عبد الواحد نور ... مرحبا بك فى وطنك الثالـث !

Quote: تصدقي لو قلتَ ليك حقتك إنت دي الكتبتيها بيدك طلعت صاح، أمَّا الما معروفة كتبها منو دي، فياها الغلط. قول لي كيف يا ود البتولا؟ أقوليك لأنَّك هربتِ من التشكيل، ورسمتيها سادة ساكت، عشان كدا مرقتِ من الغلط. أمَّا بتاعة الحوار، الأصل، التي أفتى فيها فقيرنا، الظريف والمتشوبر، ملاسي، بقوله: وحاة الله (يا العشاء أب لبن) كُتبت غلط، عان ساكت جنس الفتاوي والتشوبر دا. ألم تكتب هكذا: Quote: اما السَدى فهو التعايش بين اقوامه هل رأيتم في حياتكم أية لامٍ شمسية لا تفرض، فرض عييييين، (التشديد) على الحرف الشمسي الذي يليها؟ الصواب أن تُكتب هكذا: السَّدَى. أو فلتترك دون تشكيل. أما أن تكتب الفتحة (براااها) دون تشديد، فهذا خطأ بيّن وواضح. بالمناسبة، إنت مشكلتك شنو يا ملاسي مع المفعول به؟ عندك مشكلة قدر الضربة معاه. أوعك تقول لي ياتو مشكلة؟ بعوّقك. أقصد إنو الشواهد هي البتعوّقك. نعمني زول في الكتابة دي، عيني عين (مندوف)، وهو أسرع وأشرس قناص في الجوارح السودانية الطائرة. *** أية مادة تنشر في جريدة مسؤولية تحريرها تقع على عاتق أهل الجريدة، غايتو الناس ديل بشيلوا قروش سااكت دون إحسان للعمل مطلقاً. الهمزات من أول سطر لآخر سطر كلها غلط، وأعد من طرف، والجرائد السودانية كلها بالطريقة دي، والهمزات ما مسألة ثانوية ساكت، بل هي مسألة حاسمة خصوصاً في توجيه الأفعال (أذهبُ أنا "مضارع"، اذهب أنت "أمر"، أفهمَ الرجلين عليٌّ "تفضيل"، أفهمُ مسألتك "مضارع"، افهم الدرس "أمر".. إلخ). بل أحياناً بتتوكر في حتة تدمر المعنى تماماً زي الكعبة التحت دي Quote: زاد الأمر بلبالاً تعامل النظام مع القضية، منذ منشئها، تعاملاً امنياً وإنتقامياً (منشئها) بينما المقصود، والصواب: مَنْشَأها. (الكسرة المفروض تكون تحت الهمزة المصنقرة فوق العصا دي، الكمبيوتر ما حفظوهو ليها لسع، لو عملتها بتنزل بتحت وبتبقى لا تعني أي شيء). (منشئها) تدل على الفاعل أو المنشئ، ولا يمكن قراءتها بعد (منذ) الواردة في الجملة، والتي تجر ما بعدها، إلا هكذا (مُنْشِئها). (مَنْشَأها) تدل على "حيث" أو "حين" نشوئها، بحسب السياق. أما أم البشاعات فهذه Quote: لا يقدم ولا يؤخر في هذا الأمر إستعانته بالحركة الشعبية فلولا إستقوائه بها لما كان في مقدورها أن تدعمه. (لولا) حرفٌ يفيد بامتناع الجواب لوجود شرط. وقاعدتها التي بَسَّطناها في بوست إصلاح الكتابة, لمن ابتغى إليه سبيلا، تقول: دائماً مفروض يجي بعد (لولا) اسم وهذا الاسم بكون (مرفوع) وكذلك الحرف (لوما)، تنطبق عليه ذات القاعدة والتعريف. والاسم المرفوع دا بنعربو (مبتدأ) لخبر محذوف وجوباً. الصواب: فلولا استقواؤه ولسع تاني رااقد. --------- حكاية الهمزات وضبط الكتابة دا، لو أنا مسؤول في جريدة، ودا شغلهم، والله بجيب ليهم سبورة وطباشير نص الديسك، أول حاجة يتعلموا الكتابة كيفن لرقبتهم، وبعد داك نبلابيهم خلق الله. ------------ معليش يا شباب، لولا شلاقات ملاسي دي ما كان بريتكم. أنا مجتهد مع هذا الرجل كي يحفظ ما قلناه له سابقاً من بيت ابن الرومي، وكذلك اجتهد معي ود البشرى، جزاه الله خيرا، لكن برضو أبى يحفظ: أفق صاغراً من نومة الجهل إنها .... تعودُ على نُوَّالها بوبال