الشاعر ابراهيم محمد أحمد مصطفي المك - يستأذنك الدخول حبيبنا بكري أبوبكر

Quote: كلمة شرف البينا ما كان بس (دِبل) ما كان كليمات ريد تموت تحكيها عينيك في خجل لا خاطرة فينا تجي وتفوت لا كان عشان خاطر الأهل كان ريدي ليك احساس نبيل من جانبي ليكي ..على الأقل وكان خوفي ريدك ما يدوم وأهو فعلاً دا الحصل .. **** البينا كان كلمة شرف اديتك إحساس زول بسيط ما عاش في بحبوحة ترف وشرحت ليك كل الظروف ما سبت حاجة على الصــــدف والليلة في آخر المطاف في حته ضيقة و منعطف اتخلي قلبك عن هواي تاه في الأماني وانجرف وضحيتي بي ريدي الكبير لا حن قلبك لا عطف أديتك إحساسي النبيل وأخلصت ليك ... بس للأسف **** ما كنا كاتبين ( كنترات) وما كنا كاتبين في الورق لازم تدوم بينا الصلات وشرحت ليك واقعي المرير ما عشت وهم الأمنيات وزرعت ريدك في الشروق ورويتو همس الأمسيات في دمي في نبض العروق في شعري أروع أغنيات داريتو بينات الضلوع والليلة بين أيــــديكي .. مات **** ما جبت يوم جيتك شهود قصر الرشيد ما قلتو ليك ضمن الوعود ما قلت ليك دربك معاي مفـروش ورود وما قلت ليك الماس يزين جيدك عقـود ما أظني في يوم قلت ليك باكر أجيب احلي الدرر تلمع خواتم في ايديك من البداية شرحت ليك أنا زولاً اغبش زوي ولاد آدم بداقش للرزق.. وأنا شمعة شان النور يقيد بنارها لازم تحــترق وأنا باقي لأخواني الصغار ركازة البيت والمرق **** ولو فاكرة في يوم قلت ليك يا غالية ما تتهوري خايف تضيق باكر على خايف معاي ما تصبري قبال تحددي موقفك يا غالية امشي وفكري والريدة قيمة والتزام ما بتوفي لو ما بتقدري وما تجاملي برقة كلام براحة روقـــي وقرري **** ولو فاكرة كان ردك علي بموية راضية أعيش معاك مهما حصل … أنا راضية من الدنيا بيك والريد وإشراق الأمل والدنيا ما بتدوم لزول في يوم عسل ..... في يوم بصل .. لكني راضية اعيش معاك مهما حصل يكفيني انك سيد هواي... ويكفيك أكون أنا ست هواك اقنع معاك لو بالقليل ... وكفاية بس لحظة رضاك .. كل الكلام القلتو دا ... مش كان كلامك ياملاك ؟.. يا خسارة يا ست البنات الليلة إيه الجد جاك ؟؟؟ ونسيتي انو البينا كان كلمة شرف من جانبي ليك أخلصت لكن للأسف !! مع اني بدري شرحت ليك .. انا واحداً اغبش زي ولا ادم بداقش للرزق وانا باقي لاخواني الصغار ركازة البيت والمرق ويا غالية ما ياكي الزمان الليلة بان لي الفرق حان الوداع يا ست هواي وظروفنا قالت نفترق خليك فاكرة وفايا ليك وأنا شمعة بعدك تحترق وانا بحيا لاخواني الصغار ركازة البيت والمرق .. ابراهيم المك ام درمان 1980م