ساخر سبيل‏ واحد فى المليون / الفاتح جبرا

Quote: حضر لى صديقى (س) بالمنزل وهو يحمل (كرتونة) كبيرة وضعها أمامى بالمنضده .. وبعد كلمات الترحيب واللازم منو أخبرنى وهو يشير إلى الكرتونة بأن شقيقة الموجود بكندا قد قام بإرسال هذا الجهاز الأمريكى الحديث لكشف المعادن : - والله يا استاذ زى ما إنتا عارف أنا ما عندى علاقة لا بالمعادن ولا بالدهب وهو رسلوا ليا عشان أبيعو وأستفيد من تمنو لأنو قالو أسعار الحاجات دى بقت غالية خاصة إنو هو نوع أصلى وجيد - وطيب ما عرضتو للبيع مالك؟ - والله بينى وبينك يا استاذ أنا قلتا قبل ما أبيعوا أمشى أفتش بيهو إحتمال تضرب معانا والزول يطلع من المعاناة دى وعشان كده أنا جبتوا ليكا (تبرمجو) ليا عشان حاجاتو كولها بالكمبيوتر قضيت الليل كله أقرأ فى (دليل المستخدم) الذى كان مرفقاً مع الجهاز ولم أذهب إلى فراشى إلا بعد أن قمت بتجميع أجزاء الجهاز وضبطه وبرمجته . بعد أن إستلقيت محاولاًَ النوم طفقت أتذكر فى تلك القصص المتداولة منذ أزمان والتى تحكى عن أشخاص وجدوا جرار من الذهب وهم يحفرون فى منازلهم (فى هذا الحى العتيق) لأغراض البناء وهى قصص أقرب إلى التصديق فهذا الحى (بيت المال) قد كان وزارة المالية فى (المهدية) ومن غير المستبعد أن يكون بعض المسئولين قد قاموا (بتصبين) بعض الحلى والمجوهرات والنقود الذهبية ووضعها فى (جرار) داخل الأرض ، والتصبين عزيزى القارئ هو ما يعرف بالتجنيب فى زماننا هذا أى وضع بعض إيرادات الدولة (على جنبه) ليصرف منها المسئول بمعرفته وهو نوع من التجاوز المالى الذى ينتشر عندما تكون (الدولة مهدية) ! فى صباح اليوم التالى وبعد أن يذهب الأولاد للمدارس سوف أقوم (بالتنقيب) فى كل شبر من أجزاء المنزل .. هكذا قررت بعد أن إستعرضت فى مخيلتى تلك القصص قبل أن أنام فالفرصة جأتنى (لحدت عندى) .. محمد على .. عبدالرحمن حسن.. أحمد عبدالله .. صالح عباس .. (كنت أفكر بصوت مسموع) وإذا بالمدام - يا راجل إنتا جنيت ؟ بتهضرب مالك ؟ الأسامى دى جبتها من وين؟ - أهضرب شنو يا وليه؟ أنا قاعد أختار ليا فى إسم فنى - البرنامج عملوهو نجوم الأمس وللا شنو؟ شرحت للمدام القصة كووولها وكيف أنه بعد ساعات قلائل سوف ينضم أحدهم (اللى هو أنا) إلى قائمة أثرياء (الغفلة) فى هذا البلد العجيب وسوف تملأ صورى (الجرائد) الفنية والرياضية والإجتماعية وقد سبقت إسمى ... كلمة (الوجيه) ثم الشاعر.. الملحن .. الكابتن .. الأديب .. الأريب ..! - كدى جيبى الغويشة الفى أيدك دى ؟ - سجم خشمى .. كمان عاوز بيها شنو؟ كل حاجه ولا دهبى ده ! - لا لا .. بس أعمل بيها (تست) للجهاز عشان أشوف الصوت البيطلعو لمن يلقى الدهب وبالفعل .. قمت بتمرير الجهاز على معادن مختلفة من بينها (الغويشة) والذى كلما مر عليها قام بإصدار صوت مختلف يشبه إلى حد كبير صوت عربة الإسعاف ! قمت وسط دهشة المدام بإرتداء الجهاز وتثبيته على خصرى ووضع السماعات على أذنى وحملت العصاة التى يوجد فى نهايتها الطبق اللاقط فى يدى وبدأت فى مسح المنزل والمدام تنظر لى فى إشفاق ! - (وأنا أنزع السماعات متهلل الأسارير) : هنا .. بس هنا .. - هنا شنو؟ - الدهب هنا .. الحته دى فيها دهب !! كانت الحتة المشار إليها تقع فى منتصف صالون المنزل وهو (لعلم القارئ الكريم) المكان الوحيد الفى البيت (السيراميك) ! للتأكد قمت بتكرار المسح مرات عديدة وما أن أضع الجهاز على تلك (الحته) حتى تبدأ (الكواريك) ويقوم الجهاز بإصدار ذلك الصوت الإسعافى ، لم تمض دقائق حتى قمت بإخلاء (منطقة العمليات) من أى قطعة أثات بعد أن قمت بتجهيز (عدة الحفر) اللازمة (شاكوش كبير – عتلة – أبو راسين – كوريك) .. - إنتا هسه بتقدر على الحفر ده؟ ما تجيب ليك زول يساعدك ! - بالله ؟ عشان بعدين يقول ليا عاوز نسبه ... لا لا ؛سن برررراى كده!! وبدأ الحفر لإستخرج الكنز فى دائرة قطرها متر تقريباً .. كلما حفرت قليلاً قمت بوضع الجهاز لإستمع إلى ذلك الصوت المزعج (اللذيذ) .. فى مرات عديدة يشتد (الصوت) عند الحواف فأضطر لتوسيع (الحفرة) .. مضت ساعات من الحفر المتواصل لا يفصل بينها إلا .. كباية شاى .. كوز موية بارده .. سجارة .. فنجان قهوة .. عاد الأولاد من المدارس فوجئوا (بالمنظر) : - يا بابا إنتا بتحفر فى شنو؟ - (وأنا مصهين) - يا بابا إنتا كسرت الصالون ليه؟ - أنا ح أبنى ليكم تسعين صالون وألا أقول ليكم ح أشترى ليكم بيت فى كافورى ! وسط دهشة الأولاد الذين جلسوا يراقبوننى عاودت الحفر .. رغم الإجهاد إلا أن المسألة فيها دهب وكده .. متتبعاً مصدر الصوت لم تتبق (سيراميكاية) واحده فى الصالون .. فى تمام الساعة الخامسة عصراً وأربع وعشرون دقيقة وإطناشر ثانية .. أصدر الجهاز (جقلبة) شديدة فعرفت أن (الكنز) قد إقترب .. وبضربة واحدة بدأت ملامح (الإبريق) الذى كان فيما يبدو يستخدمه أحد (الدراويش) فى (الوضوء) ! - (فى تحسر) : الجهاز ده الظاهر ما تمام ! - تمام ما تمام رجع ليا صالونى ده زى ما كان كسرة : أكتب لكم هذا المقال من داخل ( بنك الأمازون المتحد) وأنا أحمل فى يدى ورقة مكتوب عليها (طلب مرابحة لشراء 90 متر سيراميك )