|
Re: مـعـقـولـة ...؟؟ الـسـودان بـلـد المـليـون ميـل مـربع ما فيهـو ( كورنجـبـّة ..!!!) (Re: Saifelyazal Elmaki)
|
هي لكين بالعدد يا عمك ، لو كان كده كانت الهند شالت كأس العالم وختتو كمان. تعرف ما في مواهب والموهبة ما في ليها مكان عشان تبرز وتشبع فيه موهبتها ، زمان كان في ملاعب وفسحات وميادين كل ميدان يا عملوهو جامع يا وزعوهو أراضي وحتى ميادين المولد مثلاً في بحري الميدان يكون في فترة من فترات السنة مولد يفرتقوا ناس الحولية وتفضل دكاكين الحلاوة عطاله مقنعه يقعدوا ليك لغاية المولد الجاي نوم وركلسه وبالليل يجوا ناس السوق والبكاسي نظام فندق مجاني ينوموا في الهواء الطلق وما في فرق بينهم وبين ناس المزاد أو الديوم مثلاً فإذا قٌدر لسكان تلك الأحياء إمتلاك مكيفات لتكييف الهواء تقيف الطاقة المحركة بينهم وبين يا نسمه ، أها لمن يجي رمضان تتحول لي دلاله وغبار وعلاله. الأمر الذي أصبحت معه ألعاب البلاي ستيشن رائجه في البلاد لأنها لا تحتاج لمساحة وتشبع رغبة الموهبة خاصة وأنه يقلد ميسي وأم سيسي. بالله لو في مواهب كان العجب وهيثم وجيلهم هم التوب تن في كورتنا. أما في شأن المحترفين فكما قال حسن المصري هناك محترف بألف دورلا وآخر بمائة ألف دولار والمحترفين بتاعننا ديل الواحد بجيك خلاص داخل الزووون يعني Approaching الثلاينيات من عمره المديد بإذن الله الأمر الذي يجعله مشروع محترف معتزل بحكم عامل السن كمان لو زي ما قالوا صغير في السن ولاعب خطير وكان في طريقه إلى برشلونه أو إياكس أمستردام زي ستيفن وورغو أها برضو بجي يجليها ثابته ويصاب بالنحس حتى لو إفترضنا جدلاً أنه حافظها فهو بالعين المجرده العاديه بتاعت ميادن عقرب وليق الخرطوم لاعب سليقه وفي رواية أخرى مويه.
|
|
![ICQ](https://sudaneseonline.com/db/blank.gif) ![AIM](https://sudaneseonline.com/db/blank.gif) ![Yahoo](https://sudaneseonline.com/db/blank.gif) ![Edit](https://sudaneseonline.com/db/icon_edit.gif)
|
|
|
|
|
|
|