|
|
 نقوش على جدران طاحونة محمود
|
نقوش على جدارن طاحونة محمود
مهداة لناس العباسية بالمنبر العام
هنا يختلط العام بالخاص فالرجاء ان تحجز ليك مكان يا عمنا عصمت العالم يا ود الجزولي ويا سلمى الشيخ سلامة
الطاحونة بتاعت محمود عبدالقادر واحدة من معالم العباسية التي تفتحت عليها مداركنا وهي تقع بالعباسية شرق محطة عابدين( وعابدين سيد المحطة هو الحاج عابدين حمد واحد من وجهاء حي العباسية ) في شارع الاربعين .اول ما تنزل في المحطة وانت جاي من الخرطوم شمالك طلمبة عابدين والتي كانت موبيل ثم الان هي بتروناس يمينك طوالي على الناصية الاولى دكان عابدين تدخل الشارع وانت متجه شرقا اول زقاق شمالك تدخل بيهو واول زقاق يمينك تدخل بيهو اول بيت يمسنك بيت ناس جد صالح واول بيت شمالك دة بيتنا انحنا ال جادين البيت التاني بعدنا شرقا بيت ناس داش وبعد طوالي طاحونة حاج محمود الطاحونة جزء من البيت الزقاق دة يسكنه اضافة لينا انحنا وناس حاج محمود وطبعا بيت ناس جد صالح الله يرحمه يسكن يه االان ال النقر من الهشمباب وبعدهم كان بيت ناس على بابكر وزوجته بشرية مهدى ابو العباس من ناس بور وبعدهم منزل الرحوم الحاج صديق علي او بيت ناس الحلب كما اشتهروا وسطنا .اما بعد بيت حاج محمود فهناك بيت اخوته الاثنين عم النذير وعم ادريس وبعدهم منزل المرحوم خالنا احمد عبدالله المشهور ببله ( والذي درج العم شوقي بدري على ذكره في احاديثه عن امدرمان ويسميه خل الروح ) وبعد داك بيت ناس عم عمر والد الهادي والاستاذ متوكل ويليه منزل المرحوم الصادق حسن احد قيادات الانصار وحزب الامة والد الاستاذة سعاد الصادق حسن القيادية الان بحزب الامة هذا وصف مبسط للزقاق الذي به طاحونة محمود .اسعدني الحظ ان اقتربت من سيد الطاحونة بعد ان تزوجت وسكنت في بيت العائلة في بداية حياتي الزوجية فكنت احضر معه صلاة التروايح في شهر رمضان وكذلك هناك درس يوم الاثنين والخميس بعد التروايح فالحاج خليفة من خلافاء الختمية والحزب الاتحادي طبعا وكذلك هو حجة في المواريث كل المطلوب منك ان تذكر القضية امامه الخاص بالميراث وهو يفصلك احسن من الشيخ الشعراوي نفسه واضافة لذلك فالحاج محمود ذو صوت جميل وقوي خصوصا عندما يتلو من العثماني (مولد السيد محمد عثمان الكبير وهو في الصلاة على الرسول صلى الله عليه وسلم )كذلك يقوم بقراءة البراق عندما نهيل التراب على المتوفي من ناس الحي ولحظة الناس تكون قد اكملت الدفن وقبل الفاتحة والدعاء للمتوفي يبدا حاج محمود في قراءة البراق بصوته الفخم ذلك وتجد نفسك دون ان تحس قد سالت دموعك.
زمان كان هذا الزقاق هو مكان لعبنا للكرة الشرب وبه تعلمنا لعب الكورة والدافواري وكان حاج محمود يكتفي بزجرنا كلمة واحدة بس (يا ولد العب بعيد شوية يعني العب لكن بعيد عن الطاحونة )خصوصا ومعنا اولاده في هذا الدافوري وان كانو اصغر مننا حمودة وعثمان كتة لكن معهم ابناء خالتهم الذين من سننا ياسر موسى . وفي هذا المكان كان اخي الفاتح هو الذي يقطع لنا هذا الدافواري بقوله( مبارك مبارك امي قالت ليك تعال الفطور ) كنا حينها في الصف الاول والثاني بالابتدائي معنا في هذا الدافواري كل اولاد الحي والذين سنكون معهم بعد زمن ليس بالطويل فريق نجوم العباسية مع المرحوم محمد ادريس ورشة والاخ امير علي الامير يعقوب واخرين نذكرهم لمن نجي للموضوع دة بعدينك .في الايام العادية يكون مكان الطاحونة خالي من الحصان بتاع عم محمد ابو ناس سفيان وياسر موسى(اخوهم ود امهم) ولكن في يوم الجمعة يكون اللعب مشكلة عشان الحصان بيكون موجود طبعا البشوت الكورة وتجي تحت الحصان عليه احضارها وقد افلت مرة اخو عوض بوت من موت محقق عندما ركله الحصان ركلة اخطاته بكم سنتميتر لانه كان سريع جدا. . نواصل بعد قليل
|
|
 
|
|
|
|
|
| العنوان |
الكاتب |
Date |
| نقوش على جدران طاحونة محمود | مبارك جادين | 04-30-10, 04:39 PM |
| Re: نقوش على جدران طاحونة محمود | مبارك جادين | 04-30-10, 10:40 PM |
| Re: نقوش على جدران طاحونة محمود | ibrahim alnimma | 04-30-10, 11:03 PM |
| Re: نقوش على جدران طاحونة محمود | مبارك جادين | 05-02-10, 10:41 PM |
| Re: نقوش على جدران طاحونة محمود | سلمى الشيخ سلامة | 04-30-10, 11:08 PM |
| Re: نقوش على جدران طاحونة محمود | سلمى الشيخ سلامة | 04-30-10, 11:48 PM |
| Re: نقوش على جدران طاحونة محمود | سلمى الشيخ سلامة | 04-30-10, 11:51 PM |
| Re: نقوش على جدران طاحونة محمود | طارق جبريل | 04-30-10, 11:56 PM |
| Re: نقوش على جدران طاحونة محمود | مبارك جادين | 05-02-10, 10:37 PM |
| Re: نقوش على جدران طاحونة محمود | مبارك جادين | 05-02-10, 10:53 PM |
| Re: نقوش على جدران طاحونة محمود | مبارك جادين | 05-02-10, 10:47 PM |
| Re: نقوش على جدران طاحونة محمود | زهير الزناتي | 05-03-10, 04:17 PM |
| Re: نقوش على جدران طاحونة محمود | مبارك جادين | 05-03-10, 10:02 PM |
| Re: نقوش على جدران طاحونة محمود | عبدالكريم الامين احمد | 05-03-10, 10:08 PM |
| Re: نقوش على جدران طاحونة محمود | البدري عبد الله | 05-03-10, 10:13 PM |
| Re: نقوش على جدران طاحونة محمود | مبارك جادين | 05-03-10, 10:28 PM |
| Re: نقوش على جدران طاحونة محمود | مبارك جادين | 05-03-10, 11:20 PM |
|
| |
فيس بوك
تويتر
انستقرام
يوتيوب
بنتيريست