مواصفات اللبيس المطلوبة في السودان للجنسين ... !!!

Quote: بدل يا أستاذ نلبس مما نصنع بقينا نمسح مما نلبس! - شوف يا (عبد العاطي) أنا ح أحل ليك المشكلة دي - والله يا أستاذ تكون ما قَصّرت! وبدأت أشرح لعبد العاطي الحل، الذي يمكن أن يسمى (اللبس الجماعي) على غرار (الحاجات الجماعية) التي سادت حيناً من الدهر! شوف يا (عبد العاطي) أنا عندي ليكا حل بسيط للمشكلة دي وهو أنك تعمل ليكا غيارين بس! إنت والأولاد غيار والبنات وأمهم غيار! تهللت أسارير (عبد العاطي) ولم يصدق هذه الفكرة (الكنجاراوية) التي تنبنى على تفصيل بنطلون واحد كبير ومعاهو قميص بي (ستة أكمام) يسعه هو وإبنيه، يعني غيار واحد للجزء الرجالي من العائلة ومثلهما إسكيرت واسع وكبير مع بلوزة بثمانية أكمام للأم وبناتها الثلاث أي للجناح النسائي.. راقت الفكرة لصديقي (عبد العاطي)، فالفكرة جميلة بلا شك وطالما الناس طالعين نفس المشوار التبذير لزومو شنو؟ واحد يركب وراء والتاني قِدّام والأخير (يسوق البنطلون) الجماعي وعلى بركة الله! وأي واحد فيهم يتخلف عن أي مشوار بسهولة يلفو ليهو أكمامو و(يطوطووها) والسلام! أعجب (عبد العاطي) بالفكرة أيّما إعجاب، لكنه أخبرني في أسى بالغ بأنّ الغيارين كتيرين عليهو ولن يقدر على توفير ثمن القماش والخياطه لأنو يا دوبك بيوفِّر حق الأكل من هنا ومن هناك. فأجبته بأنه في هذه الحالة لابد من خيار آخر أقل تكلفة وهو (اللبسة العائلية) وهي عبارة عن جيبة أو قرقاب كبير يسع جميع أفراد العائلة السبعة مع قميص بأربعتاشر كم.. إلا أنه بدا متردداً في حكاية (القرقاب) دي مما جعلني أخاطبه: شنو يا (عبد العاطي) يا خوي ما نلبس (قرقاب) كان لبسنا؟ نحنا أحسن من الأسكتلنديين؟ ما قاعدين يلبسوهو.. وكمان أخوانا الهنود والبنغلاديشيون واليمنيون كلهم قاعدين يلبسوهو! بذلت جهداً كبيراً في إقناع (عبد العاطي) بمسألة اللبسة العائلية وعلى وجه الخصوص عملية الجيبَة أو القرقاب، فهو يرى أنها لا تتناسب مع عاداتنا وتقاليدنا وحاجات تانية.. غير أنّي أكدت له أن الموضوع في الآخر هو حكاية (سترة) وأن هذه اللبسة العائلية أفضل كثيراً من (العرى العائلي)، الذي يواجهه هو وأفرا د أسرته الذين لم يكن في مقدورهم شراء متر قماش واحد خلال العشرين عاماً الماضية! بعد أسبوعين، وبينما كنت أجلس في العصرية أمام المنزل رأيت (عبد العاطي) يتجه نحوي وهو يحمل كيساً كبيراً ما أن وصلني حتى قذف به ناحيتي: يا أستاذ شيل اللبسَة العائلية دي أعملا غطاء للعربية أعملا خيمة أعملا أي حاجة؟- مالا يا (عبد العاطي)!!؟ إتصور أول مشوار طلعناهو أنا والأولاد كان أمبارح ماشين بيت بكا.. في أول صينية وقفنا ليك بتاع الحركه قال إيه؟ دي لبسة (7راكب) ولازم يا الترخيص يا (30) جنيهاً غرامة!