|
Re: إلى قيادة حركة العدل والمساواة في القاهرة هولا في السجون المصرية منهم دارفور ين (Re: amir jabir)
|
الحكومة المصرية تهدد: هانقتلهم زي ما قتلنا اللاجئين
بقلم أميرة الطحاوي في بيان مهم عن ترحيل اللاجئين السودانيين، بس أولا موش ممكن الكلام اللي اتقال امبارح ف البرلمان المصري ده ومفيش واحد من الحزب الحاكم يعترض عليه أو يطالب بشطبه من المضبطة ولو حتى يتحمق ويرفضه بالكدب؟ دول نواب عن الأمة بيطالبوا باستخدام الرصاص الحي ضد الشعب اللي بيمثلوا مصالحه - افتراضا؟ رصاص ضد مدنيين عزل؟ عاوزين غطاء تشريعي لمجزرة زي مصطفى محمود كده؟ طيب في مظاهرة الثلاثاء أدام البرلمان نفسه، ورونا بقى الرصاص الحي. (المتظاهرين بقى يحضروا العدة: مسدسات الميه اللعبة وبمب من بتاع العيد) الألعن عمود عبداللطيف المناوي ف اهرام النهارده، ده بينادي الحكومة بالتعامل السريع مع وقفات الرصيف الاحتجاجية حتى لا تترك لتصبح دائمة (افندم؟ بعضها اعتصام دائم؛ فطبيعي يبقى "دايم" يا عبلطيف لحين تنفيذ المطالب، هي موش مظاهرة يا عُبَـد..دي حاجة ودي حاجة يا باشا) وبيطالب بالتعامل المبكر مع هذه الوقفات حتى لا تصبح مثل مذبحة اللاجئين بميدان مصطفى محمود . طبعا كلنا عارفين ايه اللي حصل ف مصطفى محمود .. ما علينا: خليهم يموتوا الشعب كله، ويحكموا الفراغ السرمدي. دلوقتي في جديد بخصوص الترحيل القسري للاجئين السودانيين واعادتهم قسريا للسودان؛ أي لنفس البلد الذي فروا منه بسبب وجود مخاوف "جدية- لها ما يبررها" على حياتهم هناك . حسب مقابلتي لمجموعة منهم الأسبوع اللي فات: هم موش مطمنين، ولا أنا صراحة؛ خصوصا بعد ما تابعت استمرار الحملة الوسخة بتاعة المصري اليوم، بجد اتصدمت! ولولا اني كنت مشغولة لشوشتي بموضوع تاني والله كنت رحت عملت مظاهرة ادام الجرنان ده، يوم ما الحملة بدأت بالخبر المتفبرك ده عن العصابة الخطيرة اللي بتهرب الناس من 6 دول مختلفة عبر 3 قارات ..واو !! ..دي كلها اتهامات امن الدولة يا احمد يا خطيب. ومعروفة من اكتر من شهر ، وعلى الاقل مكتوبة ف التحريات اللي انت ناقلها باعتبارها حقايق، والموضوع لا ليه دعوة بليبيا ولا تشاد ولا اثيوبيا ولا ارتريا يا حلو، الموضوع انتوا بتتستروا بيه على ضباط امن مصريين ف سينا بيسهلوا التهريب وبيشاركوا المهربين ف القرشينات، ولما اتفضح الموضوع نشرتوا عن القضية الدولية دي، وراميين كلام ان في ضباط امن ف دول افريقية وحشين متورطين فيه، الدولة دي بقى اللي هي مصر يعني؟، في تهريب لاجئين لاسرائيل: محدش انكر. وفي تسهيل ليه: آه. انما الامن المصري مراقب تليفونات الناس دي من 4 شهور، فرغوا بقى التسجيلات دي وقولوا لنا ايه علاقته بالعصابة الخطيرة دي. وطلعوا اسامي الضباط المتورطين ف الموضوع لو سمحتوا، تحب نبلغ شركات الموبايل بارقام التليفونات عشان تطلع تسجيلاتها؟ وقولوا لنا ايه علاقة اللاجئين المحبوسين دول تحديدا بتهريب افارقة لايطاليا وتهريب اثيوبيين وارتريين لاسرائيل؟ همه مالهم يا فتك لو الاثيوبيين والارتريين بيقطعوا جوازاتهم ويقولوا للاسرائيليين احنا سودانيين ومن دارفور كمان، وحلني لما يكتشفوا، واتحدى اي حد يقول انهم عصابة دولية، وان اللاجئين السودانيين اللي بيتعاملوا معاهم بيدخلوا من حدود شرقستان و غربستان اللي خبر المصري قعد يحكي عنها بهبل، ويطلعوا على اوربا كمان .. يا عم عيب عليكوا.ده انتوا قلتوا ف الخبر الاولاني عصابة دولية بتهرب الناس لاسرائيل وبعدين دخلتوا في موضوع تاني ليبيا وتشاد واوربا واليونان وايطاليا، مال اللاجئين المحبوسين دول تحديدا بالقصة دي كلها؟ مال الكام وثلاثين لاجيء سوداني اللي ظهروا فجأة و اتحاكموا يوم 8 ابريل بالعصابة دي؟ولا نتوا بتمهدوا لحاجة اكبر؟ ومن شوية لسه واصلني بيان جديد - مصدره مركز السودان المعاصر- حوالين ترحيل اللاجئين قسرا للسودان، وهناك جلسه عاجلة لوقف الترحيل، مفروض تبقى يوم 25 منه، التحركات كلها تمت بعد أول جلسة بالفعل في محاكمة اللاجئين - المختفيين من شهور- ، والجسة كانت بتاريخ الخميس 8 ابريل 2010 ، والمنظمات الدولية ومنها هيومان رايتس وتش وباربره هانم - منظمة أميرا- مشدتش حيلها قوي غير بعد الجلسة دي رغم انه تم بالفعل نقل لاجيء الى اسوان تمهيدا لترحيله للسودان في 4 ابريل وده معلن في اكتر من مكان وموقع، ولم تتحرك المنظمات الدولية، وبيان هيومان رايتس مصدرشي غير 9 ابريل ! وتحرك مركز اميرا كان 9 برضه! سبحان الله ! وطبعا هيومان رايتس - رغم بيانهم القوي- مجبتش سيرة ان الاسرائيليين كمان بيبعدوا جبراً لاجئين سودانيين مكثوا لديها لفترات الى الحدود مع مصر حيث يقوم الامن المصري باطلاق النار عليهم ويتحسبوا انهم متسللين من مصر واحنا - العسكر المصريين يعني- طخناهم، عادي ما اسرائيل عندهم دولة ديموقراطية ميصدقوش انها تعمل كده، والمصري اليوم برضه اكتشفت القضية فجأة وقالت اسم القبيلة البدوية - الوحيدة؟؟؟ - الوحشة اللي بتهرب عادة اللاجئين وغير اللاجئين، وسابت اسامي الضباط المتورطين برضه في التهريب! فسبحان الله تاني!
كان في اقتراح - ولازال قائماً - أن تقوم المنظمات المعنية بمخاطبة وحدة السودان واللاجئين بوزارة الخارجية المصرية مباشرةً ( السفير: محمد إبراهيم عبد الحكم، مساعد وزير الخارجية للشئون القنصلية و المصريين بالخارج و الهجرة و اللاجئين + السفير د. يوسف أحمد الشرقاوي، نائب مساعد وزير الخارجية للشئون القنصلية و المصريين بالخارج و الهجرة و اللاجئين) لوقف الترحيل لأن التعامل مع المفوضية ومقرها الاقليمي بيكون عن طريق الخارجية بالاساس، ولأن الاتنين دول تحديدا همه اللي بيقابلوا كممثلين عن مصر مبعوثي المفوضية القادمين من جينيف، ولأن احيانا لوي الدراع مبيجبش نتيجة مع الحكومة المصرية لا باحكام قضائية ولا غيره، وساعات التعامل المباشر ممكن يحل قضايا من غير زيطة وزمبليطة متاخرة قوي ( وبالذات لما يبقى حد متكلف في يوم وليلة من قبل حد تاني مثلا برفع ومتابعة القضية ، وعشان الحد الاولاني متسجل كمنظمة قانونية والحد التاني غير مسجل اصلا في مصر!) ولأن في حالات ترحيل سابقة تمت لناس معاها بطاقة لاجيء زرقاء يعني حماية دايمة موش مؤقتة كمان! (نزار وصلاح) ورغم وجود احكام على وزارة الداخلية بعدم ترحيل هؤلاء. ما علينا ... ما لا يدرك كله لا يترك كله ،ويمكن الداخلية المصرية تسمع الكلام المرة دي وتخاف وتختشي. بس حبيت انقل البيان بالمعلومات الجديدة - ولست مسؤولة عنها- عشان لما تحصل مصيبة جديدة للاجئين نبقى متوقعينها كده ان شاء الله. سلامو عليكوا.
المصدر
|
|
|
|
|
|
|
العنوان |
الكاتب |
Date |
إلى قيادة حركة العدل والمساواة في القاهرة هولا في السجون المصرية منهم دارفور ين | amir jabir | 05-09-10, 01:37 PM |
Re: إلى قيادة حركة العدل والمساواة في القاهرة هولا في السجون المصرية منهم دارفور ين | amir jabir | 05-09-10, 01:45 PM |
Re: إلى قيادة حركة العدل والمساواة في القاهرة هولا في السجون المصرية منهم دارفور ين | amir jabir | 05-09-10, 01:46 PM |
Re: إلى قيادة حركة العدل والمساواة في القاهرة هولا في السجون المصرية منهم دارفور ين | amir jabir | 05-09-10, 01:53 PM |
Re: إلى قيادة حركة العدل والمساواة في القاهرة هولا في السجون المصرية منهم دارفور ين | amir jabir | 05-09-10, 02:17 PM |
Re: إلى قيادة حركة العدل والمساواة في القاهرة هولا في السجون المصرية منهم دارفور ين | amir jabir | 05-09-10, 02:21 PM |
Re: إلى قيادة حركة العدل والمساواة في القاهرة هولا في السجون المصرية منهم دارفور ين | amir jabir | 05-09-10, 02:25 PM |
Re: إلى قيادة حركة العدل والمساواة في القاهرة هولا في السجون المصرية منهم دارفور ين | amir jabir | 05-09-10, 02:49 PM |
Re: إلى قيادة حركة العدل والمساواة في القاهرة هولا في السجون المصرية منهم دارفور ين | Mohamed E. Seliaman | 05-09-10, 02:52 PM |
Re: إلى قيادة حركة العدل والمساواة في القاهرة هولا في السجون المصرية منهم دارفور ين | amir jabir | 05-09-10, 03:25 PM |
Re: إلى قيادة حركة العدل والمساواة في القاهرة هولا في السجون المصرية منهم دارفور ين | amir jabir | 05-09-10, 08:32 PM |
Re: إلى قيادة حركة العدل والمساواة في القاهرة هولا في السجون المصرية منهم دارفور ين | amir jabir | 05-10-10, 11:09 AM |
Re: إلى قيادة حركة العدل والمساواة في القاهرة هولا في السجون المصرية منهم دارفور ين | amir jabir | 05-13-10, 11:11 AM |
|
|
|