواج فانتحرت غرقا ، واخري تعالج من مرض نفسي لانها تزوجت صغيرة وهربت من زوجها ليلة الدخلة؟؟؟؟؟
ختان اناث: معاناة شديدة في الولادة لكل الامهات ونسبة الوفيات كبيرة جدا
سرطان الثدي: النسبة الكبيرة من النساء لا يعلمن شيئا عن كيفية الفحص الذاتي لسرطان الثدي
تنظيم الاسرة: نحن هنا ما بنعني بيهو تحديد النسل (يا ....) نحن بنعني بيهو صحة الام والطفل لانو لما (الولية الغجرية حلاوة لبن الولية الغجرية الدايرة دق يجيها الحول والحول بي زول الزول يزاول) امرأة تزوجت منذ عشرة سنين ولديها 9 اطفال (تخيلو) الراجل قال لي بي عضمة لسانو انو المرا قالت ليهو خلاص انا قربت اموت من كترة الولادات وتعالو شوفو الشفع ما قادر يعرف اساميهم ناهيك عن تربيتهم والعناية بهم (هذا في الغالب ينتج عنه تفكك اسري لضعف المراقبة في كل المراحل)
التعليم: الطالبة حينما تصل الي ثامنة خلاص ابوها او اخوها بيقول ليها (كفاك لحدي هنا)
و و و
تخيلو: صدي كلمة واحدة من بت جاية من الخرطوم عن احدي هذه الامراض او العادات في اذن من يسمعها من مواطني تلك المناطق النائية ؟؟ سيظل صداها يجلجل في الاذان لانها كلمة من غريب اتي من الخرطوم ايو من اي ولاية متكبدا المشاق ليلقيها علي مسامع هؤلاء المساكين (هذا ما قاله شيخ من شيوخ المنطقة) لو الكلام دا قلتو انا مافي زول بيسمع ليهو لكين لما يجي من طالباتك ديل بسمعوهو
في اليوم الختامي يتقاطر كل المواطنين للندوة الختامية وفي نهايتها تختلط دموعهم مع دموع الطالبات في مشهد خرافي يدل علي التحام الطالبات مع هؤلاء البنات والامهات في المنطقة وتأتي الهدايا علي شاكلة المصنوعات المحلية لكل منطقة تظل الطالبات تفتخر بها كأرفع الاوسمة
وبرضو تقول لي سياحة؟
دي الرحلة رقم 76 لمنطقة اللفة الكنت مشرف عليها انا شخصيا تخيلو لو جو المشرفين ال 170 بتاعين الرحلات الريفية ديل وكل واحد حكي ليكم التجربة حيكون الناتج شنو؟؟
الاحفاد ظلت وطيلة السنين السابقة تدعم هذه الرحلات من حر مالها وتقدم هذه الخدمة لاهل الريف في صمت ونكران ذات !!! لماذا لم يكتبو عنها في الصحف او يتحدثو عنها في المنابر ؟؟؟ يعني بس عشان زين دعمت هذه المرة؟؟ معناهو الموضوع مادي بحت (خسأت منابركم وصحفكم يا هؤلاء)
|
|
|
|
|
|
|
العنوان |
الكاتب |
Date |
د.ابراهيم حسين يكتب:الأحفاد عالم جميل ردا على سعد أحمد صحيفة الانتباهة | بكري الخير | 11-29-11, 08:53 AM |
Re: د.ابراهيم حسين يكتب:الأحفاد عالم جميل ردا على سعد أحمد صحيفة الانت | بكري الخير | 11-29-11, 10:19 AM |
Re: د.ابراهيم حسين يكتب:الأحفاد عالم جميل ردا على سعد أحمد صحيفة الانت | بكري الخير | 11-29-11, 10:53 AM |
Re: د.ابراهيم حسين يكتب:الأحفاد عالم جميل ردا على سعد أحمد صحيفة الانت | بكري الخير | 11-29-11, 12:29 PM |
Re: د.ابراهيم حسين يكتب:الأحفاد عالم جميل ردا على سعد أحمد صحيفة الانت | مزمل خيرى | 11-29-11, 03:24 PM |
Re: د.ابراهيم حسين يكتب:الأحفاد عالم جميل ردا على سعد أحمد صحيفة الانت | مزمل خيرى | 11-29-11, 03:40 PM |
Re: د.ابراهيم حسين يكتب:الأحفاد عالم جميل ردا على سعد أحمد صحيفة الانت | بكري الخير | 11-30-11, 10:53 AM |
Re: د.ابراهيم حسين يكتب:الأحفاد عالم جميل ردا على سعد أحمد صحيفة الانت | mekki | 12-01-11, 08:54 AM |
Re: د.ابراهيم حسين يكتب:الأحفاد عالم جميل ردا على سعد أحمد صحيفة الانت | بكري الخير | 12-01-11, 02:57 PM |
Re: د.ابراهيم حسين يكتب:الأحفاد عالم جميل ردا على سعد أحمد صحيفة الانت | mekki | 12-01-11, 08:42 PM |
Re: د.ابراهيم حسين يكتب:الأحفاد عالم جميل ردا على سعد أحمد صحيفة الانت | بكري الخير | 12-02-11, 08:11 AM |
|
|
|