لوكْ القرَضَة يا ريِّس!

يا ريّس:




أكتر كمان شغل الفُقُر
شغل الرّبا شغلاً خطر
بين العباد ولّع جمر
وجد منتشر
أصل الغسيل خلقوه لشر
قلناله دا شغل الخطر
ودّانا خلف مليون دهر
معقول كدا ناساً تُسر
بي حُجّة ضرورة دايرين يعصْرُونا عصِرْ
وعيال بي جاي فاتوا الخطر
قشّوا الوكت ورموه بحر
عايزين يغْنُوا في لحظة طَفَر
استعجلوا وجرُوا شديد ماشين زُمَرْ
كايسين دهب وكايسين جمُر
بيتاجروا في النت
كان بي هرم
أو بي شجر
والشبكة ذاتا بتشتجر
جدعوا الطواري في ضَجَرْ
وسهر شديد لين الفجر
وما في صلاة ولا ذِكِر
كايسين قريشات الغجر
ناسيين حكاية جمرو حر
حراً شديد
أكتر كمان ناسيين حرب
صارت جهاداً منتشر
من الله جاهم والرسول
بالله كيف تفرح تُسر
برداً شديد زي زمهرير
والموية وقّفت الخرير
فاتت كتير دي صلاة عصر
وداك الفجر
وزاد الفُجُر
وإنت حر
أنا قلت ليك
شان تفتخر
إنّك تقودنا لي فخر
--
اصبر علي لوك الصبر
شان بكرة جايينا الجمر
--
أحسن لنا حالة الفقر
وللاّ في السّراط ننجرّ جر