|
يا عطشانين السودان اتحدوا
|
- السرة اختي ازيك
- زي ما شايفاه يا التومة
- بسسسسسم الله الرحمن الرحيم مالك من الصباح
- كيف مالي لينا تلاتة يوم الموية درب نقطة مقطة ، قلت امشي البحر اجيب لي صفيحتين اختهم عندي لاقوني ناس اللجنة الشعبية قالولي يا السرة ماشة وين قلت ليهم ماشة البحر اجيب لي موية في الصفيحتين ديل قالوا لي نحن بنتمشي معاك نساعدك بس تدينا رسوم توصيل قلت ليهم لكن انتو ما شالوكم من اللجنة قالوا لي تبطلي لماضة والا نوديك محل يبلعوك كلامك ده قلت ليهم بري ارحكم طيب اها مشينا قدام لاقاني ود علوية الالاتخرج من الجامعة بعد تمانية سنين ويادوب شغلوا ولبسوهو الكاكي ومعاه اتنين عساكر السرة ازيك اهلا يا المبروك بطلي النفاق بتاعك ده ناس اللجنة الشعبية ديل مودياهم وين والله لا مودياهم لا حاجى انا ماشة اجيب موية من البحر قالوا لي نوصلها معاك بس تدفعي رسوم اللجنة قلت ليهم ما عندي مانع اها وفقع ديك يا الضحكة وقال لي انت يا السرة قايلة الحلة دي فوضى كل شي عندو نظام المحلية دي نحن لازم نضبطها انت عندك ترخيص تجيبي موية من البحر؟ اجي يا ولدي ، البحر ده كمان داير ترخيص؟ ايوة انت قايلة اتفاقية مياه النيل دي عملوها لي شنو ما لتقنين الحصة بتاعة الموية سجم خشمي الموية كمان بدخلوها الحصة؟ ليه عايزين يخرجوها دكتورة اسمعي يا السرة انت مرة كلامك كتير عندك رخصة والا ما عندك ما عندي خلاص لو جبتي الموية حنغرمك اجي ؟ وكان ما جبتها برضو حنغرمك لانك اثرتي الفوضى في الشارع وعطلتي ناس اللجان الشعبية عرفتيني يالتومة وشي ينعل قفاي ليه؟
|
|
|
|
|
|