ما الذى يبقينا فى الجامعة العربية

Quote: ثانيا: ضعف او قوة العرب حاليا لا يعني بأي حال عدم وجود ازمة هوية في شمال السودان السبب الرئيسي بنظري لاهتمام السودانين بشأن الهوية هو وجود مشكلة هوية شئنا ام ابينا و ملامحها واضحها قدامك اهو 1. انفصال الجنوب 2. حرب دارفور 3. المعاملة الغير كريمة للسودانيين من العرب تفتكر الحاجات كانت ممكن تحصل لو ماك ان في ازمة هوية ؟ بمعنى لو كان الناس دي كوولها فاكرة انها عرب متلك كان في داعي يتحاربوا جنس دا ؟!! يموتوا 3 مليون في الجنوب ، و قرابة 650 الف في دارفور و البشير يقول ليك لا نريد جريحا و لا اسيرا و دونك حديث الغرباوبية و الجهاد المقدس الكان مدور في الجنوب و ساحات الفداء و اسحق فضل الله و منبر السلام العادل و الطيب مصطفى و صحيفة الانتباهة الخ ... دا كلو شي طبيعي ؟ سببوا شنو تفتكر ؟ اوعا تقول لي اسرائيل و الايدي الخفية رجاء لانو بالجد كدا بتزعلني بعدين تعال عاين تاريخ العرب الحسة معانا من يوم ما مشينا ننضم لجامعة الدول العربية وقالوا مادايرنكم معانا و لي يوم الليلة شوفتا اي درجة احترام للعرب للسودانيين ؟ على المستوى الرسمي عاين للبتعمل فيهو حكومة لبنان و مصر مع السودانيين ، على مستوى الاعلام شوف الدعايات المسيئة للسودانيين و اغنية القرد النوبي و شوكولا راس العبد و فستق العبيد ، و دقوا الجزائر و عصمان البواب الطباخ الاسود ، على مستوى المعاملة عاين للاطفال السودانيين في المدارس و حتى الروضات في الدول العربية تقريبا كل 1 طفل سوداني من 3 اطفال اشتكى من العنصرية و الاساءة و التمييز تجاهه من قبل الاطفال العرب و في كافة الدول العربية تقريبا

(عدل بواسطة وليد محمد المبارك on 06-24-2010, 09:33 AM)