الحرب مدورة ... وقمة المنبر فى وادى تانى ..

Quote: سـلام يا قيقراوي والشباب، وشكرا برضو يا حيدر على تعبيرك الضافي.. أنا يا قيقراوي عايز أجاوبك زي ما طلبت يعني دون النظر لكاتب البوست منو، لأنو في الحقيقة دا ما أول بوست يتفتح بالمعنى دا؛ فقد قرأنا بوستات كتيرة ما شاكلة يا بكـري ليه ما رفعت البوست دا وبترفع بوستات تانية ما مهمة.. أولاً البورد دا كان مستمر فترة طويلة دون أن تكون به هذه الإضافة، أي خاصية رفع عناوين بارزة ومينشيتات، وكان كل شي ماشي تمام، يعني مجرد ما تفتح البورد بتجيك العناوين بحسب آخر مداخلة، يبقى نقول ـ بلسان الناس الشايفين إنو العناوين دي حاجة مهمة وسمحة ـ نقول شكرا ليك يا بكري عليها.. أنا قلت بلسان الناس ديل لأنو بالنسبة لي أنا دي ما حاجة مهمة، فبكري ليس هو من يحدد لي أنا كقارئ أو عضو شنو الموضوع المهم أو الأقل أهمية، يعني أنا ويمكن كلكم ما بتقروا موضوع فقط لأن بكري ختّاهو فوق.. وأنا لسة شغال بالطريقة القديمة قبل وجود العناوين يعني برضو مباشرة بنمشي للبوستات بحسب ترتيبها وبختار المواضيع التي أود الإطلاع عليها، وبختار العايز أرد أو أعلق عليها وبخلي الباقي، وطبعا دا برضو أكيد بنطبق على كل الناس، ربما يكون منكم من يهتم للعناوين المرفوعة أو المقالات الخ.. ونسبة لكثرة المواضيع وقلة الزمن الواحد لازم يكون سيلكتيف خالص خالص، يعني أحيانا ناس كتار وأنا منهم بنقرا بإسم الكاتب وليس عنوان الموضوع بسبب قلة الوقت زي ما قلت..الخلاصة إنو بالنسبة لي أن (قمة المنبر) ما بتدي الموضوع أي قيمة مضافة أو تدلل على أهميتو وحقو نقلل من بوستات يا بكري الفعلة دي ويا بكري التركة ديك ونركز في المهم، تماما زي ما طالبت يا قيقراوي بسؤالك عن رأي الناس في الحرب الحاصلة، إذن يبقى دا هو الموضوع مش كتابة عنوان أو عشرة عناوين في أعلى المنبر.. تاني شنو؟: أيوة المنبر ليس هو مصدر الأخبار الوحيد بالمناسبة، وكثير من الأخبار هنا بتجي منقولة من الجرايد أو من مصادر لا يُسأل أصحابها عنها ولا (عما يفعلون!).. والمقالات أيضاً بل أن طريقة عرض المقالات في مواقع أخرى أسهل للقراءة من صفحة المقالات بسودانيز.. يبقى بنتفق معاك إنو البوستات التفاعلية هي المهمة، ونرجع تاني ونقول إنو أهميتها تأتي من الكلام المكتوب والرأي المطروح لا من وجودها أعلى المنبر أو من ترديدها كلام من نوع قالت مصادري أو رشحت تسريبات إلى غير ذلك من الترهات.. أخيراً في مرات كتيرة كان أنصار الحكومة برضو بحتجو بدعوى إنحياز بكري للمعارضة في مسألة رفع البوستات.. تحية للجميع..