أنا قد تعبت ...

آمين يارب العالمين
ياكا الخلقت الناس دي من طين
وطين الطين
لكن أبوا وأصبحوا همَّ (مطيّنين)
ليه؟ وأنا قادر أعرف يا أمين
أصلو الوطن ما ساعدوه عشان يكون قوي وكمان أمين
يا ناس هناك ختوا(الوِلس)
مع ناس هناك متخندقين
حالفين يمين
ما يسيبوا زول في المسلمين
قاعد يفضفض في العينين
يبقوه بس في الميّتين
آمين يا رب العالمين
تنجدنا من هذا الكمين
للأندلس قِبِلنا بس ناس راضخين
نضطر ونقبل كل مهين
لكن بلد منذ الأزل
حالف يمين
يعيش بي سترته
مافيش فرق بين مسلمين
أو غير؛ تعامل كيف متين
نسب وصهر متيمّنين
يقوم يجيهم كل حين
واحد مشولح
أو ملولح
يشيل له فاس
يدخل في غابة
ويدقّوا هاداك النحاس
ويكُتلوا ناس
ويشرُّوا ناس
بين البلاد متأزّمين
قال لاجئين
حتى اللجوء مشينا وين
دخلنا في الدار الأمين
دار السوادنة الطيّبين
بين أهلنا صاروا المعين
وصرنا نحن اللاجئين
ويجوك ناس
كايسين
مصالح لنفوس
مرضت وشبعت موت في المرض
درب المصالح دافرين
يا الله بس متين يجونا راجعين
ونتهنّى بالوطن الأمين
قوي وهناك في الخالدين
فوق فوق لفوق في العالمين
زي ما أراد ليه المعين
يارب تبيض للجبين
وتسمع لإدريس الأمين
مع نفسه ويّا الآخرين
إدريس أخوي ما تشوف طريقة
نلملما الكلمتين
ما يضيعوا في التوج والأنين
شوف لك صحيّب يكون طيب يلمّها في إلكترونين
واحد يكون ليك يا حنين
والتاني لي عبداً مهين
ما بعرفو درب الرنين
والاتصال با لصاحبين
أصلو البشر بي جاي شلل
وإنت سيد العارفين
ما نقعد نفتش بالسنين
قلت ليك دا ما شعر حق أولين
أصله الشعر شيتاً ثمين
ونحن بس ما معافرين
لسانا أغلف يا معين