نكته ......... !

رسالة .. ام مسطولة لابنها ..
ابني العزيز وابو اولادي اليتامى انابخير هنا ان شاء الله انت تكون كويس هناك بكتب ليك الرساله دي براحه لاني عارفه انك مابتقرا سريع, ابوك قرا في الجريده ان اكثر الحوادث العرضيه تقع على نحو 20 ميل من المنزل عشان كده رحلنا الى بيت جديد ابعد من بيتنا القديم بحوالي 20 ميل ومابقدر ارسل ليك عنوان البيت الجديد عشان الزول الاشترينا منو البيت شال عنوانو معاهو ماداير يغيرو ونحنا في الاسبوع الجاي حنجيب عنوان بيتنا القديم نشتغل بيهو فترة كده لحدي ما الظروف تتصلح عشان كده عنوانا ماحيتغير, الجو هنا كويس المطره صبت مرتين في الاسبوع الفات المره الاولى استمرت اربعه ايام والمره التانيه استمرت خمسطار يوم, اخوك الكبير وهو ممتحن امتحانات الاساس جابو ليهم سؤال صعب للغاية ؟؟؟ كم عدد ارجل الماعز ؟؟؟ طبعا اخوك سقط في الامتحان عشان المراقبة كانت شديدة جدا وما استطاع انو يمرق الغنماية البخرة من شنطتو عشان يعد رجلينها كم ؟؟ , ناس الحكومة الشهر الفات قاموا عملو لينا حظر تجول في بلدنا ؟؟؟ قام ابوك اجتمع بناس الحلة وشالوا البارد والشاي والحلاوة ومشوا عشان يشوفو حظر التجول ده والحكاية كانت زحمة شديدة والناس جوها من كل الحلات المجاورة وغير المجاورة ، امبارح لقينا لافتات كتيرة مكتوب فيها التطعيم ضد الجدري ؟؟؟ لكن للاسف ما مشينا حضرناها عشان ابوك قال كورة مافيها الهلال ما بحضرها , بمناسبة الملاريا دي ؟؟؟ انت لمن كنت صغير جاتك حصبة ولا التهاب ؟؟؟ طبعا الرحيل من البيت ده خلانا ننسي الحاجات الفارغة دي , عمتك قالت ليك ماحتقدر ترسل ليك الجاكيت اللي قلت عايزو بالبريد لانو تقيل عشان زرايرو حديد عشان كده قطعت الزراير وختته في جيب الجاكيت , ابوك اشتغل شغله جديده وشغالين تحتو 500 عامل بحصدو الحشيش القايم جمب المقابر , اختك ولدت الليله الصباح بس ماعارفه جابت بت والا ولد عشان كده ماعارفه انت حتبقى خال والا خاله , وتصدق لحدي الان ما كلمناها بالولاده دي عشان نعمل ليها مفاجأة , اخوك بتاع البوليس اللي شغال في الجيش قال احتمال الاسبوع الفات يتزوج خلاص , العرس شهر سبعة والطلاق شهر ستة في نفس العام الجاري لمن نفسو انقطع , بس المشكلة قال ناقص ليهو القروش والبيت والعفش وقفة الملاح والكسرة والعيش و العروس وابوها وامها وابو جدها زاتو, عمك اخو امك الكان اسمو خالد وقع في البير وكان في رجال حاولو يطلعوهو لكن قاومهم بكل شجاعه وتجرد ونكران ذات ...وغرق اخيرا , وبعد داك حرقناهو بالنار والظريفة النار ذاتها كانت مولعه فيو تلاته ايام لانو مانشف لانو مرطب , ابو اعز اصحابك وهو بيموت طلب من صحبك عمر انو يدفنو في نص البحر لمن يموت ومشى عشان يحفر القبر ليه ابوهو قام غرق ومات ولحدي الان ناس شرطة الزراعة محتارين ماعارفين المات منو عمر؟؟؟؟ ولا صاحبك؟؟؟؟ ولا ابوهو؟؟؟؟ , بتتذكر يوم كنا بنسطل سوا جنب البحر بالليل بالصباح وقلت لي امي انا بحبك؟؟؟؟؟ وقلت ليك وقتها خلي علاقتنا صداقه وبس , كانت ايام حلوه والله خلاص وان شاء الله ما تتكرر بقدرة قادر أحد , ده كل العندي مافي شي جديد ولا حتى قديم زاتو
ـــــــــــــــــــــــــــــــ
وتصبحو علي خير