شيخ الأمين دا منو؟!

Quote: شيخ الأمين يحكي: حيراني جكسي ومحايتي بيبسي..! الحلقة الاولى الأمين عمر الأمين طه، من مواليد الخامس من نوفمبر 1965م بحي ود البنا، درس الإبتدائي في ود البنا والثانوي في أم درمان الأهلية والجامعة في السعودية.. هكذا تقول شهادة ميلاده، لكن حيرانه وجيرانه والأحباب، ينادونه بـ(شيخ الأمين) وكفي..! لم يوقفه أحد يوماً ليسأله: شيخ الأمين منو؟! حتى نحن لم نجرؤ على سؤاله، فقط إبتعدنا منه كثيراً ثم (مسكنا) مرافقه الصادق وسألناه: إنت زولك ده إسمو شيخ الأمين منو؟! بطوله الفارع وإبتسامته الوضيئة وتواضعه الجم، إستقبلنا (شيح الأمين) في مدخل مسيده (القصر) بحي ود البنا في ساعة متأخرة من الليل يسبق ترحيبه بنا عطر متدفق من بخور كان يشتعل في (مبخر) لا يشبه إلا مسيد شيخ الأمين..! شيخ الامين حكى عن كل شيء: فرية متاجرته بالزئبق الأحمر، وشبهة ثرائه الواسع، وكون حيرانه كلهم من الحناكيش وأولاد المصارين البيض، وإبتداعه لمدرسة جديدة في التصوف و...! (1) إبتدر حوارنا مع (شيخ الأمين)، زميلنا الدكتور فتح العليم عبد الله، أستاذ الحضارة بجامعة الخرطوم الذي أعلنت (صلعته الباهية) و(علامات أخرى كثيرة) إنه الأكبر سناً من بين رفاقه المحاورون: وجدي الكردي وأحمد يونس والأديب علي يس، (ناس حكايات) الذين كانوا ضيوفاً على شيخ الأمين.. سؤال فتح العليم الأول كان: من أين بدأ شيخ الأمين مملكة الحواريين الواسعة التي يتربع عليها الآن؟! حين تحدث شيخ الأمين، إستدارت إليه العيون والآذان، خاصة مرافقيه الذين جلسوا على ركبتيهم في تأدب، يتأرجح منهم الروؤس بين الأكتاف كلما تحدث الشيخ أو تبسمّ.. لم يتخل شيخ الأمين عن تميزه حتى وهو في أخص أوقات راحته، هكذا كانت تعلن جلابيته تركوازية اللون و(نعله) البني وشاله الذي إتخذ من ذات اللون شعاراً، هذا غير مسبحته البنية التي كانت تخالطها بعض حبات من سواد. قال شيخ الأمين: (أخذت الطريقة القادرية المكاشفية من الشيخ عبد الله يوسف قرشي المكاشفي، المكنى بود العجوز، وهو بدوره أخذ الطريق من الشيخ عبد الباقي المكاشفي (الشكينيبة). حين إلتقيت الشيخ عبد الله ود العجوز وهو في طريقه للحج أواخر السبعينات، كانت الشيوعية (موضة) في أم درمان، تحديداً في (حلتنا دي) حتى سموها (موسكو).. الشيخ ود العجوز وجد أن التصوف بين الشباب يكاد يكون معدوماً، فقال لي: (إنتبه للشباب وأعرف ميولهم واختلط بهم)، ثم طلب مني نشر المبادئ الصوفية بين الشباب، لأني حسب قوله: (أفهم لغتهم). بعدها ـ والحديث لشيخ الامين ـ بدأنا التأهيل بعد أن تخرجت في جامعة الملك عبد العزيز كلية إدارة الأعمال، وكانت أية خطوة يخطوها الشيخ ود العجوز تبدو فيها حكمته وبعد نظره، كنت أتخيل إني سأدرس في الجامعة إصول الفقه، أو أصول الشريعة لكن الشيخ عبد الله قال لي لا..! * ليه قال لا؟! ــ لانو حسب كلامو، سيأتي وقت لن يسأل فيه الناس إن كان شيخ الأمين حافظ للقرآن ومتفقه في الدين، بل سيسألون عن مؤهلاته، وأهو.. كلامو (مشى وجا). * يعني إنك لم تدرس الشريعة أو الفقه، فكيف جمعت حولك كل هذا الخلق؟! ــ مين القال ما درست الشريعة؟ أنا بدأت الفترة التأهيلية عند الشيخ ود العجوز ودرست على يده الشريعة والفقه، وعندما جاء لأم درمان قال لي: شوف يا شيخ الأمين: تفرش البرش، وتملا الكرش، وتدي القرش، وتذكر رب العرش..! * يعني شنو الكلام ده؟! ــ تفرش البرش، يعني أن تصلي بالناس، وتملأ الكرش يعني النفقة أو الأكل والشراب، وتدي القرش لو جاك زول متضايق، وذكر الله هو ذكر رب العرش، ويجب أن لا تقدم له كرت دعوة لزول تقول ليه أنا شيخ، ولا تكتب هذه زاوية، وشغلتك كان ربنا قبلها منك، الناس بتلم فيك براها، ولو ما قبلها منك، لو شلت ليك مكرفون ما في زول بقيف معاك..! من حكمة الشيخ ود العجوز انو قال لي يا ولدي لو إشتهرت بأي حاجة الناس بتشكرك، لكن الشهرة بحق الله دي الناس بتسمعك فيها ستين ألف حاجة، وكان بتقدر على جنس دا أمشي، وكان ما بتقدر شوف ليك شغلة غيرها..! * بتسمع ستين ألف حاجة.. منها حيرانك الجكسي ومحايتك البيبسي يا شيخ الأمين؟! ــ شوف الكلام ده أطلقو واحد في مجلة عربية تقول طلقا في نار..! في ذمتكم هسع لو جبت ليكم جردقة بتشربوها؟ لو عملت ليكم كسرة بي موية بتاكلوها؟ إشمعنا البيبسي عندنا بقى حرام؟! * طيب البيبسي عرفنا.. الجكسي جاك من وين؟! ــ من أرض الله الواسعة دي..حكاية الرقص المختلط ده كلام فارغ وما ممكن يحصل أبداً.. * لكن عندك بنات بيحضرو الذكر في مسيدك؟! ــ أيوة.. بس من وراء حجاب.. عندهم مكان مفصول تماماً من الرجال. * يعني من حيرانك بنات جامعات؟ ــ طبعاً.. * ممكن تقبل في حيرانك بنات منحرفات؟! ــ أكيد..ديل بالذات أنا بركّز عليهن..! * ليه؟! عشان كده .. (......)..! لتعرف ليه.. تابع بقية الحلقات المثيرة من حوار (حكايات) مع شيخ الامين تباعاً في أعدادنا المقبلة.