أضبط المصريون دخلوا مشروع الجزيرة : إحنا هو مش اي كلام !!! " صور "

Quote: Munir الشاب محمد زكريا .. نوَّر الله عليك ياخ .. بالمناسبة يازول أنا متابع مشاركاتك وروحك المرحة .. بعدين ياخوي إنت عاوز تفهِّمني 'معانا واللاَّ مع الخيانة' ياود بحري إنت؟؟ نحن اولاد الشعبية ياخ .. طبعاَ آآي معانا واللاّ مع الخيانة ، لكين طالما جبتوها لي مقنطرة فلازم أشوت وأعمل المقارنة مع غانا التي أرمزتها للجهة وسألتكم لو كان التربال ده جاي من غانا - أومن جهة غانا - كنتوا حتكرنكوا كده؟؟ .. وقلنا ليكم ياشباب إنو ناس غانا ديل كاسرين ركبة عندنا هنا من زمان ومافي زول بيسألهم .. الناس بتجي كداري من ديار تمبكتو وأقصي غرب افريقيا بدون جوزات ولا تأشيرات ولا إحم ولا دستور ومافي زول جايب خبرهم .. الناس بتجي كاسرة من هضاب اثيوبيا ويملأوا العاصمة والأقاليم بدون فيزا ولا يحزنون ويجدون كل ترحيب وشغل زي ما دايرين ولم يعترض أحد .. العالم بتجي متدفقة من جهات الجنوب ما معروف دينكا واللاّ كينيين وينتشروا في البلد ونحن نقول أخوان جنوبيين .. وكل هؤلاء القوم يأتون عابرين الحدود بلا نظام ولا تدقيق ولا أختام ولا جوازات ولا ولا ولا .. ويجوا بدون ما يكون عندهم شغل محدد ولادخل معلوم ولا نعلم لهم محل عمل أو سكن معلوم .. سكنهم بس ياهو الدفَّار الهامل الإسمه السودان ده .. أها الجيران الوحيدين البيجوا لهدف واضح وبيجوا بالدرب العديل وبيقطعوا تذاكر وبيشتغلوا شغل معروف ومرغوب ومنتج هم المصريين .. فلماذا هم الوحيدين الذين تقوم لهم قرون استشعاركم وتتنرفزوا ضدهم؟؟ ده رد فعل أنا شايفو غريب جداً .. الغريبة إنو السوداني لو أدوه مليون دولار وقالوا ليهو أمشي قضي بيها إجازتك في انجمينا واللاّ كنشاسا أو أسمرا أو كمبالا ما يمشي، لاكين تلقاهو يكابس وريقه ينشف جرياَ وراء السفر للقاهرة حتي لو أدوه طلقة في زقاقاتها .. فلذلك ياخوي كدي أقيف مع نفسك وتمعَّن في سبب غضبتك وعدائيتك ضد هذا الرجل المصري الغلبان .. وأحمد ربك إنو ربنا هيأ ليك البلد النضيفة وهو كان قدره السودان الذي اصبح جحيماَ حتي لأهله .. تذكر ما أنت فيه من نعمة وماهو فيه من بؤس ولا تحقد عليه في بؤسه فينزع الله عنك رحمته .. . .