قصتي مع (نانسي عجرم) في مدينة كريمة... إهداء إلى بشــاشا... ومحل رقيقي التِتْقَطع!!!

Quote: أها القصة وين... شيلو الصَبُر بجيكم راجع... كميات مودتي... أبو الحســــــــــين...

قاعد أحكي معاهو كدي... قام جاء عِريبي خَلاَ (أظنو هواري) ـ تصغير عريبي دي لأنُّو صغير في العُمُر وهم طبعاً مشهورين بيتزوجو صغار... عشان ما يجيني واحد ناطي يقول لي صغرت وجهَّلت بي قبيلة صغيري ـ من عرب لا فوق ومعاهو مِرَيْتُو حلااااااااااااااااتة (الظاهِر عليهُن عِرسان جداااااااااد لنج وجايين يتفسَّحوا في كريمة!!)... وقفوا بي جنْبي... المرة نطَّت قالت لي مجتبى ود الكمالي... شريط عَجْرا يعني (عجرم) الجديد ما نزل؟؟؟؟ _ طبعاً الهواوير بياكلو الحرف الأخير سريعين في الكلام_ أنا طوالي ودِّيت الإسم دا... لي فنان شايقي قُلت يكون طلع من منطقة (جِرا) علي حسب سمعي يعني!!!... وقلت يكون زي ناس ......... قنتي و......... مورا و........... العفاض و.......... أرقي و................. المقل و.......... الحجير و............ الكرفاب و............. الأراك وبالعكس!!!! لأنُّو إختلط علي الإختساس في موضوع عجرا دي... وماني قايِل مقطوعة الطارئ نانسي دي عندها شعبيي في البلد كمان؟!! ... قُلت أكييييييييد هي قاصدة منو كدي جِرا!!! أها قُلت كدي الأشمشر أشوف الشريط يطلع متين عشان أجيبو معاي هنا يكون حدث جديد... بلا بَعَد ردُّو ليها... قال ليها والله لسع ما وصلنا كدي شوفي أسامة للفيديو والكاسيت في شارع المستشفى!!! نط راجلها كمان سألو أها شريط البرتقالة القُتو نسختو كِمْلت ما سوِّيتولكم نُسُخْةً تاني شئ؟؟؟

هييييييييييييييييييي الشئ دي المقصود بي عجرا دي مااااااااااااهو فناناً من جِرا شئ... الشئ دي المقصود بَها قاطِعْةَ الطارئ نانسي عجْرم... (الله يصُرْفِك صرافاً يا عجرا) إنتي لا هِني وِصِلتِي؟؟؟!! أي لوووووووووووووووووووووول!!! سرييييييييع قُلت لي مُجْتبى كدي اْدَّني شرايطي ديل وقُتَّلُو عليك الله شوف لي كان لقيت لَك شريطاً تاني للفنان بَنْدا (الله يرحمو) أدني خبر الأجي أشيلو!!!
الله ياذاكْ أذاياً كدي يا الديقيتال ويقطع سيرتك من البلد!!!!

وأنا مارِق من المحل أردد في كلام واحد (حبيبنا هنا إسمو ود البدوي مترجم معانا في المكتب) دايماً لمَّن أشطح في حاجة ولَّة شي يقول لي (سبحان الذي أتى بكم من البدو)...

ولكم من المودة والمحبة أحلاها وأعذبها...


أبو الحســـــــــين...