|
|
 Re: لمثله تُسّود المنابر وتُنكّس الاعلام ويبكيه الشرفاء (Re: صديق الهادي)
|
(ماشى وين آ زول أقيف!)
يا رفاقا... الضُراع شِدُوهو،
سِّدُوا الفرقة، رقراقاً بجيب الريحْ
وكفكِفُوا الدّمع البِسيل وشّالُوا
يترِس موجة الحُزْن النويحْ
) أبو عازة (ما مات
كضّبْ الرادى المخاتل وإتوهمّ (الصايح) البِصيِّح
)أبو عازة( ما خِدّ ليه غفوة
(هسع عيتى) يجينا بى سمتو المريح
وبإنضباطُو وإحتياطُو
يفتح المحضر ويخطط
وينّطِقْ القلم الفصيح
ويضوى للناس المسالك العتّمة
نورالعِرّفة، جدلّ الثورة والفهم الصحيح.
ماشى وين آ زول أقيفْ! ماشى وين؟
والسكة قدامنا بترارى
وداك مُشْرَع الحِلم اليَسّارى
ومرفأ الأمل الفسيح
ماشى وين آ زول أقيفْ!
لسانا بدرى على غيابكْ
لسه ما أبت الكُتال فى الحق حُرابكْ
ولسه مليان بالمعانى الحُرة والثورات جُرابكْ
وهاداك عدو الشِغِيلة مِتْوهوِقْ جرِيحْ
يا زميل قوماكا نهتِفّْ
(يلا يا اولاد المشارِق
أنهمُوا العزّم البِدافِرْ واركُلُو الوهَمّ المُرِيحْ).
يا رفاقا لو يغيب عن مركز الحِزب (عمّنا)
(عم تيجانى) الكان ضراهُو بِضُّمنا
والقناديل التشِعّ من جبهتُّو
العصافير الترِكْ فى ضحكتُّو
والصرامة الحانية تتخلل حديثُو ونظرتُو
باقية فينا وفى عقولنا وفى قلوبنا ودمّنا
والوصية الكلمة زى النجمة تلمع
(خلو همّ الشعب أولّ ......
خلو همّ الشعب أولّ....ويبقى (نادُوس) همّنا).
(يا تيجانى) يازميل (الكِليتُّون) حالو ظابطة مؤمنة
نوم قرير العين ومرتاح السريرة يا صميم القلب نفاذ البصيرة
الدرُوبْ للثورة والثوارمصيرا تلِمّنا
ومابنفرط فى الهِداية وما بنبضِعّ فى الرِباية
يا أبونا يا رفيقنا
ويا صّديقنا وعَمّنا.
راشد سيد أحمد الشيخ
24 نوفمبر 2011
|
|
 
|
|
|
|
|
| |
Mohamed Abugessisa
فيس بوك
تويتر
انستقرام
يوتيوب
بنتيريست