أستاذي الفاضل الحب

محمد الكامل عبد الحليم
--
هآزول
داير تغشّني
ترميني كمان زي الجماعة
والوقعوا وما سمّوا
لا يا خوي
أنا عجيّز
باقيلي بس فركة كعب
وداك القبر
خلّي الشباب
يفرح يُسر
وليك يعاشر وينتشر
لأنه بالجد عشرتك
تفرح تسر
بتدي النجيضة
وما بتفرّ
تفرح لناس
فاقدين بِشِر
راجين يجيهم
بس خدر
يفرح مناهم
في العمر
ياخي إنت
كان كتّلتهم
وللا كان دروخوا
في كل غمر
لكن نقول
برضو ياكا
بتسعدم
طول العمر
هي الغشة ذاتا
ما تبسُر
وإن كان حتى بي قش ومُر
والله كلماتك مدوزنة
سيمفونية رائعة
لكن بي عزف منفرد
آه يا ولد
من وين دا جيت
من ياتو بلد
هو لسا في بلاد
بتقطر بي شهد
وتجيب سعد
آه يا ولد
أكيد إنت جايي من نجم السعد
وكتين يقولوا
هوي يا سعد
تسكت ترد
ما ياهو إنت الجاب سعد
للنحل لما وصلها حد
ترك الزهور راح مرتعد
من كلمة حلوة
وصافية ند
تقطر شهد
ولا بتعدّه عد
تسكت تكب
زي شايقي
صادف له شاي
في ديم سعد
ما صدق إنه الشاي
شاي سعد
وبجيب سعد
وعرق المحبة
دون وعد
الله أحد
واحد صمد
الي اعماق النفس
هوي أعماق نفس
دي حاجة سر
ويدخّلنا في حاجة كدي
حقة تصوف
وشي من ذكر
طهرها الوضئ
ويا ريت بشر
يحس بي قيمة الطهر
كيفن بحلق
زول وكتين يحب
بي هدا الطهر
وما يفتجر
ويركب جناح
لي داك طير
طيراً ملوّن
بي عبير
لا يقول دا زمهرير
ولا يقول صيفاً هجير
ويوصله منديل
حرير
لي زول هناك
في غربته وليلا المطير
ويفرح صويحب
العوير
وقالوا الكضب
حبله قصير
والجماعة وقعوا
يا طيف أنت القدير
واخضرارها اليانع


يتساقط علينا ثمار الحب رطبا جنيا.
الله عليك إت يا أمير
يسّاقط رطب جني
المعنى دا
أنا شفته وين؟
أبوشيمة وين؟
يا ربي وين؟
ما برضو في شيتاً طُهر
الطُهرو ما طُهر البشر
شيتاً كُتر
من روح معطّر بي عطر
أجمل كتير
وأعطر كتير
من حبّة لقاح
في قلب تَمُر
قدموا الثمار في حلل العشب والندي

وغنوا انشودة الصفاء ..غنوا
غنّي ياطيور غنّي
دا إنت اللّي بي لحنك شاغلني
إنت جاي من وين آزول
إنت ود آدم
وللا زول جنّي
غنّينا بشّ خلاشّ
- أنت من دون شك
- أجمل النحل
- الذي يطلّ
- مع إطلالة الفجر الذي أطل
- كما الزهور والطلل
- يا إخوتي أهناك حل
- مع هذا الرجل!
- بهدلنا وبشتنّا من يوم ما أطل
تسلم من كل شر يا رجل
وإطراءك عسل
وكلامك عسل
وإنت ذاتك عسل
يللا نقّط نقّط لا تبخل