البشير يستكمل عنصريته ... بإعلان الحرب على كل أفارقة السودان

Quote: عماد..حبابك يا صديق.. بمناسبة مجرم الحرب احمد كرمنو.. ياخي عثمان يوسف كبر..افريقي..من البرتي..و ما فعل بأم زرقة ناس دارفور لم يفعله نجار في خشب.. فهل هذا يعني أن الموضوع ما موضوع عنصرية؟ احمد كرمنو يا عماد.. اخونا محمد عبد القادر سبيل كتب مقال قدر الليلة و بكرة و نشرو في صحيفة اخر لحظة.. لأنو في واحد نسب احمد كرمنو الى اثنية الوطايط في النيل ألأزرق.. فقام سبيل سن سنان الحجة عشان يقول لينا انو الوطايط ديل فلول جعليين منسيين في حوافي النيل الأزرق..و سبيل هين يا عماد.. ياخي جريدة الرائد الناطقة بلسان المؤتمر الوطني.. اجتهدت بكرعينها و ايدينها عشان تنسب احمد كرمنو احمد كرمنو الي قبيلة العركيين.. اها باقي ليك العركيين ديل الليلة يا عماد بتقدر تمشي تقول ليهم والله انتو افارقة؟..هسع ده جيب اختنا ميادة كمال.. و اسالها ( و هي التي عملت مع الرجل من قرب..و ح تطلعوا ليك ما عندو علاقة بالنيل الأزرق سوى الإرتزاق و البلع)..! احمد محمد هرون برناوي يا عماد.. بالعربي الفصيح .. افريقي..و هو مجرم حرب عنصرية .. فهل هذا يعفيه من المسئولية؟.. ووكت الحساب بقى بالطريقة بتاعة فلان و علان.. انا القدامك ده مسيري..و مستعد انسب لغاية معد يكرب و قضاعة..و رغم كل ذلك اقولها بالفم المليان ادعياء العروبة في السودان يمارسون عنصرية و يقتلون الأخرين على اساس انهم افضل من الأخرين..انسى حكاية انهم مسلمين..و الله يا عماد كلام القران عن الأعراب انهم اشد كفرا و نفاقا.. لم اراها يمشي في قدمين الإ في الرقعة المساة جمهورية السودان..!! الميزان الشرعي يا عماد.. عند رب العالمين هو التقوي.. فهل تستطيع أن تقنعني ان منافقي السودان رجالا و نساءا يدركون ماهية هذا الميزان؟.. ماحدث في دارفور و جنوب كردفان ..و اليوم في النيل الأزرق هو مؤسف للغاية يا عماد..و لن يرضاه انسان نقي الضمير.. و صدقني تلك الأحداث حدثت لأنو في طرف متطقنع فاكر روحو قرشي اللسان و الدين و الهوى.. عشان كده التانين في حسابو مجرد هوام خلقهم الله للموت و العذاب و التنكيل..! خلاصة القول.. هناك عنصرية ..يا عماد..و الأفضل نسمى الأشياء باسمائها الصحيحة.. عشان نمشي لي قدام لو في طريقة لذلك..المسلم متعنصر على غير المسلم..و ادعياء العروبة متنعصرين على الأفارقة..و ناس الخرتوم متنعصرين على ناس الأرياف.. و خذ ما شئت من معيار.. و في النهاية المصب عنصرية موجودة..! عقدة احمد كرمنو..و احمد محمد هرون و عثمان يوسف كبر.. انهم فاكرين لمن ينفذوا جرائم الإبادة العرقية و التشريد..و العنصرية تجاه اهلهم.. يظنون ان ذلك سيجعل منهم مرتبة واحدة مع ادعياء الحظوة اياهم..!..كلهم اتغشوا لمن عملوا كجنود مخلصين في الحركة الإسلامية..و كانوا ولازالوا يظنون أن التساوي في صف الصلاة سيجعل منهم اعراب تقوم و تقعد على كيفها في الوهم المسمي جمهورية السودان..! ياخي حتى الذمي دانيال كودي .. الليلة العالم دي بتغش فيهو أنو هو وطني و بطيخ..و بكرة لمن ناس الطيب مصطفى يلقوا الهبوب.. ح يرجعوهو لي جبلو زي الماحاصل شي...! هناك مظالم يا عماد..و هذه المظالم قامت على اساس عنصري بين..و الشرع البنعرفوا.. بيقول الدين النصيحة..و بيقول ما تظلموا الناس على اساس اللون و العرق و الإثنية.. لكن دولة السودان لا تعرف مثل ذلك الشرع..و من يبرر لها لا يعرف عن الشرع التكتح..و كفاية يا اهلنا نفاق و استهبال.. !! اخونا دكتور عارف الركابي.. يشيل و يصور دهشته في جنوب كردفادن..و يحكي لينا عن المشاريع الإسلامية التي فعلها من اجل جنوب كردفان..و ناسي انو جنوب كردفان دي جابت البطل الفكي علي الميراوي..و الذي يتشرف بأنه مسلم قبل أن يكون نوباوي..و قبالو جابت حمدان ابو عنجة الواحد ده يا عماد..و لمن يجيني زول في الألفية الثالثة ويقول لي جاي عشان اصحح ليك اسلامك دي تبقي اسمها شنو غير الحقارة و عنصرية عيال العرب؟..شفت كيف الفرق يا عماد.. الفكي الزاهد محمد الأمين يترك حياة الدعة و اصالة عيال العرب اياها..و يقعد مع النوبة في جبالههم..و يزرع معاهم الكرمكة..و الماريق الأزرق..و بسماحتو.. النوبة يتنازلوا عن اسم جبلهم و يتركوا ليهو الخيار عشان يسميهو.. فتكون مدنية رشاد في شرق جنوب كردفان..و لغاية الليلة مافي نوباوي بيذكر الفكي محمد الأمين بسوء..و اخر الزمان يجينا عمر البشير و يقول لينا اطارد النوبة جبل جبل و كركور..و في شنو ؟.. بس عشان النوبة قالوا ياخي الدولة السودانية قدمنا ليها الكثير..و ظلمتنا؟..الحرب الحاصلة في جنوب كردفان يا عماد حرب عنصرية..شئنا أم ابينا..و الحرب الحاصلة اليوم في النيل الأزرق برضك حرب عنصرية..و الحصلت قبل ذلك في دارفور برضك حرب عنصرية..وما تنسى ناس دارفور ديل.. لو جينا للشرع الحنيف اشرف من عمر البشير و ملته و خاله المتكنقع الطيب مصطفى..و اشرف من أي مسلم متنعنظر اليوم في جمهورية السودان.. لأنهم في زمان المسغبة كانوا بيكسوا الكعبة الشريفة..باقي ليك في خدمة للأسلام يا عماد اشرف من كسوة الكعبة الشريفة في زمان المسغبة؟..ياخي و الله العظيم يا عماد.. لو كنت املك على امر السودان قوة.. ناس دارفور ديل افرش ليهم طرف هدمي.. خصوصا لو كنت مسلما و اعرف قيمة أن يكون المرء مسلم.. لأنهم القدموهو للإسلام.. كن نجري و نطير ما نحصلو..و اخر جزائهم يقتلوا و يتم تشريدهم من ديارهم على اساس عنصري بحت.. لأنو في واحد مطلوق في الخرتوم فاكر انهم درجة تانية..!! العنصرة موجودة يا صديقي..و هي اساس المظالم و حاصلة في السودان..و ما يسمى بالأعراب و مسلمي السودان ما ح يعترفوا بالقصة دي.. لأن التعالي و الإستعلاء هي خصال جبلوا عليها..و الى اشعار اخر.ز فالحروب في السودان اساسها عرقي بحت..و بالعربي الفصيح.. اساسها عرب ضد غير عرب..!! و دمت.. كبر