|
|
 Re: ..رمضانيات ..( شاكوش الشنفري ) ...ملاعمر..البدر السمح..ثابت البطل ..سجيمان..حميد ..وقبيلتهم (Re: abuguta)
|
الاستاذ عبد المجيد عبد الرازق الصحفي الرياضي المعروف عندما وجهنا له سؤالنا.. اخذ نفساً عميقا ثم اعتدل في جلسته وبعد ان سرح برهة .. وبدأ يقول: رمضان الكريم لنا معه ذكريات جميلة وتجربتي الشخصية معه كانت وانا بالصف الثالث بقريتي قوز الناقة بالجزيرة.
وكان الاستاذ منذ الصف الثاني يلازمنا بالصلاة مجموعات وكل مجموعة على رأسها إمام واذا غاب احد عنها يجلد.. وفي الداخلية كنت انام في الحوش عز الشتاء عشان ما تفوتني الصلاة واتلقى جلدة من المعلم..
- اما في الحي فكنا نتعود على الصيام ونفطر في شكل مجموعات وهذا ما تعلمناه من اهلنا عندما كنا نساعدهم في اخراج الصواني بتاعت الافطار في الشارع.
وكان الاهل برسلونا للزيادات وبعد داك نجيب القهوة وهذا كان له اثر كبير في تشجيعنا على الصيام، وكنا ايضاً نقوم بنداء السحور للناس وندق على العلب والصفايح حتى يقوم الناس ونردد (يا صايم قوم اسحر ويا فاطر نوم اتندل)..
ورمضان في ذاك الزمان بقرية قوز الناقة كان فيه مشقة حقيقية حيث لا كهرباء ولا مكيفات وعز الصيف لا ثلج ولا يحزنون موية زير بس ورغم كل ذلك كنا نشعر بالجو الروحاني..
وقبل ما نعرف الصيام الجدجد الواحد كان بتكيف لمن ناس البيت ينسوا السحور وكان عبارة عن لبن بالبلح.. اما الصيام الجدجد كان في الصف الرابع لكن قبله كنت اصوم للتعويدة حتى الظهر. وكنا بنشيل معانا الآبري لمن نمشي الداخلية.
وكانت تفاصيل اول يوم صيام في حياتي شاقة. لاننا نقوم بدورنا الزراعي ونحن على ذلك.
رمضان زمان
زمان يا ولدي الشراب كان بالقرع وبعد داك ظهرت الكورية أم هلال ونجمة والدنيا كانت بخير ، لكن حسع زمن الفلهمة والجك والكبابي.
هكذا ابتدر لنا العم اسماعيل البشير احمد أحد ظرفاء منطقة القوز بالخرطوم ومواصلاً الذكريات بقرية الفريجاب الخوالدة بالجزيرة، في الخلوة علمونا كيف نقرأ اللوح ونصوم حبه حبة ، وبعد داك بدينا نتعلم الصوم في الحر الشديد، ولو اشتد علينا نفطر طوالي ، وبعد ما كبرنا شوية بقينا نصوم نص رمضان، يعني يوم صيام ويوم فطور، وننتظر في شوق شديد مدفع الدلاقين ، وفطورنا شنو يا ولدي عصيدة وآبري أحمر وأبيض، الفرحة الكبيرة كنا بننتظرها في أول يوم في العيد، نركب الحمير ونمشي مسيد الشيخ الامين، والناس تتلمّ من القرى المجاورة.
رغبة ومشقة
ü موسى أبو عبيدة ، قرية ضو العقليين بالمناقل قال : الصيام في السابق غالباً ما يأتي في عز الصيف، مع ذلك شغالين زراعة وسقاية وكانت تأتينا الرغبة والرهبة في آنٍ واحدٍ، ونحن نرى المشقة ، ودافع الرغبة يأتي من الذي يسبقك بعام أو اثنين حتى نصل مكانتو، وعن تجربتي الشخصية مع الصيام كانت البدايات من الصف الثاني والثالث ، وكنت أحرص على السحور لان له نكهة خاصة ، وكان عبارة عن فطير باللبن.
ومن المواقف الطريفة كان لي ابن خالة أتى معه للقرية بعض الخواجات وصادف رمضان وقالوا إنهم لازم يصوموا شرطاً أن يشربوا كباية موية واحدة خلال اليوم.
ألعاب رمضانية..
رمضان عندما يأتي نفرح فرح شديد لانو مربوط عندنا بلعبة معينة ونحن أطفال وهي عبارة عن سباق في الحوش الكبير مع أطفال العائلة وتكون انطلاقة السباق مع آذان الافطار ، وأثناء إقامة الصلاة نسحب صواني الافطار ونقضي على كل ما فيها ونجري..
وفي الصف الاول الابتدائي كنت أصوم حتى الساعة 12 وعندما يشتد الصيام أقوم أشرب موية من الزير وبعدها أدعي انني صائم باقي اليوم، وفي ذلك الزمن الصيام كان قصرياً على طلاب الصف الخامس فما فوق.
والحديث للسيد عبد اللطيف علي محمد زين من قرية نعيم الله ريفي الحوش بالجزيرة مواصلاً حديثه قائلاً : أن أول يوم صيام له بتشجيع من ناس البيت والآن يفعل نفس الشيء مع أبنائه ويشجعهم على الصيام، وذكر أن رمضان الآن أحسن من السابق فيه وسائل الترفيه متوفرة.
صالحين شمس الدين - الثورة
كثيراً ما أكون نصف رمضان فاطرة ولست قاصدة طبعاً فأنا أنسى بصورة غير اعتيادية وأية صدفة تأتي بي محل الأكل او الشرب آكل واشرب ولا أتذكر الا بعد فترة أو يذكرني اي واحد.
وفي ذات المرات كنت بفطّر في بتي الصغيرة وآكل معها فسألتني «زوجة اخي» أنتي فطرتي فرديت عليها : هو في زول عمل الفطور وقمت شربت موية، بعد داك سألتني مرة ثانية إنتي فاطرة ما صايمة ولا شنو؟.
ومرة تانية كان في أول يوم في رمضان حدث فيه وفاة ابن أختي فأبوى سأل من الشاي وكان جنبو كورية (نشا) فشرب منها وشربت الباقي وجات اختي شربت معانا وشربنا بعدها موية وفي هذه الاثناء جاءت جارتنا وقالت استغفر الله يا أولاد شمس الدين حتى أبوكم فاطر معاكم وبعد رمضان مرات كتيرة بقضي الايام الفطرتها سهواً.
ذكرى وشقاوة
معتز عبد الرحمن :
قال أتذكر جيد جداً ذكرى زي «عشاء أمبارح» مرحلة الطفولة الرائعة وأنا بين الحياة الصافية والبعد كل البعد عن هموم الحياة ولواحقها.. تلك الايام التي لها إيقاع.. مش بس إيقاع والله زي الشهد المقطر.. والجو بالجد كده كان معطر.. إنها مرحلة الطفولة في رمضان.. هذا الشهر العظيم.. انا بتمنى الشهر ده كل الشباب تعرس أيوه ومالو.. فلتعرس إن شاء الله يا رب نقوم في العيد هاك يا مشاركات ورحلات لكل زول قريب وبعيد.
ü وفي قريتنا يا سلام كان ليهو طعم ولون خاص.. أي والمعبود بالحق لسه بذكرى وانا «شويفع» مش تصغير شافع ده الحنكشة ليها.. منظر الناس وهم يستعدون لهذا الشهر.. أقوم أتابع ليك كل التفاصيل.. في كامل الانتباه والمتعة.. ولمن يجي شهر رمضان .. نحن الصغار الفاطرين ديل.. نكون في شوق ليهو اكثر من الناس البتصوم.. ورمضان في قريتي «العقدة المغاربة» الفي ولاية الجزيرة - محافظة المناقل.. والله بتمنى كل شهر أصومو هناك عند أهلي بمزااااج.
ü أذكر وانا صغير المعلم عمل ليك لي ناس البيت هو صائم جد جد.. ولمن جات الساعة عشرة ونص بالضبط.. الجوعة والعطش عملوا عمايلن.. بس بقى ليك كل همي.. كيف الوصول الى الزير.. وفي هذه اللحظات عشت لحظات من الترقب.. زي الحارس الشخصي.. بس ياريت الناس ديل يطلعوا .. وللاّ إن شاء الله كلهم ينوموا.. وفجأة العبد لله لقى ليك الفرصة.. وجرى للزير والله التقول أول يوم أشوف زير.. و«إتنطرنا» ليك جنس تنطيرة.. لمن البطن بقت «تجلبق موية» وتصوموا وتفطروا على خير.
برضو
منقول
|
|
 
|
|
|
|
|
| العنوان |
الكاتب |
Date |
| ..رمضانيات ..( شاكوش الشنفري ) ...ملاعمر..البدر السمح..ثابت البطل ..سجيمان..حميد ..وقبيلتهم... | abuguta | 09-23-06, 02:44 AM |
| Re: ..رمضانيات ..( شاكوش الشنفري ) ...ملاعمر..البدر السمح..ثابت البطل ..سجيمان..حميد ..وقبيلتهم | abuguta | 09-23-06, 02:57 AM |
| Re: ..رمضانيات ..( شاكوش الشنفري ) ...ملاعمر..البدر السمح..ثابت البطل ..سجيمان..حميد ..وقبيلتهم | فيصل محمد خليل | 09-23-06, 04:38 AM |
| Re: ..رمضانيات ..( شاكوش الشنفري ) ...ملاعمر..البدر السمح..ثابت البطل ..سجيمان..حميد ..وقبيلتهم | ناذر محمد الخليفة | 09-24-06, 12:24 PM |
| Re: ..رمضانيات ..( شاكوش الشنفري ) ...ملاعمر..البدر السمح..ثابت البطل ..سجيمان..حميد ..وقبيلتهم | Abd Alla Elhabib | 09-24-06, 04:14 PM |
| Re: ..رمضانيات ..( شاكوش الشنفري ) ...ملاعمر..البدر السمح..ثابت البطل ..سجيمان..حميد ..وقبيلتهم | abuguta | 09-25-06, 01:56 AM |
| Re: ..رمضانيات ..( شاكوش الشنفري ) ...ملاعمر..البدر السمح..ثابت البطل ..سجيمان..حميد ..وقبيلتهم | abuguta | 09-27-06, 02:24 AM |
| Re: ..رمضانيات ..( شاكوش الشنفري ) ...ملاعمر..البدر السمح..ثابت البطل ..سجيمان..حميد ..وقبيلتهم | abuguta | 09-27-06, 02:38 AM |
| Re: ..رمضانيات ..( شاكوش الشنفري ) ...ملاعمر..البدر السمح..ثابت البطل ..سجيمان..حميد ..وقبيلتهم | abuguta | 09-27-06, 02:47 AM |
| Re: ..رمضانيات ..( شاكوش الشنفري ) ...ملاعمر..البدر السمح..ثابت البطل ..سجيمان..حميد ..وقبيلتهم | abuguta | 09-27-06, 02:56 AM |
|
| |
abuguta
فيس بوك
تويتر
انستقرام
يوتيوب
بنتيريست