|
إلى كل الكيانات .. كفاكم لوماً للشعب السوداني ..
|
سلام الله عليكم،
أكتفيت في خلال الأسابيع الأخيرة الماضية بموقف المتفرج في مواضيع البورد، كلام كثير حصل وده كلو ما بيهمني لكن جات ظاهرة جديدة أي زول يجي يرمي لومه على الشعب السوداني .. اللي يقول ليك ده شعب ما عندو ذاكرة .. واللي يقول ليك ما عارف شنو ..
من الآخر كده .. انا واحد من الشعب ده .. ولو إستمر الحال بالناس دي تقعد تتكلم عن الشعب السوداني .. وتحديداً الناخب السوداني السجل وصوّت يبقى للأسف أي زول حيتكلم بالأسلوب ده ده زول ما إحترم الشعب السوداني .. وما إحترم خيارو .. صحيح في ناس ما سجلوا وفي ناس ما صوتوا .. وفي تزوير حصل .. وفي غيرو .. وفي أحزاب خشت الإنتخابات .. وفي النهاية بعد الحسبوه والجمعوه والطرحوه والضربوه .. لقو برنامجهم خسران .. وقاموا أنسحبوا .. وقاموا رجعوا .. وقاموا فكروا .. نحن كشعب سوداني جزء كبير مننا مستقلين .. وأنا واحد منهم .. ممكن نسكت نتفرج على الحاصل في البلد دي عادي جداً .. لكن تصل لمرحلة يجي كيان معين سوا كان حزب ولا غيرو .. ويتهم الشعب السوداني بكلام فارغ عشان ما صوّت ليهو .. ده نحن ما بنسكت عليهو هوي !!
تتكلموا عن تزوير .. تتكلم عن تعيدوا الإنتخابات ولا ما تعيدوها .. إتكلموا في الحاجه البتخص الإنتخابات .. لكن ما ممكن عشان زول ما صوّت ليك تتهموا زوراً وبهتاناً بي إنو ما عارف شنو كده .. ما عندو ذاكرة .. ولا ما عندو مُخ ..
أتمنى الناس تعي ما تقول وما تتكلموا عن الشعب السوداني بكلام سيئ في النهاية السودان ده ربانا .. إنتا وأنا وكلكم .. كان أمريكان ولا أوربيين ولا أي جنسية تانية .. في النهاية نحن كلنا سودانيين .. اللهم إلا كان في زول عندو فهم تاني !! ..
سلامـ،
|
|
|
|
|
|
|
|
|