النظام العام .. ما قلتو (سوط) عملتو موت ..؟

Quote: ياخي المنطقة دي منطقتي برضو جنوب الكوبري قصاد جزيرة تمبس ياخي سمعت كم مره قالوا في قرنتيه كملت ليهم الجرجير هاهاهاهاه بس طبعا بعد داك رحلنا لي الثورة شمال امدرمان وانت مشيت القفيلاب جنوبا

المنطقة المذكورة دي يا زاتوو بعد الكبري .. ما عندنا معاها اي قضية .. نحن حدنا بعد الكبري وبي جاي .. بي الجيهتين جوه الجزيرة وبره الجزيرة ..
الحاج عندو طلعات بحرية في المنطقة دي وخابر ليك دروبه كلها .. وعندو صاحبو ربنا يرحمو كانو بينزلو بالليل خالص .. بعدين قالي الحتة دي فيها وهمات عجيبة جدا بالليل .. ولو ما قلبك باليمين ما بتقدر تتحرك فيها والله بيحكي لي عن حاجات كدا قرب يمسخ علي البحر زاتووو .. عشان كدا ما عندي معاها اي شريعة حدي جزيرتي دي وكان جات اي وهمة البحر قريب والبجيك في البحر يا غطستو يا غطسك ..
طبعا القرنتيه دي كانت حاجة عجيبة جدا .. تعرف دي لما مواعيد الوجبه بتاعته تجي ، بتطلع ليك بالليل تقش ليك مساحة كم فدان كدا من فدادين مشروع الجزيرة بتضرب ليك البرسيم دا ضرب عجيب خلاص .. وتخلي ليهم (السماد) لوووول تجي الصباح تلقى اثار الكرعين حقته في الطين وتلقى السماد الطبيعي مكووم ..
المهم القرنتية دي استمتعت ليها فترة كدا ماكله وشاربه ومتفسحه واتخارجت .. يظهر إنو لقت البرسيم بتاع المنطقة ديك ما فيهو نكهـة .. العجيبة كانت بتتعشى حسب المينيو بي صورة أوضح .. تقبل ليك يوم على البرسيم وتقط الجرجير ... تجي راجعه ليهو بعد يومين .. يعني يوم جرجير .. ويوم برسيم ..
تعرف القفيلاب دي ما ناقش ليك فيها اي حاجة لحدت الآن .. انا صرتي مدفونه في الموردة .. وقيل تحت مسجد النيلين يعني الواحد احتمال كبير يوما ما يجي يفتح ليهو بوست يأذن ليكم هنا دا ..
مشيتي الاخيرة دي .. كنت عامل فيها قندولي راكب في الكرسي القدامي وأخوي الكبير حايم بي لمدة تلاتة ايام في الشوارع بيوري فيني الحتات .. تخيل بلاي انا بقو يوروني الشوارع .. المهم بعد اليوم التالت زهجته من البرنامج دا .. وقلت ليو يازول بعد كدا انا باكل ناري ..
ياخ صطت ليك الشوارع دي صواطه .. اللقى ليك شارع اتجاه واحد ادخل ليك لي نصوووو بعد شوية يكابسوني ليك الجماعة من الاتجاه العكسي .. اديها ليك خلف من هنا لحدت الدمام .. انا جاري وهم جاريين وراي
أول يوم قيادة يازول جيت داخل الحلة بالليل من الكبري الجديد ونزلته ليك وتعال شوف الصواطة .. اللف واجي راجع تاني قلت الليلة اصلو ما بتصل علي زول يف البيت عشان ما يمسكوني بيها الاجازة دي كلها .. المهم اكلتها ليك بالكرباوي كدا لقيت نفسي قربت ادخل الجماهيرية العربية الليبية الاشتراكية العظمى .. أقر بواحد سالتو قلت ليهو عايز شارع دكتورة سلمى .. قالي ايييييييك .. قلت ليهو يازول بس قررض على كدا انا بوصل براي .. المهم ركب معاي دليل وصلني لحدت أول الشقلة .. عشمتو حق الكارتية .. واستلمت ليك الشارع .. المهم لفلفت ليك لفلفته ليك .. لقيت نفسي جمب صالون حلاقة فوقو كمية من الشباب حلوين كدا .. وقفته عربيتي بعيد منهم ونزلته بي رجليني .. سالته واحد براحه كدا قلت ليهو ياخ في الحتات دي في ناس فلان وفلان .. ديل طبعا اخواني .. عاين لي كدا واخد ليهو ضحكة .. ساقني ليك من يدي خطوتين قالي اهنداك بيتكم يازول وانا بكلم ليك اخوانك شان ما يفكوك لينا ساي تجيب لينا رقبة في البلد دي أرجع بلدك الجيت منها والله متعني ليك متعة .. قلت ليهو والله تلحق تكلم زول من ناس البيت بالحصل دا .. بكرة الصالون بتاعك دا ما تدق فوقو مقص هنا دا .. قالي يازول لالا ياخ دي حاجة بتكلمو بيها .. بعداك رقعتو ليك بي علبة مارلبورو .. طبعا ملاوز لي قلت الزول دا لو لحق فتاني .. إلا آآجر لي شقة مفروشة
يازول ركبته عربيتي .. واخدته اللفة بي راس الشارع واستعدلته .. خشيت البيت برااحه خشت زول بيعرف بيتم وشارع بيتم وخشم بابم ..
يازول لقيت ليك الجماعه منتظرني ليك ..
أول واحد فتح خشمو قالي ..
جابك البيت عصام بتاع الصالون مش كدا ..؟