في حضرة بورداب الشرقية مساء الجمعة كنا بحضرة ((الوطن)) وفي حضرة جلالك يطيب الجلوس مهذب أمامك ......يكون الكلام
أكيد الواحد كان غاية في السعادة يلتقي كوكبة رائعة من بورداب المنطقة الشرقية ازدانت بتشريف د. حيدر البدوي وجمع كريم , ناقشنا هم غربتنا بكل صراحة وأريحية على خلفية كلام د. حيدر حول الغربة في تجربتوا الذاتية ويمكن الدكتور كان كجيل محظوظ أكتر مننا غالب تجارب غربتهم بتبدأ كطلاب درجات علمية , نحنه الجيل البدأ مشواروا في عز زمن التمكين , الاتقلص طموحوا في الحصول على عيش كريم في بلدوا , يعني غربتوا كانت ((( ضرورة ))) في ظل الدولة الانتقائية ومعياره الأوحد للمفاضلة كان الولاء والتزلف لمنهجه الأعوج ... فأصبحت غربتنا قدر محتوم.
لفت نظري تعليق مهم للأخ المكرم / عوض هارون القال((( الغربة حفظت جيل كامل من الضياع ))) والكلام ده منطق سليم جدا .. لانوا جيل كامل كانت فرصوا يلقي حياة كريمة في بلدوا شبه معدومة وكان مصيروا الضياع واليأس أنو يقدر يعمل مستقبل معقول , لو ظل متواجد في بلدوا من غير ما يقدم أى شي لنفسوا أو لوطنوا فكانت الغربة هي الحل الأمثل للظروف الاقتصادية الضاغطة الكانت بتواجهنا كجيل فرصوا محدودة في كل حاجة ... مع إننا الجيل الردد مع عقد الجلاد ((( الغربة إن شاء الله تعقري ))) يمكن تجربتين لعوض هارون ولحمد فتح الرحمن لخصوا تجارب غالبنا مع الغربة باعتبار كلامهم عن الظروف الخلت الغربة خيار لمعظم أبناء جيلنا .
يمكن الوقت ما سمح الواحد يعقب على الدكتور في كلاموا عن إستفادتنا من تجربة عشرين سنة في ظل الدولة الاقصائية ذات المنهج والنظرة الواحدة , باعتبار مبكر جدا نتكلم عن حته زي دي ما لم نبصر ضؤ في نهاية النفق ... حتى مع كلاموا عن حتمية التغيير ببقي تفاؤل وأمنيات ربنا يحققه , وبرضوا ألياتو الفاعلة بتظل غائبة عن المشهد بغياب تام لمنظمات المجتمع المدني والنقابات والأحزاب ... مع كامل الاحترام لمحاولات الناس القابضة على الجمر في الدخل وعملهم الصادق من أجل إنجاز تحول ديمقراطي حقيقي وحتظل رغبة التغير موجودة في نفس كل سوداني بتمني لبلادوا الخروج من مأزقه ... وأكيد الواحد متفائل للغاية بالمستقبل أنو تقوم على أنقاض الشمولية والإقصاء دولة مواطنة وقانون يحس فيها الجميع بالعدالة والطمأنينة ويتساوي فيها الناس حق وواجب .
كلام جميل برضوا لدكتور حيدر بدوي عن تجربتوا مع الشعوب المختلفة الأتعامل معاها في غربتوا يمكن بتركيز على الشعب الأميركي وخصائصوا ... ثم شعوب المنطقة العربية في المملكة والخليج وبتصور دي من إيجابيات الغربة أنها بتخليك تتعامل مع شعوب مختلفة تعزز من قبولك للأخر وتخليك تكتشف خصائصوا , وبالمناسبة دي ممكن يكون غالبنا إنطباعي في نظرتوا للأخر وحكموا عليهوا من غير معرفة حقيقية فتح كلام عن تقبلنا للأخر وتقبلنا لبعضنا البعض أسهم فيهوا الأخوان بتجاربهم والأخر في السودان ما ضروري يكون أخر من شعب أو بلد تاني ممكن بعضنا يحس بالأخر ده عرقية أو قومية سودانية تانية ممكن بتركيز في الكلام ما بين الشمال والجنوب وعدم تبلور قومية سودانية تجمع الكل ممكن تكون من أهم الأسباب الاسهمت كتير في الحته دي ...ومابين الجنوبي والشمالى فقط بين الكل حاصل إستقطاب جهوي وقبلي حاد وغير مبرر في بلد مفروض أنو إجتاز الحته دي من بدري ... وده ما بنفصل عن سياق الردة والتدهور المريع الطال كل مناحي الحياة السودانية تحت حكم الإنقاذ .
*سؤال العودة للسودان ... ما بعتقد أنو كتار جاوبوا عليهوا , ولو كنت شاركته في التعليق عليهوا حاقول ببساطة صعب تبني خطط عودة للسودان في الوضع الراهن بأي حال من الأحوال وماظن الناس اختارت غربته مزاج ولا بخاطره , وبالجد الواحد كان غاية في السعادة بلقاء بورداب الشرقية المميزين ويمكن دي المرة التانية يكون الواحد في حضرة دكتور حيدر البدوي وأسعدني الحظ أكون من ضمن البورداب الاستقبلهم في مارس الفات في بيتوا العامر بالخبر ترحيب بمقدموا للمملكة كأستاذ بجامعة الأمير محمد بن فهد جلست الجمعة الفاتت برضها عززت من إنطباعي الايجابي عنو كزول مميز ومحاور لبق بقدم طرحوا بكل تلقائية وأريحية و بيظل بيأكد لى إنطباع مؤمن بي وكتبتوا قبل أيام في بوست المهندس/ ابوبكر سيد أحمد إننا((( أمه مهاجرة ))) أميز ولادة بره وما عندهم أى أسهام تستفيد منو بلادهم بشكل حقيقي ويمكن ده برضوا من أسباب مأزقنا كسودانيين .
((( الوليدات خلو حضنك ريح تفوفي )))
__________________
*تحية لكل من حضر تلك الأمسية الرائعة من بورداب الشرقية وأسرهم وأصدقاء سودانيز اون لاين البنجتمع في رحابوا وطن جامع للناس كلهم بمختلف أفكارهم وأتجاهتهم والتحية أيضا لمن غابوا .
من الغياب الأصدقاء الأعزاء عوض عكاشة وحيدر الزين وهشام ادم ومن الناس الكان الوحد بتمني يقابلهم المميز / محمد E سليمان خبير التعمية والتشفير
*عطبرة ( تحية لود الزين ) من غابوا عنا تلك الأمسية وهو يستعد لدخول القفص الذهبي في العيد ألف مبروك وربنا يتم ليك على خير وبيت مال وعيال وبحبوحة ورضا .......
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة