من الان ..كلكم معزومين فى رمضان ... ماعدا شلة التهريج !!

Quote: ترويسة: انتو ناذر دا ما قال خلا الشعر الاتومسفيري.. شعر العجلات دا جابو من وين!!؟ والله غايتو الزول لمن يكون راميهو حصان!!!

طبعا شعر المرثية بتاعت العجلة ديك كان من نوع (المرثيات) أها هسي حا أقول ليكم قصة شعرية تانية من بداياتي ونهاياتي الشعرية وهي من نوع (البهدليات)

طبعا حا تستغربو من الإسم لكن القصة إنو نوع القصيدة دي كنت أول مرة أألفا وأنا كنت قايلا من نوع شعر الهجاء لكن لما عرضتها على شاعر من حلتنا عشان يديني رايو قام قال لي دي من موع البهدلة لإنك إنت ما هجيت الزول دا .. إنت بهدلتو عدييييل كدة ..

والقصة يا سادة إنو زمان كان في واحد جارنا عندي معاهو مشاكل طوالي .. من زمن كورة الشراب وكورة شلفت أو سلقت لو بتعرفوها . ما بنريد بعض أصلو .. المهم الزول دا عمل لي فتنة مع واحد تاني من أصحابي قمت أنا نجرت فيهو القصيدة .. ولمن نجرتها كنت متكيف شدييد منها شاعر روحي ما أقل من جرير الهجا الفرزدق ومن شدة فرحتي بالقصيدة صورت منها كم نسخة كدة وبقيت شايلم معاي .. كل ما ألقى أولاد الحلة متجمعين قدام الدكان او في اللستك الفي الكزرنة طوالي أطلع معلقتي وأقول ليهم القصيدة (طبعا بكون رافع يدي زي صور البروفايل بتاعت الجماعة ديلك!!) أها لمن الجماعة يتكيفوا من القصيدو بقوم أدخل يدي في جيبي وأوزعا ليهم جااهزة ..

صاحبنا (المهجوء به) إن صح التعبير .. بقت سيرتو في لسلن اليسوى والمايسواش وقصيدتي سارت بيها الركبان في أي لمة كورة أو فتة دكان أو لمة قدام محل الصعود .. صاحبنا ما إستحمل المنظر وجا يتشاكل معاي و ....

المهم خلونا من نتيجة الشكلة ونجي للقصيدة البهدلة ..

لي خل رفيق النجس علاجو علي مستعصي
إذا تحرك ضاحكا حمار الوحش في الرفس
جاحظ نتن الرائحة كذكر البوم والتيس
في كل مكان ذاهب يصاب بدائه (اللحس)
في مأتم أو محفل وسط النساء في العرس
فلانة أضحت حاملا وفلان أصابه الفلس
رب هب لي قوة لأحمل ذلك الفأس
وأهويه على الكلب وأحطم طالعي النحس

***************************

فجمعن في يوم مشرق أنا وأصدقائي الخمس
شاهد لكم طوال عمري بشدة الذكاء والحدس
لو تعرفوا هذا الفاسق وأضع في رأسكم الكأس
فقالوا دون تفكير : هذا جارك الحبشي ..



صنفرة :

بعد أن إنتهيت من سرد نماذج من شعر المرثيات والبهدليات خاصتي سأعود لأحكي لكم نماذج من شعر المدح والغزل والرثاء ..

والله يا ود عكر بختك .. شعري التقليدي دا ما حصل نشرتو في بوست قبال كدة .. وإذا الشغلة لفقت معاي ولقيت تشجيع فحا تكون إنت الإكتشفتني