وجع وجع وجع!

Quote: ليهم الحق ما يعرفوني والله يا سيف ، لأنّو يا سيف يا خوي أنا ما كنت بقضّي إجازاتي في الحلّة ، فكان لمّن إجازة الجامعة تجي ، كنتَ بمشي أشتغل في الخرطوم عشان أطّلّع مصاريف السمستر البعد الإجازة ، لأنو أبويْ كان إتوفّى وأنا في أولى جامعة ، وما عندنا زولن بعدو يقرّينا ، فإجازتي الأولى الجامعيّة كنت شغّال فيها ( كمساري ) في أحد البصّات السياحيّة وكانت حديثة آنذاك وتُسمّى ( سند للنّقل ) اشتغلتُ فيها بواسطة واحد من أقاربي من سليم ، وأكثر ما كان يُتعبني فيها هو غسيل البص بالليل بعد الفراغ من العمل النّهاري ، أيْ وربّي وأنا وقتها جسمي نحيلٌ وما يزال حتّى الآن ، وكنتُ لا أقوى على الوقوف طَوال النّهار لجمعِ الفلوس من الرُّكّاب ، ما بالك بغسيل الباص في آخر اللّيل ، والنّوم بداخله ، لكين الله غالب ، وكنت بغطّي بيها مصاريف أخوي الكان بدرُس في جامعة الخرطوم ، وباقي القريشات بمشي بيهو أنا لي جامعتي بعد ما تفتح ، والإجازة البعدها اشتغلت أُستاذًا للرياضيّات التّخُصص في مدرسة كوبر الثّانويّة بنات لفترة بسيطة ، ومعهد الحكمة بالحاج يوسف الرّدميّة ( في بداية الرّدميّة ) مع بعض الإخوة الذين درست معهم بالجامعة ، أمثال معز حبشي وغيرهم وسامي حمزة ، وإجازة واحدة فقط القعدتها في سليم واشتغلت فيها في أحد الدّكاكين في الحلّة ، ولكن أعتقد أنّ الكبار من أهل سليم يعرفونني جيّدا ، خاصّة ناس اللّجان الشعبيّة القُدام ، فمرة من المرّات قالوا لي بأن أكتب لهم أبيات من الشعر العربي والآيات القرآنيّة على أعمدة الكهرباء الموجودة في الحلّة ، فقمتُ بكتابة أبيات شعر من اختياري وآيات قرآنيّة بالخطّ العربي على أعمدة الكهرباء ، فكان معظم أهل القرية وقتها يروْنني وأنا طالع في الأعمدة وأكتب ، وأظُنّها خلّدت لي ذكرة حَسَنة هُناك ، لأنّ كل مَنْ يسألهم : مَنْ كتبَ هذه الأبيات : يقولون له : ودّ الشفيع ، ولا أعلم إن كانوا قد نسوني الآنَ أم لا ، وبيتنا في سليم موجود وأخواني السُّغار موجودين أكيد بيعرفوهم بدلا منّي وبيتنا معروف ولو عايز وصف بيتنا أرجو أن تجد زمنًا لتقرأ فيه قصيدتي : ( ######ًا وحِمـارًا وعَـنْـزَة ) ، بس أنا برضو طوّلت الغربة يا سيف ياخويْ والآن أنا داخل على 11 سنة من البلد . كَسْـرَة : * علا بالمناسبة إتّ ذاتك يا سيف أخويْ غلطان ، الودّاك شنو تسأل عن زولَن مِفَلّس زَيّي كِدَة ، لأنُّو في كثيرٍ من الأحيان تجد لغة المال هي الَّتي تتحدّث يا صديقي ؟ ( ههههههه ، أمزح والله ) . لكَ تحيّتي أبدًا .