بورداب الخرطوم .... افيدوني بسرعة ارجوكم

Quote: عايز اعرف سعر الحافة 14 راكب هونداي ديزل موديل 96 بي كم

Quote: وشغلها كيف هناك بتغطي ولا احسن نبيعها وخلاص

يا زول انت ما تركز !!
انت عايز تبيع ولا تشترى !!؟
على العموم نفترض انك تمتلك هذه( النقاطة العملت لاخوك مصران عصبي )
عارف يا حبيب ..
الاحتمال الاول :
لو( هوندايتك ) دى لقيت طريقة ايجار لشركة استئجار السيارات أو منظمة
او سفارة او اى جهة فى القطاع الخاص .. تكون انت محظوظ
ونقاطتك مضمونه .. شرط ما تكون مرخصة تجارى ... لازم ملاكى !!
ويتم الاستئجار فى حدود بين 3 – 3.5 مليون فى الشهر ..
والشركة والتأمين بكونوا
مسؤولين من كل شئ واجرة السواق تتم بالاتفاق بينكما بين 600 -750 الف والباقي
لصاحب السيارة ..
الاحتمال الثانى
ما حك ظهرك الا ظفرك ..
ودا عشان تشتغل فى الخط مواصلات عاديه( مرخصة تجارى او ملاكى ولكل مميزاتها )
يعنى لازم تسوقها انت او اخوك شقيقك او فردتك او صحبك داك .. او زولاً يخاف
الله فى نفسه ورزقه وحق الاخرين ..
الدخل المعلوم اليومى بين 120 -150 الف والتوريدة اليومية هنا ثابته
للمرخص 80 الف ولو ما مرخصة بين 80 – 60 الف ..
والسبب هو قطع ايصال المرور بمبلغ 30 الف وحسب
الحملات المرورية يعنى قطع ايصال بجيب ليك 60 الف ما قطع
و مره اليوم بسلامه يصلك 80 الف زى التجارى..
سواق مستجد !!؟
اها دا البجيب خبرك وبغطس حجرك .. وببهدل ليك غريس كيلى دى !!
هى غريس دى انت لقيتها ملح ولا حاجة !!؟
اولاً الكورى ما بتحمل زولاً مستجد ..
ثانياً الشوارع ضيقة ومزدحمة عربات وشاحنات وهايسات
بتجرى جرى الجن واقل خبطه ولا هبشة عربيتك بتتفرتق ..
ثالثاً المستجد دا ما بعرف ليك ناس المرور
ولا الزوغات ولا وقت الشغل او وقت الركلسه الا لو عايز تدربوا فى تعبك وشقاك دا !!

__________________

اسال مجرب وما تنسي الســواق !!

يا خلق الله هايس نضيفه بكرولا 04/05 هل من راغب !!؟
لا عندى سواقاً لا ضمنت لى شركة ايجار ..

يحلنا الحل بله؛

______________

آها يا محارب .. اكتفيت ولا نزيدكـ