نيران صديقة وراصني ياجدع ... ياحضري ياحضري ياحضري

Quote: ياتمبس بالله حسب تجاربك احكي لينا اجمل الطرائف الدفاع مع حراس المرمى ياخي بتحصل حاجات وقصص عايزة ليها كتاب عديل

والله يا وليد ايام رابطة ابوعنجة .. المباريات كلها عديناها طرايف ..
انا كان عندي دفاع مجنون جدا .. وبعدين كنت قصيروني خالص .. لكن بشهادة الكتيرين كنت بقلعه من التمنيات وامكانية يدخل قوون شوية صعبة .. دي طبعا ما نرجسية لكن كانت تمارين نط واستطالة وجري وطيران .. وكان في حب للكورة ..
يللا الشباب ديل لو لعب معاهم اي زول غيري بكونو متوترين .. وما مرتاحين .. لانو انا من خلفهم بكون قاري الميدان كويس .. وبعدين البغلط بديهو ليك علي راسو في الحال وهم كانو مرتاحين للمسالة دي ..
المهم
عندي الباك الفرده اليمين اسمو عمر .. عمر دا مشكلتو كبيرة جدا مع باكمبـا .. وباكمبا مشكلتو كبيرة معاي
باكمبا بيطلع على الناحية اليمين لانو رجلو شمال .. ويلم ليك في عمر دا (يغسلو) عمر اخلاقو ضيقه جدا وبكره ليك باكمبا كراهية شديدة .. واي كورة نحن نقابل فيها فريق البترول بتاع ناس باكمبا ..عمر مطرود يا ضرب ليك باكمبا بنيه يا اداهو كف .. يا (بزغ) ليهو في وشو الله يكرمك وطبعا انت عارف جمهور الرابطة بيعمل فيك شنو لو غسلوك ..
والله بي صراحة انا كنت بضحك لما باكمبا يستلم الكورة ويجنح .. عمر دا من الغيظ كان بيجري ليك عليهو فارد يدينو وكرعينو وعاضي شلوفتو ما عندو شغله بالكورة .. شغلتو بس رجلين باكمبا .. وباكمبا لما يستلم بيفتش لي عمر المهم باكمبا استلم الكورة .. وجنح علي تجاه عمر .. وعمر انطلق بقيت اكورك لي عمر يا عمر ثبت كرعينك .. يا عمر ثبت كرعينك .. لانو عارفو ح يدخله ليهو بي تحت كرعينو ..
عمر ما اشتغل بي كلامي .. بس لما ليك فوقو باكمبا غسيل .. عمر دا مع المحاورة بيجري لحدت جوه الميدان ويجي راجع تاني وباكمبا بيكون منتظرو .. يحاورو تاني عمر زيييييطك يتدردق لحدت بره الخط ومرات يدخل بيت ناسسوميت ويجي راجع تاني لانو الباب بكون مفتوح والشباب قاعدين جمبو .. باكمبا بعدما فتر والضحك كتلنا كلنا .. وانا اكورك يا عمر ثبت كرعينك .. قام باكمبا اتحرك علي تجاة الزاوية اليمين حقتي علي راس طمنطاشر ووحيات الخوه يا وليد دي المنطقة الكان مسموح ليهو بيها يعني ما كان بيحاول مجرد محاولة يتعدى خط طمنطاشر ,, المهم حاور عمر واخد ليهو لفه .. عمر بقى بي وراهو .. وجا مندفع .. قام باكمبا دردق ليك الكورة لي عمر زي اللاعب ليهو باص قون وزاغ من عمر .. عمر توووفك .. علقه لي في التمنيات انا عملته فيها جادي .. وقلت ليهو دا شنو ياعمر ياخ انا اقوليك ثبت كرعينك ثبت كرعينك .. قالي :
شنو انت ما عامل لينا فيها بتنط .. انا مقرشة ليك بس قلشت مني