ناجي أحمدالبشير عضو المنبر رئيس مايسمي بهيئةالعودةالطوعيةبالرياض.. تعال فهمنا الهيئة دي شنو؟؟؟؟

Quote: دمغة غريق ساخر سبيل ، الأستاذ / الفاتح جبرا دق مندوب شركة تحصيل فواتير (التلفونات) باب منزل جارنا (حاج لطاهر) - ده منزل الطاهر فضل الله - نعم - نحنا فواتير التلفونات (وناوله فاتورة التلفون) أخرج (حاج الطاهر) نظارة القراءة من جيب جلابيته وبدأ يقرأ في تفاصيل الفاتورة .. محادثات عالمية محادثات محلية .. هاتف جوال ... ضريبة .. دمعة غريق - (حاج الطاهر) في استغراب وهو يضع أصبع سبابته أمام (دمغة غريق) مخاطبا المتحصل : - دى اقرا ليا دى شنو ؟ دمعة شنو؟ - دى يا حاج ما دمعة ... دمغة ... بالغين مش بالعين ..، دمغة غريق .. ألف جنية بس - مش في ألف جنية بس .. هي ذاتا شنو؟ - والله يا أستاذ أنحنا بنحصل بس القروش لو عندك أي أسئلة أمشي (شركة التلفونات) هناك يشرحوا ليك الموضوع في الشركة :- - عاوز أقابل الزول المسئول عن التحصيل - شفت الممر داك.. أمشي عديل تأني لف شمال تأني لف يمين أول مكتب يقابلك دا مكتب مدير التحصيل وبالفعل بعد أن قام (حاج الطاهر) بمتابعة (الوصف) وجد نفسه وجها لوجه امام مكتب (مدير التحصيل) - السلام عليكم - وعليكم السلام. - والله في الحقيقة أنا بس عندي استفسار .. - (مبتسماً) تفضل .. - الحقيقة جاتني فاتورة التلفون وفيها ألف جنية مكتوب قداما دمغة غريق .. اول حاجة الشئ الانحنا عارفنو انو الدمغة دى (طابعة) بلصقوها لمن الزول يجى يقدم طلب ... والحاجة التانية غريق شنو ؟ وأنا مالي ومال المسالة دي .. محادثاتى وبدفعها ليكم .. تأني ما عندكم معاي حاجة .. انتو يعنى لازم تاكلو اموال الناس (بالباطل)؟ - بعد ان استعدل المدير في (جلسته) يا أستاذ ما (تهيج) ساكت .. اول حاجة انحنا ما قاعدين ناكل مال زول بالباطل لانو المسألة دي أجيزت من المجلس التشريعي للولاية .. وانتو النواب ديل انتخبتوهم .. يعنى هم بمثلوكم .. يعنى هم موافقين نيابة عنكم .. يعنى بالعربى انتو موكلنهم .. وهم اصدرو القرار دا ونحنا ما علينا إلا التنفيذ .. والحاجة التانية (الحكومة) ما شغالة بالتسميات شغالة بالجوهر .. بالمضمون .. الدمغة بلصقوها .. يدبسوها .. ما مهم المهم تندفع .. هسع لو المسائل تسميات كان تكون في حاجة اسمها (المساهمة الإلزامية) - أها وهسع حكاية (دمغة الغريق) دى شنو ...؟ - والله أنا ما بقدر افتيك لكن لو عاوز تعرف أكثر .. لحسن حظك (منظمة الغريق) ذاتا المبنى بتاعا أهو داك .. العمارة الصفراء ديك ممكن تمشي تأخذ منهم معلومات وتعرف الحاصل شنو . في المنظمة :- مبنى المنظمة عبارة عن (فيلا) فخمة ذات سياج معدني أنيق معلقه عليه بعض اللوحات الإعلانية التي تحض المواطن على تقديم الدعم والمساعدة للمنظمة من أجل القيام بدورها الاجتماعي فتلك لوحه تقول: (أيها المواطن الكريم تبرع بكفن غريق تكسب ثواب) وأخرى تقول (من كفن غريقا فكأنما أطعم عشرين مسكيناً) وثالثة تقول (الغرقى أخوانكم فتبرعوا لهم) .. (الغرقان فى ذمة العايش) بعد أن قام (حاج الطاهر) بقراءة كل تلك اللوحات .. ومتع ناظريه بذلك (القطيع) من السيارات البيضاء الفارهه موديل العام (المرصوصة) في المكان (المسقوف) المعد لها ... قام بدخول المبنى حيث طلب من موظف الاستقبال مقابلة المدير العام للمنظمة. مع المدير :- دلف (حاج الطاهر) الى مكتب المدير العام .. المكتب فسيح .. التكييف مركزى .. تتدلى من حيطانه ستائر ايطالية بينما غطيت أرضيته بالسجاد الإيراني .. به طقم جلوس أمريكي فاخر وقاعة اجتماعات أنيقة من الخشب المصقول اللامع .. أمامها مكتب نصف دائري يجلس عليه السيد المدير بوجه لامع تبدو عليه أثار النعمة و (الراحات) و (التكييف طويل المدى) - السلام عليكم - وعليكم السلام ورحمة الله تعالى وبركاته (أتفضل - مشيرا إلى احد كراسي الجلوس الوثيرة) وجلس (حاج الطاهر) ثم قال مخاطبا السيد المدير : - والله في الحقيقة أنا جاتني في فاتورة التلفون دمغتكم دي وقلت أجي أقابلكم أعرف الحاصل شنو ؟ وما مدى (مشروعية) دفع الدمغة دي. - والله يا أخي نحنا (بنثمن) فيك الروح الطيبة دي وتجشمكم مشاق الحضور لي دارنا المتواضعة عشان تتعرف على ما تقوم به هذه المنظمة من عمل خيري يهم المسلمين جميعا. في الحقيقة المنظمة دي جات نتيجة لتزايد حالات الغرق .. كل يوم والثاني يقولوا ليك ثلاثة أصحاب مشوا البحر غرقوا ... ناس مشوا رحلة ما رجعوا .. وحافلة وقعت من الكبري الركاب ما إتلقو .. وجثة طافية في النيل .. الناس ديل كلهم (الحكومة) تجيب ليهم (غطاسين) من وين ؟؟؟ ونجيب ليهم (بكاسي) تشيل جثثتهم من وين ؟؟؟ .. ونجيب ليهم ثلاجات تحفظ جثتهم لحدت ما أهلهم يتعرفوا عليهم من وين ؟؟؟... الإجراءات .. حمل الجثمان للمشرحة .. وضعة في الثلاجة .. تشريحه .. تصويره وعمل إعلان في الجرائد عشان اهلو يتعرفوا عليهو .. وفي حالات عدم التعرف تكفينو ودفنو .. من وين ؟؟؟ وما تنسى مرات بيكون الزول الغرقان دا ذاتو (مكتول) وفي الحالة دي نحنا في المنظمة بنتابع مع (الشرطة) .. الصرف دا كلو الحكومة تصرفوا من وين .. في (ميزانية الدولة) في بند ذى دا ؟؟ ما لازم (منظمات المجتمع المدني) والمواطن يساهم في المسألة دي .. أنت هسع ذاتك ما ممكن بكره تقع بيك عربية في النيل (يجيبو ليك غطاسين من وين)؟ بإختصار نحنا مسئولين من (الغريق) من لحظة دخولو المويه الى لحظة دخولو (القبر) - دا كلو كلام جميل لكن أنا ذنبي شنو ؟ - ذنبك شنو كيف يا أستاذ .. مش أنت زول مسلم والبغرقوا ديل كلهم إخوانك في الإسلام ؟ - حاج الطاهر في (إستنكار) لا .. البغرقو ديل كلهم (مواطنين) لكن ما كلهم مسلمين وكلامك دا ضد (الدستور) وإتفاقية ... - (المدير مقاطعاً) لا أنحنا الناس الما مسلمين ديل عندنا ليهم (إدارة) براها في المنظمة إسمها (إدارة غير الناطقين بها) .. بالشهادة يعني - لكن هسع (السودان) كلوا يدفع (للغريق) دا ؟ مسلم على غير مسلم .. يعنى لو التلفونات دي فيها مليون مشترك وانتو قاعدين تاخدو الف جنيه من كل واحد يبقى بتجمعو ليكم مليار جنيه في الشهر .. دا غير العاوز يطلع او يجدد جواز او بطاقة او رخصة قيادة أو عاوز يطلع شهادة بحث دي كمان مليارات .. إنتو بتودو القروش دي وين؟ أصلو القاعدين (يغرقو) ليكم في الشهر كم؟ - يعني أنت بس دي (بالذات) عاوز تعرف أنها ماشه وين انت هسع (الباقين) عارفم بمشوا وين ؟ عندك هسع دمغة (الطريح) ودمغة (الشليق) ودمغة (الحابل) ودمغة (النابل) زائد كنانة والرهد ديل كلهم عارفهم بمشوا وين؟ - حاج الطاهر (محتداً) هو نحنا (تطير عيشتنا) ما نعرف ولا حاجة .. يا أخى انا بس عاوز أعرف دى .. أيوه دمغة الغريق دى .. الباقى دا بيجي يوم نعرفو - المدير في (برود) : أكيد تكون يا أستاذ افتكرت انو القروش دي كتيرة .. أول حاجة يا أستاذ لازم تعرف انو مسألة انتشال الجثث دي مسألة مكلفة .. لنشات وغطاسين وجازولين وخلافه .. عندك مثلاً الراجل الوقع من كبري (الإنقاذ) وانتحر الأسبوع الفات عشان ما قدر يدفع مليون جنيه رسوم ولدو الدراسية .. دا نحنا بس عشان نلقى الجثمان بتاعو المسألة كلفتنا تلاتة مليون .. - طيب لو كان أديتو المليون ما كان أنتحر - يا أستاذ انا بكرر ليك دى ما مسئوليتنا .. دى مسئولية ديوان الزكاة .. صندوق التكافل .. الرعاية الاجتماعية .. طلاب دعم الصندوق .. لكن مسئوليتنا تبدأ من لحظة موت الغريق داخل الموية وحتى ندفنو - في (استنكار) يعنى القروش دي كلها .. يعنى كم مليار جنيه في الشهر كلها غطاسين ولنشات وجازولين .. معقول بس - طبعا لا يا استاذ .. القروش البتفضل قاعدين نوظفها .. قاعدين نعاين للمستقبل .. هسع لما يجي يوم الناس دي كلها تغلبها المعايش تكابس البحر وتنتحر والله ما تلقى إلا المنظمة دي تسترها .. نحنا – يا أستاذ- مستعدين للغرق (الجماعي) ال ح يحصل وعاملين حسابنا .. ومش كدا وبس نحنا عملنا مشروعات استثمارية نوظف فيها القروش دى عشان تنمو وتعمل رصيد كويس نقدر نجابه بيهو اى (غرق). - ذى شنو ؟؟ - طيب تعال اتفرج على الصور (وفتح السيد المدير البوم كبير ملئ بالصور الملونة) شفت دى الشايفها دا .. المبانى أم اربعين طابق دي .. دي (أبراج الغريق التجارية) في قلب الخرطوم وبتنفذ فيها شركة (صينية) و ح نبيعها شقق ومكاتب .. (يقلب الصفحة) والبصات السفرية السياحية الفاخرة دي .. دي مية وخمسين بص أسسنا بيهم شركة (سفريات الغريق) الخرطوم/مدني/بورتسودان/دنقلا ... (يقلب الصفحة) وكل صيدليات (الغريق) الفي العاصمة دي بتاعتنا .. ولسع عندنا مشروعات كتيرة .. دا كلو يا أستاذ استثمار عشان (الغريق) .... يعني السودان دا كلو لو (غرق) أنحنا ممكن بي امكاناتنا دي (نحصلو) ونشيلو ندفنو .. اها بعد دا في زول يقول نحنا قاعدين نهمل الغريق؟؟ زول يقول إنو البلد ما فيها (آليات) لدرء الكوارث - طيب انتو وكت القروش دى كتيرة كدا وعملتوها عمارات وشركات واستثمار ما تفكرو تساعدو المواطنين (الغرقانين) في (الديون) و الفقر والمرض ودا ذاتو يكون شئ وقائي عشان ما يمشوا و(يغرقو ليكم) - والله يا استاذ حسب النظام الأساسي لمنظمة الغريق نحنا بنعنى بمساعدة الغريق (البحري والنيلي) وحتى البغرق في (ترعة) .. لكن (البري) دا ما معانا .. دا مسئولية (الرعاية الاجتماعية) .. (مواصلا) شوف يا أستاذ نحنا المواطن الغرقان دا همنا الأول والأخير ولازم يلقى عناية تليق بيهو مش هنا وبس حتى لو بره السودان .. نحنا الأسبوع الجاي ح نفتتح مكاتب (جهاز شئون الغرقانين بالخارج) عشان نكون مسئولين من البغرق بره السودان كمان . - ودي طبعا ح تكون دمغتها بالدولار والريال والإسترليني؟؟؟؟ - أكيد .. نحنا عملنا المنظمة دي عشان نحفظ للمواطن السوداني (الغريق) حقو في انو يغرق غرقة لائقة .. يعنى مش معقول يعيش (ممرمط) و (مشلهت) ولما تتسدا الابواب فى وشو ويقوم ينتحر ويغرق كمان تاني (يتبهدل) ..................... تعليق لكاتب المقال : وانتو ما (بتغرقو) مالكم ؟؟ غواصات ؟؟ الله لا كسبكم

(عدل بواسطة محمد حلا on 06-15-2010, 00:53 AM)