" الثورة السودانية " .. جذالتها لدى عمر عشاري .. و فسالتها لدى محمد عثمان ابراهيم

Quote: عشان ما نطول ليك السؤال بتاعنا برضو بيكون قائم، نحن دايرين (ثورة) ولا دايرين فقط (إسقاط النظام)، لو دايرين (إسقاط النظام) ويبقى الحال كما هو عليه، فأنا متضرر ووسأواصل بحثي عن (الثورة)، والسودان الجديد هو الثورة في نظري، تغيير جذري للتركيبة الموجودة والمأسس عليها الكيان السوداني.

انت صدقت اني بقدر افكك مقالات و اصلح سراير حديد جد جد و لّ شنو؟




ساعود بفكرتي ...
و متفقين مبدئياً على فكرة التغيير الشامل و الجذري
و مختلفين لسه في قصة الفرز ...
مرحلياً انا شايف الفرز غير ضروري ... محتاجين لكل القوى ذات المصلحة الحقيقية - او كما قالا فلهمة ساي ادروب stakeholder ! - في اسقاط النظام ... بالعربي كدا تحالف حد ادنى ... سقفه " اسقاط النظام " و ( سلمياً ) .. و اشدد عليها، و استعادة الديمقراطية... من جانبي انا بسميها " ثورة الياسمين" المفضية لـ " ثورة الاصابع البنفسجية " ... هو الحلم بقروش يا شباب!؟

ياخ بالمناسبة دي - مناسبة مؤتمر الطلاب المستقلين - في الجامعة في انتخابات الاتحاد 1994 جماعتكم حرنوا دت يخشوا تحت شعار المرحلة " الوحدة الطلابية " معانا في ( التجمع )** بذريعة مافي تحالف حد ادنى!! ... و فاجاؤنا بتحالف مع " المحايدين " !!؟؟
تعرف يا الصادق عدم الشفافية و النقد هم المغتسين حجرنا ...
و بالمناسبة التحية و الاجلال للزول الجميل الرحل قبل اوانه " نصر الدين الرشيد "* كان زول مبشر بسودان مختلف ... و نوعية نادرة للكائن " المثقف " الحقيقي ... له الرحمة و تحياتنا حيثما كان ..

عرفت ليه قلت ليك قرّبت اتذكرك ... بكري الجاك دفعتي الكنبة بالكنبة في بزنس ... كان بفصل بينا التخصص بس! .. انا محاسبة و ادارة مالية و هو ادارة اعمال!
اطرف حاجة اني قابلتو و انا متوجه لمنافي الاختياري هنا و هو كان في آخر اعتمالات نفسو التواقة للتغيير و وساقتو ليكم بهناك ... قول لي الطريف شنو!؟
انا كنت ماشي القضارف اودع اخواتي متوجهاص للسعودية، اتفاجا ليك بزول دفعة فراش ليهو صابون و خردوات قيمتا كلها ما تركبني لحدي القضارف بس!؟ ... و الزول زولي ... ياهو بكري الجاك الما بغباني ذاتو!
بادرتو دا شنو يا خريج إدارة الاعمال!؟
رد بطريقتو الساخرة و المحببة : مالك ياخ؟ ... ما قاعد ادير في اعمالي ياخ!؟

برجع نتناقش في طريقة كل واحد فينا في " ادارتو لأعمالو " ... و نفتح دفتر الاحزان من الاول و للآخر
و نتحاسب - محاسبتنا القرينا دي تضيع ساي !؟ - و نشوف منو الغلطان و منو المصيب!؟

بس الله يرضى عليكم برا فسالة ياخ!؟
قال هاشم صديق ( على ما اعتقد ) حين ملحمة :

طريق الثورة هدى الاحرار ...

ما قلنا حاجة ...
اعتقد انو ما في طريق واااحد صحيح ما بقبل القسمة على اكتر من فكرة لـ " الثورة " ... و لّ شنو؟

-------
* مازلت اذكر عبارته الخالدة في نقد شباب الـ ( ج . د ) انهم : " عايشين زهو تمتع بجماليات الفكر الاشتراكي " ... و واحدة تانية في هجاء ركن كادرهم الخطابي وكتها " علي موسى " .. الركن اشتهر بترديد على موسى فيهو للاغنية الهابطة " جاياك يا ابشراء " و مارس فيهو الكذب و التضليل و الاتهامات و الاسفاف كأسخــف ما يكون!!
سماها الشهيد نصر الدين الرشيد بـ " الســـخف الابداعي المتمثل في " جاياك يا ابشراء! ) ...

اييييييه زمن!!

** ما تفهموني غلط ... ما عندي اي علاقة تنظيمية بيهو ... و كان وكتها الخيار الوطني البديل ذو الثقل السياسي و صاحب البرنامج ( الواضح )... طالما " المحايدين " طارحين نفسهم كتنظيم في الجامعة بس!!