|
|
 غشتني يُمه الدُنيا مرة .. خَلتني فوق ريدكـ أريد .. قصيدة الي مَن فارقت الدنيا ولم تفارقنا
|
يٌمه وحيات الحنان
بتطري أيامنا الزمان
أيام بديت جواكـ حياتي
ورطعت من شطر الأمان
أنا تاني راجع لي دِريبك
وداير أعزف ليكـ كمان
أشيل قساوة الدنيا منك
وأوهبكـ عمري إمتنان
أنسي في هداءت ملامحكـ
كل َلَحظة إمتهان
ما لَحظة من طيبة خواطرك
عِنـدي بي خاطر الزَمـان
….......
يا راحلة في نْبض الوريد
غَشتني يُمة الدنيا مَرة
وخَلتني فوق ريدِكـ أريد
وردتا ريــــد المابــــريدني
وأصبحتا في الأحلام أشيد
أدمنتا في ريدو السَهر
وفي سكة الأحزان حِفيت
قدقد نعالاتي السَفر
وكَسر شراعاتي المُحيط
لا غَلب يوم إشتياقو ولا ظَهر
لا صحا فيو حِس القصيد
واليلة راجع لي دريبِكـ
ناوي يُمة علي المَبيت
…...
العيون الصادني ريدها
وريدها أصبح لي رصيد
رامية فوق البَر شباكها
لقيتها تصتاد في البصيد
وقعتا في حَضرة غرامها
واصبحت درويش في المَسيد
و حبة حبة …
خَلتني في دُنيا المَحبة
من زيرها أشرب وما رِويت
والليلة يا نبع الأحِبة
هَدم آمالي البَنيتها
وتاني راجع من جديد
أنسي في هداءت عيونك
كل دمعاتي البكيتها
والمخاوف لما سَوت قَلبي بيتها
وكلي خطواتي المشيتها
شَديت صواري الرَجعة ليك
ويوم عليكـ
قَربتا أوصل
يا آخر السكة البَديتها
من بلاد الغربة جيت
والغربة في الاعماق سَقيتها
رويتها من حبر القصيد
غَشتني يُمة الدنيا مَرة
وخَلتني فوق ريدِك أريد
وردتا ريــــد المابــــريدني
وأصبحتا في الأحلام أشيد
أدمنتا في ريدو السَهر
وفي سكة … الأحزان حِفيت
لا غَلب يوم إشتياقو ولا ظَهر
لا صحا .. فيو حِس القَصيد
واليلة راجع لي دريبِكـ
ما هدي جَمل الشيل نَهر
لا أنكسر قلبي العنيد
…...
بي يقينك إيماني يقوي
لو زمن حاول يقاوي
صبي لو كان شاياً أحمر
ومدي ضُلك للضَحاوي
الدنيا ما توبها المَحنة
و السكة ترتارت الخطاوي
ومهما البُعد
طال بي السُهد
في آخرو ما ضلو الغناوي
وأنا تاني راجع لي دريبكـ
والدِنيا في منديلي طاوي
ويا ها الدٌنيا أم عينين حٌول
كُل العليو يا يٌمة بملكـ
عراقي لابسو مع السِفنجةْ
ومن بيتنا ضالع للشُقل
في جيبي قرطاس التسالي
وفول مدمس ….. وما بخُل
ضيفنا أقلع ليو نعالي
وامشي حفيان التكُل
بيتنا بي الحنية عامر
لو سالت العين من كُحل
قبلما يكمل سلامو
من بعيد تَسمع أُكل
....
و لو شوية
تشدي تحت الصاجة نارك
زلابية ترميها العشية
ونحنا ما فضلنا سُكر للزلابيه
لحسنا حتي السٌكريه
و لما نلعب في إلاجازة
وفي المَطرة ….
تجرحنا القزازة
من بعييد نسمع بْريا
و يوم يذييد حبت دلعنا
و قبلما ... نمشي العياده
يمة دايرين الزيادة ؟
القميص أب كُم طويل
ما القميص المكوي ساده
ونَبكي من شِدة زعلنا
ونتكي راسنا علي الوساده
.....
كولي هْمك في المدارس
كل واحد فينا يْطلع بُكرة فارس
لمسنا بالحِنية حُبكـ
وقفنا للفيضان متارس
لِبســنا إصرارك فَنائل
ومهما البرد في السكة قارس
من فصول الاولية
من فول وسلطة وعيش كبرنا
وقفتي للناظر وليا
لما جينا الدُنيا دوغـــري
ونجحنا ساكت أرجلية
جينا شايلين القَضايا
ديمة في العشرة الاوائل
رغم حاصل القسمة نجمع
وبرضو بنحِل المسائل
والقالو فراق الحبايب
جيناهو حافظين الجداول
ومن قبلي ما يقوموا النوائب
في شمال سهم الخرايط
من نمولي حدهــا لي حلايب
حا نْبني بالعَرق الخَلية
....
أولي .. تانية ... ونمشي .. تالتة
نبقي ذي كل الدكاترة
و إنتي تَنجِبي فينا شاطر
وأختو شاطرة
المهندس و الصنايعي
المزارعين و البياطرة
وكل زول علي نيتو بحلم
بكرة ياما يلقي خاطرة
...
ما نحنا من حضنك مرقنا
والدنيا كان يادابها ماطرة
شٌفع بنمسح في عَرقنا
في إيدنا كراس الحِساب
يا ولد ما تملي إيدك بالحبر
ما تملي إيدك بالزِفِر
إتوضي صلي الفجر حاضر
ختوا في الشنطة المساطر
لو الله هَون في المشئية
بٌكرة صَباحي العَطية
تَشدي تحت الصَاجة نارك
زلابيا ترميها العشيه
و نحنا ما فضلنا سٌكر للزلابيه
لحسنا حتا السكريه
.....
انتي ماشة علي الجَزر ؟
لا …. للفرم !!
يللي يا أولادي الشُرم
يا الله من شر البليا
دارعة توبك بالخُرٌم
ماشة ووين ؟
يا والدة عارفة
رضاك دين
لو جانا ضييف ؟
جاهزة معراكة العجيين
لو ضيفنا يرجع الف مرة
بنسالمو دايماً ب الايدين
حتي لو في إيدينو طين
حتي شـوق شجَرتنا برا
ليمونه خَضر وتاني شَرا
فروعها ليو مدلدلين
لو برضو مستعجل كتير
بلقي فوق عتبتنا زير
كوز موية …. مَربوط للعطاشي
للصَقير و للكَبير
وبابنا دائماً صدرو فاتح
في السَهلة فارشين السَرير
واجب عليو حق الضيافة
ما ضروري يكون أكلنا
صينية بي اللوز و الكُنافة
وما ضروري يكون …. نزل آخر محطة
نقابلو والشوق بي كثافة
بس ضروري يخش يسالم
تتهَز أيديو من ك ت ا ف ه ا
لو يَصل حِتنا سالم
والله عالِم
بيتنا ناصية ولونو بُني
لا عواميد لا سلالم
لو جانا ضيف
البيت نضييف
للضيف يغني
نتجارا في مطر الخرييف
.....
نحنا جك الفول نشيلو
نشحد البرقاوي شْحدة
لو يتم الجِبنَة كيلو
يا عمي كُمــشة فول ذيادة
إنشاء الله من مويت سَبيلو
ولما نعطش يا شمسنا
يا حليل …. سُكر عصيرو
وقت النهار الحار يسَخِن
و الشمس تَحرِس مَقيلو
العرق في الجوف ينقط
و الدموع ف العين يسيلو
الموية قاطعة
و نحنا نضحك
ونحنا نشفط في الهواء
و مرة نبكي ومَرة نَبـلع في الدواء
المهم في السكة نمشي
حتا لو نرجع وراء
الجردل الصحن المطَرقع
تعزمي الريح لو يوشوش
قبل الدروب الشَــاقي تَبلع
مارقة قلبك في الشوارع
و توبك اللابساو مَبرقَع
شايلة حنية و شهامة
ماسكة صينية و غمامة
شايلة هم الاهلو ودع
لامن ارجع ب السلامة
و لو عتوت في حوشنا بَردَع
.....
ولو مرة تاني الضيف يجينا
طرقة طرقة الكسرة ترمي
عشانا لو بصلة وس خ ي ن ة
قبلت انظار المدمع
ما بيتنا في الطوفان سفينة
المهم في الليل تنور شمعة ….. ولا تَبٌق رتينة
والرتنية يوم تَبَقبِق وجازها يكمل
نِحنا ما ياداب صِحــينا
وكل واحد إيجييك مدَردق
و عشتا يا بيتنا المسَردق
عشتا يا بيتنا المُسالم
لا عواميد لا سلالم
حتي الحمام من برجو فَرتَق
لا مسلح ... لا مَطرطش
لا عرش باللطين مَجرتق
ونحنا في حضن إلتفافك
البعييد بي قلبو شافِك
المدي رجلو لحق لحافِك
نحنا حا نقوم ب المحَنة
لو يمة طال في الليل وقافك
نحنا ما شلتينا نجمة علي كتوفك
و صوتنا هادر بي هتافك
انتي تحرسي فينا نحنا
و نحنا نحرس في قفافك
و في ضيوفــكـ
...
يا نوم تعال
والنوم بجي
و قبلما نسمع خطاويو في الحِجي
بري بلال
سكت الجهال
و بسكتوا الجهال
بنعسو النجوم
وبطلع القمر الثريا
تبروا من شر الضريا
تشدي تحت الصاجة نارك
زلابية ترميها العشية
ونحنا ما فضلنا سكر للزلابيه
لحسنا حتا السكريه
نحنا بي فرح الطفولة
لِعبنا عَِسكر وعَسكرية
ب اللعب نقضي الاجازة
و لما تجرحنا القزازة
من بعييد نسمع بَريه
ويوم يذيد حبت دلعنا
تاني ندلع ذيادة
و قبلما نمشي العيادة
القميص ما لونو وردي
القميص المكوي سادة
ونَبكي من شدة زعلنا
و نتكي راسنا علي الوسادة
لا دموع سالت مغبة
و لا دموع صبت حسادة
و في السبيل قبل المحطة
عارفين عملنا الليلة غلطة
و نحنا ما أخر ولادة
نلقي راسك شيبو خطي
نفرد الاحلام خريطة
عمرنا جمبكـ أه تَمـطي
والطريق لافيهو توبكـ
وقت الغبار الدنيا غطي
والدموع السايلة جنبك
من بصلة سالت فيها شطة
وتاني تدينا الحلاوة
ما نحنا اولاد فنجرية
كبرنا في العز و الحفاوة
نبرا من شر الضريا
.....
نحنا قبل الكِسرة تَبرُد
كلي واحد شال حتيتة
حِتة …. حِتة
بقينا …. سِتة
دُنيتنا قلبك ياهو بيتها
وعشتا يا بيتنا المكوع
بيتنا واقع حيطة حيطة
المطر وكتين يحولق
والابرة تدخل جوا خيطها
ندخُل الحيشان عديل من غير نَكوكِو
لا جَرس من فوق ندوسو
ولا ك ل ب في الحوش بهوهو
راكوبة نَقط فينا زيتها
ولو جانا …. ضيف و الحر بشوشِو
ك ل ب ن ا ابدا ما بِكَرِج في ضروسو
ضَنبو ســاي للضيف يلولو
و يوم .. جبينك نورو …. بِسطع
ونورو يَجهَر يوم نبوسو
و حتا ضيفك لما يدخل
إلا يمرُق بي عروسو
…...
ونحنا قبل الحلة تحمي
كل واحد شالها لحمة
واللحم في نارو بِنجض
قلبنا فيك الدنيا منقَد
ولما ذاد حبت دلعنا
قلنا من العشوة نَحرد
ونحنا جنبك ما بنذهج
ولما تضحكي
تتفتح أزهار البنفسج
............
كان معاها السمحة نَشهد
نظرة ذي ما تقولي لمحة
نظرة واحدة و ريدها فَرهد
قندول تَميل بيهو قَمحة
لمحة واحدة و نشتهيها
و تبقي لينا الدنيا سمحة
ما الدنيا أيه يا يُمه غير
كراس أشخبط فيهو وامحي
.......
وانتي في صاجك تعوسي
وانتي في الحردان تبوسي
....
ولو شوية
زلابيا ترميها العشية
ونحنا ما فضلنا سكر للزلابيه
لحسنا حتي السكريه
و نحنا ب فرح الطفولة
للعسكر ادينا التحية
بي اللعب نقضي الاجازة
و مرة تجرحنا القزازة
من بعيييد نسمع بريا
تبروا من شر الضريا
....
يا ود تعال
يا ود أوكل
قلبك المفتوح تُكل
يا ضلام الريح تفوفي
في طشاشت العين كوحل
والشمعة ضوايت العواتم
الشمعة وهاجت المٌقل
وانتي فينا تخلفي
للزمان الجاي رسل
اتكلنا عليك عرايا
ما الهدوم يمة الموثل
والدنيا ما عراقي لابسو مع السفنجة
من بيتنا ضالع للشُقل
وفي حيبي قرطاس التسالي
وفول مدمس وما بُخل
كل العليو يا دنيا بملك غير نعالي
دوكة خمارة وتُكل
محمد الفاتح خالد
[email protected]
|
|
 
|
|
|
|
|
| العنوان |
الكاتب |
Date |
| غشتني يُمه الدُنيا مرة .. خَلتني فوق ريدكـ أريد .. قصيدة الي مَن فارقت الدنيا ولم تفارقنا | محمد الفاتح خالد حسون | 11-23-10, 08:06 PM |
| Re: غشتني يُمه الدُنيا مرة .. خَلتني فوق ريدكـ أريد .. قصيدة الي مَن فارقت الدنيا ولم تفارقنا | محمد الفاتح خالد حسون | 11-24-10, 00:34 AM |
| Re: غشتني يُمه الدُنيا مرة .. خَلتني فوق ريدكـ أريد .. قصيدة الي مَن فارقت الدنيا ولم تفارقنا | محمد الفاتح خالد حسون | 11-24-10, 02:01 PM |
| Re: غشتني يُمه الدُنيا مرة .. خَلتني فوق ريدكـ أريد .. قصيدة الي مَن فارقت الدنيا ولم تفارقنا | عماد شمت | 11-24-10, 04:09 PM |
| Re: غشتني يُمه الدُنيا مرة .. خَلتني فوق ريدكـ أريد .. قصيدة الي مَن فارقت الدنيا ولم تفارقنا | محمد الفاتح خالد حسون | 11-25-10, 04:13 PM |
| Re: غشتني يُمه الدُنيا مرة .. خَلتني فوق ريدكـ أريد .. قصيدة الي مَن فارقت الدنيا ولم تفارقنا | محمد الفاتح خالد حسون | 11-25-10, 07:31 PM |
| Re: غشتني يُمه الدُنيا مرة .. خَلتني فوق ريدكـ أريد .. قصيدة الي مَن فارقت الدنيا ولم تفارقنا | محمد الفاتح خالد حسون | 11-25-10, 07:34 PM |
| Re: غشتني يُمه الدُنيا مرة .. خَلتني فوق ريدكـ أريد .. قصيدة الي مَن فارقت الدنيا ولم تفارقنا | محمد الفاتح خالد حسون | 11-25-10, 07:36 PM |
| Re: غشتني يُمه الدُنيا مرة .. خَلتني فوق ريدكـ أريد .. قصيدة الي مَن فارقت الدنيا ولم تفارقنا | عثمان نواي | 11-25-10, 07:35 PM |
| Re: غشتني يُمه الدُنيا مرة .. خَلتني فوق ريدكـ أريد .. قصيدة الي مَن فارقت الدنيا ولم تفارقنا | محمد الفاتح خالد حسون | 11-25-10, 09:17 PM |
| Re: غشتني يُمه الدُنيا مرة .. خَلتني فوق ريدكـ أريد .. قصيدة الي مَن فارقت الدنيا ولم تفارقنا | محمد الفاتح خالد حسون | 11-26-10, 04:08 AM |
| Re: غشتني يُمه الدُنيا مرة .. خَلتني فوق ريدكـ أريد .. قصيدة الي مَن فارقت الدنيا ولم تفارقنا | محمد الفاتح خالد حسون | 11-26-10, 05:43 PM |
| Re: غشتني يُمه الدُنيا مرة .. خَلتني فوق ريدكـ أريد .. قصيدة الي مَن فارقت الدنيا ولم تفارقنا | سيد إبراهيم علي | 11-26-10, 09:36 PM |
| Re: غشتني يُمه الدُنيا مرة .. خَلتني فوق ريدكـ أريد .. قصيدة الي مَن فارقت الدنيا ولم تفارقنا | سيف اليزل برعي البدوي | 11-27-10, 01:28 AM |
| Re: غشتني يُمه الدُنيا مرة .. خَلتني فوق ريدكـ أريد .. قصيدة الي مَن فارقت الدنيا ولم تفارقنا | سيف اليزل برعي البدوي | 11-27-10, 01:35 AM |
| Re: غشتني يُمه الدُنيا مرة .. خَلتني فوق ريدكـ أريد .. قصيدة الي مَن فارقت الدنيا ولم تفارقنا | سيف اليزل برعي البدوي | 11-27-10, 01:37 AM |
| Re: غشتني يُمه الدُنيا مرة .. خَلتني فوق ريدكـ أريد .. قصيدة الي مَن فارقت الدنيا ولم تفارقنا | محمد الفاتح خالد حسون | 11-27-10, 05:46 AM |
| Re: غشتني يُمه الدُنيا مرة .. خَلتني فوق ريدكـ أريد .. قصيدة الي مَن فارقت الدنيا ولم تفارقنا | محمد الفاتح خالد حسون | 11-27-10, 06:23 AM |
| Re: غشتني يُمه الدُنيا مرة .. خَلتني فوق ريدكـ أريد .. قصيدة الي مَن فارقت الدنيا ولم تفارقنا | هند محمد | 11-27-10, 06:42 AM |
| Re: غشتني يُمه الدُنيا مرة .. خَلتني فوق ريدكـ أريد .. قصيدة الي مَن فارقت الدنيا ولم تفارقنا | محمد الفاتح خالد حسون | 11-27-10, 07:30 AM |
| Re: غشتني يُمه الدُنيا مرة .. خَلتني فوق ريدكـ أريد .. قصيدة الي مَن فارقت الدنيا ولم تفارقنا | محمد الفاتح خالد حسون | 11-27-10, 08:59 PM |
| Re: غشتني يُمه الدُنيا مرة .. خَلتني فوق ريدكـ أريد .. قصيدة الي مَن فارقت الدنيا ولم تفارقنا | محمد الفاتح خالد حسون | 11-27-10, 08:59 PM |
|
| |
محمد الفاتح خالد حسون
فيس بوك
تويتر
انستقرام
يوتيوب
بنتيريست