أستاذي الفاضل الحب

والآن تبدأ إجراءات البحث والتقصي
- ها آناس الشات؛ وبرضو ديلك ناس شتات
سيبو فصاحة
املو الباغات
دي الكهربا
جات
كهربة الحب الما بتنفات
والثعلب فات
وفي ديله
أربع لفات
والنبل مغّات
ماهو بالتيمات
وردن غيمات
من عند النيمات
وشليلكم مات
ماخدين راحات
تحت الدومات
والشعر كمان
عامل دومات
-
هل رأيتم شيخ الحب
أو دا الأستاذ على قول جواز
--
قالوا لا لا
زمان كان بنسمعبو
دايرنو ليه؟
-
في ناس كدي زمان شافوه
في زمن الصغر
وقت الضفاير كان تجر
وكل زول كان في حالو حر
-
كان قال لها:


-- آبنيتي
الحب دا نار في الجوف
زي ما قالوا!
الناس واقفة أمامه
مسويالها صفوف
كمان بتتراجف
لو كان شتا أو صيف
أو زي التقول واقفين
قدام ملك تب ما بشوف
ويردم عقاب بالطوف
نتجارى نتكبكب
يمكن حبيبنا يشوف
أو يبقى لينا عطوف
ها داك زمان ما ولّى
صوف في صوف
يا بتي لا لا تفتّشي
للإبرة دي جوّة صوف
أو تمشي لي جمّاع
سائليه كيف الشوف
كان نحن ديل ماشين
فوق شوك
ودقيقنا خايف خوف
من ورّته اتجاسرت عليه الريح
وزدنا خوف في خوف
يا حبيبي قول موصوف
غير اللي قلته حروف
أنا ماني عارف ليه
بضرب كفوف في كفوف
مع إنه من حقك
تستني حب موصوف
بس وين تلاقيه
في زمن بقى دايرله ذاته عطوف
أنا حيرني موضوعك
كيفن يشوفوا الشوف
حتى المجاهر ديك
ما ظنيت تغيث ملهوف
ما باقي غير ندعو لي ربنا
يدينا ليه معروف
قادر على كل شي
هو الرحيم ورءوف
هو الرحيم ورءوف
قولي آمين
يا بنية
--
برضو ما اقتنعت
لكن يا شيخ إت قت لي
يمكن ألقاه وسط البسطا ديل
-
تقصدي ديل ناس شتّت ديل
عايني ليهم بقولوا شنو؟:


نحن ديل ناس شتّت
عيشنا مفتّت
طايوقنا برترت
والشعر الأكرت
ولسان بيأتئت
وعلى كل زول بنتشمت
وتاني بنشمت
لم لعيالك غتغت
غتغت
وقول دا أنا مربّت
مش على الكتفين
لا سنتنا نربّت
وداك مصروف
مايهمك خبّت
حتى عطاسك
ما بيشمّت
دي الناس ما خربت
وتربت تربت
ديل إيديك
لا ديل بتخبّت
وشيل لي راي غيرك
بس عبط عبط
-
يا أستاذ ديل شمات
أم شماشة
وينه الحب؟ مش ياهو البيرترت
دا رايك إنت الصار ياهو المتلخبت
وكان لي حيطانك عمّال بتشخبت
ولو ما مستحي افعل ما شئت
قال الأستاذ: إنت زعلت؟

هو شغل فصاحة
وللاّ دا ياهو مناحة
ارفق بي نفسك
أوغل برّاحة
-
ومن حينه اختفى الأستاذ
أصابها تأنيب ضمير
كيف تأتى لها أن
تتجاوز الحدود
مع أستاذها
ومن ثم فقدت نصائحه
وتنويراته المثرية
-
اضطررت أن أترك هؤلاء
واتجه في مسار بحثي
وقلبت أفكاري
هل أسافر في الزمن
يا حليل يا زمن أول
لعلي أجد إجابة في عصر
جاهلي، أو ماهلي
وإن بحثت في أجندة
قيس وليلى
أو عروة وعفراء
أو أي من ضحايا الحب العذري الضعفاء
النحفاء
وفجأة جاءني اتصال هاتفي
من إحدى وكالات الفضاء
من مصدر عليم
أتعامل معه لدى ظهور الشدائد
وعظام الأمور العواند
وبمجرد ظهور الرقم فرحت
علني أجد عند إجابة شافية
قال:
ألو مرحبا
ألست الباحث
عن أستاذها الحب
قلت بلى
قال قامت إحدى مصادرنا
بالاتصال به بعد الحصول
على نغمة جوال طائر في عالم غير مأهول
و"لقا الجوال مقفول"
أها ما حاولتو تاني
نعم؛ ولكن قيل لا يمكن الوصول
لكنه أشار في محادثة
أن هناك آخرين يحاولون التشعبط به
لكنهم للأسف كانوا من أشباه ابن سلول
قلت ألم تقولوا له
لخبتّ راس بتي البتول
راسا بقى معلول
قال لا ولكن هل هذا يجوز أن نقول
وهل ذلك من الأصول
رددت عليه ها إنتو ناس الأمن ديل
بتعرفوا الأصول
ياخي لما تلقاه قول قول
المهم بس يكون في يمكن الوصول
قال ياخي ما بقول
إنت ذاتك بقيت ملول
ياخي أقول ليك آخر القول
دا قبل سنين شافوه
راكب منضاد طايرا
بيه عصافير جنة
من زمن الأفول
قلت له طيب قرّط على كدا
بس وريني أمشي لي منو؟
وأقول يا منو؟
عشان يمكن الوصول
قال لي بضرب ليك تاني
أنا حسع في الكبري
والشبكة
قالت على وصول
وهكذا أصبحت بين همين
البحث عن ابنتي
التي خرجت تتمشى
وتركت سيارتا في الممشى
ودخلت كبري شمبات تتمشى
ويمكن جاتا جنية بحر كانت بتتعشى
عشان تديها كم غشة
وهي هيمانة زي صاحبنا
اللي دخل البوست وبطل ظاته يتعشى
-
وبحث آخر
عن هذا الأستاذ الهلامي
الذي اختفى أيضاً في ظروف
غامضة
تشير
إلى أن ثمة نظرية مؤامرة
حيكت في الظلام
للقضاء على الحب العذري
بالفعل البشري
وإن أسمتهم ابنتي على أنهم
ليسوا من البشر
لكن الواقع بهذا يستبشر
كابتن هرون
إنت نمت
ياخي بت أختك دي
مشت
إنت ساكت عامل لي
بتلقّط الأخبار
آزول إنت ما لحقت
حتى ناس الشمارات
والناس الكانوا هنا ديل مشوا
وين؟
ود الكامل ذاته بعد كلامه السمح
اختفى
يستاهل
أصله داير يوهمنا
إنه الشي دا لسا في
غايتو سنظل
نبحث في السماء وفي العراء
وتحت خيمة الجوزاء
عن حب له نظراء
وإن يبدو لنا السراب ماء ماء ماء