حسن الترابي : عمر البشيـر بتاع ورجغة ونضمي كتير ساي .. وبن لادن أضر كثيراً بالمسلمين

Quote: آفة امرهم النسيان ياود الخطيب .. ديل بيتكلمو ويا هم بينسو او يعتمدو على ذاكرة الشعب الضعيفة او لنقل المتسامحة تجاه الانتهاكات البترتكب في حقها على المدى البعيـد ..

بالعكس ياود الزين ذاكرت الناس يستحيل تكون معطوبة او الناس ديل يراهنوا على ضعفها عارف أول ما قلت كلام الترابي عن عمر البشير بتاع ورجغة ونضمي كتير ساي أتذكرته عمر البشير نفسوا يوم أطل علينا ببيانوا الاول في يوم الجمعة 30 يونيو 1989 م من ضمن إنتقادوا للوضع أنو الصادق المهدي بتاع كلام _ وأما رئيس الوزراء فقد أضاع وقت البلاد في الكلام _ وبتصور الإنقاذ عندها مشكلة مع الكلام أي حكومة لازم تكون صياغة مواقفة محكمة ومنطقية ده شي أساسي , في كلام للاستهلاك المحلي زي منطق الوزير المعجزة عبد الرحيم محمد حسين وهو ببرر الغارة الإسرائيلية على بورسودان ( أنو الناس ديل ضربونا عشان بنطبق الشريعة الإسلامية )


الكلام الممكن للاستهلاك المحلي والتدجيل صعب تتبناهوا كموقف تقنع بي العالم من حولك , زمان البشير كان ماسك في إبتلاءات كنا مسمنوا البشير إبتلاءات , لانوا ده كان تبريروا المفضل لاي مصيبة تحصل للسودانيين بسببوا وسبب سياساتو الخرقاء ......مع أنو الابتلاءات دي ماظن هو وناسوا أصابهم شي منها بالعكس في عشرين سنة بقوا ناس حاله زين مصنع مصنعين .......... وبرضوا لو إفترضنا جدلا أنو المنطق ده جائز هل الحته دي بتكون قاصرة على ناس وناس لا ... ولا برضوا تتخته تحت منطق عسكري بقول الشر بعّم والخير بخص باعتباري أنا وفئتي الناجين من الشر ولينا خصوصية الخير والباقيين إبتلاءات معليش أتسببنا ليكم فيها ... لكين أتحملوا وربنا يجعله في ميزان حسناتكم ووو ........... الخ أكواد النفاق .

لو جينا لابن لادن ياود الزين ياخي مافي أي علاقة إيدلوجية بتلم أسامة بن لادن وبين الترابي باعتبارك بتتكلم عن إسلام سلفي جهادي وعن إسلام ذو نسق تجديدي _ إسلام الشيخ الترابي _ الممكن يكون أقرب للعلمانية من أى أسلام سلفي , وماظن بن لادن كان عندو الطموح يقدر يطبق النموذج الطبقوا في ما بعد مع ناس الملا عمر في أفغانستان في السودان وأظن فهم الحته دي من خلال وجودوا في السودان عشان كده نفض يدو من الموضوع , إسلامنا قصتوا مختلفة وبن لادن وقاعدتوا ماظن يوم صرحوا تصريح كويس في حق السودان أو اعتبروا المطبق فيهوا إسلام ده غير أنو ماظن في سودانيين في القاعدة يعني ماسمعنا سوداني في عملية إنتحارية فجر نفسوا ولا الطيارات الضربت برج التجارة والبنتاجون في 11 سبتمبر كان فيها سودانيين يمكن مافي سوداني ليهو قصة مرتبطة بالقاعدة اللهم منو القوصي الاتحاكم واتسجن في امريكا في التسعينات كمتهم بأنو كان محاسب أو ليهو اعمال محاسبية في إدارة حسابات القاعدة , يبقي الناس ديل يا حيدر بتكلموا مجاملة لو الشيخ ولو حوارية لانو بن لادن ماكن إطلاقا حكاية مؤثرة في قصتهم ولا كان في الارتباط القوي بينهم وبينواأو الاتفاق المبدئي حتى على بعض القضايا كانت حكاية زي حكايات الانقاذ في سنواته الاولي لما جاهم القذافي وكسر سجن كوبر بن لادن جاهم يعمل مشاريع زي ( شركة وادي العقيق ) يعني الموضوع كان أيام الزنقة ديك وقّل الموارد ما اكتر من بزنس بعد داك الله فتحه على النظام وعصرو الشعب ضرائب وذكاة ورسوم وجمارك وقيمة مضافة وووو وبترولهم طلع وقلبوا ارزاقهم كويس بقوا ما محتاجين لمغامرات زي دي لا القذافي المجنون ولا بن لادن المتطرف .بقي حالهم زين ومنهجهم وسياساتهم بعملوها بمزاجهم .... المهم ما نفكر في التبريرات البقولوها كتير ومنطقة الفاقد المنطق ولا نفكر انو تكون ليهم علاقات منهجية أو إيدلوجية بغيرهم الناس ديل حالهم براهوا من راسهم ومزاجهم ما خاضعين لاي نوع من المعيار


----------------------------------------------------------
* معليش عارف صاحبك كبر وكلاموا كتر