خبر وتعليق: البشير يعرض النفط مقابل الوحدة

Quote: المهم يادينق الحاجات اللى انت قلتها دى كلها انا متفق معاك فيها. لكن الا توافقنى ان كلامك المقتبس ده كان مفروض تكونوا قاعدين معانا عشان نعمله مع بعض ,, ? الجنوبيون إذا كانوا اختاروا الإنفصال بناءا على غياب الحاجات الـلى ذكرتها انت دى كأنهم يقولون لنا انتوا يا شماليين كلكم واحد (كلكم انقاذ) يعنى انت هسع ومن خلال ماتكتب بتحمل الإنقاذ مسؤلية اختياركم للإنفصال وإنت عارف ان الحاجات اللى انت مطالب بيها دى مابتتحقق الا اذا حدث تغيير والتغيير ماهو مطلب للجنوبيين بس وإنت عارف كده. طيب ما كان الأصح تقعدوا معانا عشان نعمل التغيير مع بعض? بعدين يادينق الجنوب لما طالب بالتغيير ما كان الدين هو السبب فإذا رجعنا لأسباب الحرب الأولى لم يكن السودان يحكم بقوانين مستمده من الشريعة الإسلامية واسباب الحرب الثانية كذلك اذ بدأ التمرد فى مايو 1983والقوانين موضوع الإختلاف وضعت فى سبتمبر من ذلك العام. إذن يادينق إنت بتطالب بتحقق الحاجات الفوق دى وإنت اخترت الإنفصال فما جدوى مطالبتك بوجودها وإنت اصلا حددت موقفك .. بعد ما الجنوب ينفصل تانى بتهمك فى شنو انها تتحق ولا ماتتحقق ,وكيف يكون فى مساواة وإعتراف بحقوق وصاحبها تخلى عنها وترك للآخر الجمل بما حمل?, نحن نفهم مطالبتك بها اذا كان اختيارك هو الوحدة ونجى نقول ليك ايدنا فى ايدك ودى مطالب لاغبار عليها. هل نفهم من مطالبتك بها الآن انك لم تفقد الأمل?