الاسلام لا يوجب طاعة الحاكم .. يا الشفيع وراق

Quote: واذا رأى اهل السودان ان يقيموا الدولة الدينية فلن نعترض، واعلم يقينا ان الشريعة اذا نزلت في انتخابات فستفوز بنسبة 90%

عارف كرمك دا زي كلام الزول اليتلب في حيطة جاره يسرق منه قروشو كلللها .. ويجي الصباح يلقي الجيران
متلمين يعزو فيهو يقوم يدخل يدو في جيبو ويتصدق عليهو بقروشو ..!!

رأي اهل السودان في الشريعة الاسلامية كان ممكن تاخدوهو من اهل السودان وفق الالية الديمقراطية الارتضو بيها قبل سرقة السلطة في ليل 30 يونيو .. وكان قدامكم كل اهل السودان بامكانكم تطرحو برنامجكم عليهم وهم يقرروا وقتها ولهم مطلق الحرية انهم يرتضو الشريعة الاسلامية ام لا بحرية تامة .. مش بعد عشرين سنة تجي يا الشفيع بعد ما تغلغل الفساد وفاحة رائحة عفن المشروع الحضاري للجبهة الاسلامية تقول لي راي الشعب .. ووفق ياتو الية والانقاذ بتمسك مفاصل الحكم ويتمركز في يدكم الاعلام والاقتصاد والسلطة بتشاور الناس .. انت ما عارف يا الشفيع ان من لا يملك قوته لا يملك قراره والا شنو؟
هسع بتسأل الناس في كلام بتاع لعب على الدقون بعد ما مات من مات وقتل من قتل في حربكم الجهادية - حينها - على مدي عشر سنوات وبعدها بقي سؤال الناس ..
وهل انت مقتنع انه رايك البذلتوا هنا دا هو نفس راي نافع على نافع والبشير والا هو جزء من الاحلام الخلتك تنضم للمؤتمر الوطني انه ممكن يتطابق مع رؤيتك الحالمة دي ؟
لا نافع لا البشير لا قوش ما بؤمنوا ليك بحاجة اسمها راي اهل السودان بالمناسبة .. خالص خالص ..