محمد عمر جبريل,, موضوع الشغاله والبوّاب لو قريت ردي لأختنا هاديه بتمعن حتلقاني رديت عليهو, دي مهن شريفه بالتأكيد, لكن المرفوض تنميط المصريين لينا من خلالها, جيب لي مشهد درامي مصري ظهر فيهو سوداني أو مصري يدّعي السودنه وكان طالب, سائح, جار, طبيب, تاجر, زول ساكت ما أهبل وعبيط ... الخ لما ماتلقي وماحتلقي سمّي لي الموضوع ده باسم تاني غير استعلاء وتنميط لو لقيت برضو,,
Quote: إنت ما قاعدين تشوفو الاسكتشات السودانية وللا ما حصل جات فرقة كوميدية شبكتكم الحبشي قبضوهو ناس الكشة وللا المصري ما عارف عمل ايه .. ؟؟ |
شوف أنا مازوله بتاعة دراما وسينما, لكن في فرق بين فن النكته وبين الدراما الجادّه, في فن النكته ده بنضحك علي روحنا أوّل ناس, جعلي, شايقي رباطابي, دينكاوي, .. الخ وفي نكت عن المهن, وبنضحك علي الأطفال, وعلي السياسيين, وعلي كل حاجه,, لكن نكته فيها اساءه ما بتضّحكنا ولا بنقبلها وبننتقدها كمان, وهسي دي لو في أي نكته حقتنا فيها اساءه لينا أو لي غيرنا بنرفضها, بعدين لما السعوديين بتاعين طاش ما طاش جابوا المشهد اللطيف بتاع "ضربوا لي هسسسسسسسه" كل الناس ضحكت واتفتحت قروبات في الفيس بوك عن الموضوع, وشركة اتصالات عملتها دعايه ليها,, يعني الحساسيه المفرطه دي ماعندنا, ما تعمم,, أنا المسلسل الشفت المشهد بتاع الشغّاله فيهو وكتبت عنه "ريش نعام" ما كان فيهو أيي كوميديا, ولا نكته, ومن حقنا نرفض أي تنميط أو ريحة عنصريه بدون مازول يتهمنا اننا معقّدين ..
--- التعديل للتنبيه لأني كتبت مداخلتي قبل ما أشوف مداخلة أخونا محمد خليل أعلاه,,
(عدل بواسطة Amany Elamin on 10-18-2010, 12:34 PM)
|
|